କନକ ବ୍ୟୁରୋ : ଗୈରିକ ଦଳ ଛାଡ଼ିବା ବେଳେ ଭାବବିହ୍ୱଳ ହୋଇଗଲେ ସୁବାସ ଚୌହାନ୍ । ଇସ୍ତଫା ପତ୍ର ଦେଇ ବିଜେପି କାର୍ଯ୍ୟାଳୟ ସମ୍ମୁଖରେ ବିକଳରେ କାନ୍ଦି ପକାଇଲେ ବରଗଡ଼ର ଟାଣୁଆ ନେତା ସୁବାଷ ଚୌହାନ୍ । ବରଗଡ଼ ଲୋକସଭା ଆସନ ପାଇଁ ମୁଖ୍ୟ ଦାବିଦାର ଥିବା ସତ୍ୱେ ଦଳ ସୁରେଶ ପୂଜାରୀଙ୍କୁ ଟିକେଟ ପ୍ରଦାନ କରିଥିଲା । ଏଥିରେ ମର୍ମାହତ ହୋଇ ଆଜି ଦଳ ଛାଡ଼ିଛନ୍ତି ଟାଣୁଆ ନେତା ସୁବାସ ଚୌହାନ୍ । ଦଳ ଛାଡ଼ିବାବେଳେ ସୁବାସଙ୍କ ଅବ୍ୟକ୍ତ ବେଦନା ସ୍ପଷ୍ଟ ବାରି ହୋଇପଡ଼ୁଥିଲା । ଛାତିର କୋହକୁ ସମ୍ଭାଳି ପାରିନଥିଲେ ସୁବାସ । ଇସ୍ତାଫା ଦେଇ ଗଣମାଧ୍ୟମକୁ ପ୍ରତିକ୍ରିୟା ଦେବା ସମୟରେ କାନ୍ଦି ପକାଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ଇସ୍ତଫା ପତ୍ରରେ ସୁବାସ ଚୌହାନ୍ ଲେଖିଛନ୍ତି, ଦୁର୍ଭାଗ୍ୟର ବିଷୟ ଦଳରେ କିଛି କୁଚକ୍ରୀ ଗୋଷ୍ଠୀ ସହିତ ଆପଣ ମିଶି ମୋର ପରିଶ୍ରମ, ନିଷ୍ଠା ଓ ତ୍ୟାଗର ମୁଲ୍ୟ ବୁଝିବ ବଦଳରେ ଅଣଦେଖା କଲେ । ମୋତେ ଦଳରୁ ବାହାରିବା ପାଇଁ ସବୁପ୍ରକାର ଷଡ଼ଯନ୍ତ୍ର କଲେ । ଶେଷର ଷଡ଼ଯନ୍ତ୍ର କରି ମୋର ଟିକେଟ୍ ମଧ୍ୟ କାଟି ଅନ୍ୟ ନେତାଙ୍କୁ ଟିକେଟ ଦେଲେ ଓ ଅପମାନିତ କଲେ । ଭାରତୀୟ ଜନତା ପାର୍ଟି ଜଣେ ନିର୍ଦ୍ଦିଷ୍ଟ ବ୍ୟକ୍ତିର ପକେଟରେ ଆବଦ୍ଧ ହୋଇ ରହୁଛି ।
ଆଉ ତାକୁ ସୁରକ୍ଷା ଦେବା ପାଇଁ ସମ୍ପୂର୍ଣ୍ଣ ସଂଘ ପରିବାରକୁ ଉପୋଯୋଗ କରାଯାଉଛି । ମୁଁ ଦଳର ଏପରି ବ୍ୟବହାରରେ ଖୁବ ମର୍ମାହତ । ତେଣୁ ଆଗକୁ ଦଳ ସହ କାମ କରିବା ମୋ ପାଇଁ କଷ୍ଟକର ହୋଇପଡ଼ିବ । ଦଳ ଛାଡ଼ିବା ପରେ ନିଜ ନିର୍ବାଚନ ମଣ୍ଡଳୀର ଲୋକସଙ୍କ ସହ ଆଲୋଚନା କରିବା ସହ ଜନତାଙ୍କ ସହ ଆଲୋଚନା କରିବ । ଜନତାଙ୍କ ହିସାବରେ ଆଗାମୀ କାର୍ଯ୍ୟକଳାପ ପାଇଁ ଚିନ୍ତା କରିବି ବୋଲି କହିଛନ୍ତି ସୁବାସ ଚୌହାନ୍ ।
ସୂଚନାଯୋଗ୍ୟ ୨୦୧୪ ନିର୍ବାଚନରେ ବରଗଡ଼ରୁ ସୁବାସ ଚୌହାନଙ୍କୁ ପ୍ରାର୍ଥୀ କରିଥିଲା ବିଜେପି । ଆଉ ସେଠାରେ ବିଜେଡ଼ି ପ୍ରାର୍ଥୀ ପ୍ରଭାଷ କୁମାର ସିଂଙ୍କ ଠାରୁ ପରାଜିତ ହୋଇଥିଲେ ସୁବାସ । ପ୍ରଭାଷଙ୍କୁ ୩,୮୩, ୨୩୦ଟି ଭୋଟ ମିଳିଥିବା ବେଳେ ସୁବାଷ ଚୌହାନଙ୍କୁ ମିଳିଥିଲା ୩,୭୨,୦୫୨ । ବିଜୟ ବ୍ୟବଧାନ କମ ଥିଲେ ହିଁ ବିଜେପି ଏଥର ପରିବର୍ତ୍ତନ କରିଛି ପ୍ରାର୍ଥୀ । ଆଉ ବରଗଡ଼ ବିଜୟ ପାଇଁ ନୂଆ ସମୀକରଣ ଆପଣାଇଛି ବିଜେପି । ହେଲେ ଦଳର ଏପରି ନିଷ୍ପତ୍ତିରେ ଖପ୍ପା ହୋଇଥିଲେ ସୁବାସ ଚୌହାନ । ଦଳର ନିଷ୍ପତ୍ତି ବିରୋଧରେ ସ୍ୱର ଉଠାଇବା ସହ ତାଙ୍କର ଏକ ମୋବାଇଲ ମେସେଜ ସୋସିଆଲ ମିଡ଼ିଆରେ ଭାଇରାଲ ହୋଇଥିଲା । ଏବଂ ବିଜେପୁରରେ ନବୀନ ପଟ୍ଟନାୟକଙ୍କ ବିରୋଧରେ ଧର୍ମେନ୍ଦ୍ର ପ୍ରଧାନ ନିର୍ବାଚନ ଲଢ଼ନ୍ତୁ ବୋଲି ଆହ୍ୱାନ ଦେଇଥିଲେ । ତେବେ ଇସ୍ତଫା ଦେବାପରେ ତାଙ୍କର ଆଗାମୀ ପଦକ୍ଷେପ କ’ଣ ହେବ ତାହା ସ୍ପଷ୍ଟ କରିନାହାନ୍ତି ସୁବାସ ।