କନକ ବ୍ୟୁରୋ : ବାଲେଶ୍ୱର ସୁବର୍ଣ୍ଣରେଖା ନଦୀରେ ପୁଣି ବଢି । ସୁବର୍ଣ୍ଣରେଖାର ବିପଦ ସଙ୍କେତ ଉପରେ ବନ୍ୟାଜଳ ପ୍ରବାହିତ ହେଉଛି । ନଦୀର ବିପଦ ସଙ୍କେତ ୧୦ ଦଶମିକ ୩୬ଥିବାବେଳେ ୧୧ଦଶମିକ ୧ରେ ପ୍ରବାହିତ ହେଉଛି ବନ୍ୟାଜଳ । ଗାଲୁଡିହି ଡ୍ୟାମରୁ ୯ଟି ଗେଟ୍ ଖୋଲିବା ପରେ ଫୁଲୁଛି ସୁବର୍ଣ୍ଣରେଖା । ଗାଲୁଡିହିରୁ ୪ହଜାର ୭ଶହ କ୍ୟୁସେକ ପାଣି ଛଡାଯାଇଛି । ବନ୍ୟାଜଳ ଆସିଲେ ବାଲିଆପାଳ, ବସ୍ତା ଜଳେଶ୍ୱର ଓ ଭୋଗରାଇ ପ୍ରଭାବିତ ହୋଇଛି । ବାଲିଆପାଳ କୁଦମାନସିଂହରେ ରାସ୍ତା ଉପରେ ୫ ଫୁଟର ପାଣି ପ୍ରବାହିତ ହେଉଛି । ସେହିଭଳି ଚୌଧୁରୀକୁଦ ଚଟାଣ ଉପରେ ୩ ଫୁଟର ପାଣି ବହୁଥିବାରୁ ବାହ୍ୟଜଗତରୁ ବିଚ୍ଛିନ୍ନ ହୋଇଛି ବାଲିଆପାଳ । ଜାମକୁଣ୍ଡାରେ ପ୍ରଶାସନ ପକ୍ଷରୁ ୫ଟି ବୋଟ୍ ସାହାର୍ଯ୍ୟରେ ଲୋକେ ଚଳାଚଳ କରୁଛନ୍ତି । ସେପଟେ ଜଳେଶ୍ୱର ସୁବର୍ଣ୍ଣରେଖାରେ ମଧ୍ୟ ବନ୍ୟା ଆସିଛି । ରାଜଘାଟରେ ବିପଦ ସଙ୍କେତ ଉପରେ ବନ୍ୟାଜଳ ପ୍ରବାହିତ ହେଉଛି । ରାଜଘାଟରେ ବିପଦ ସଙ୍କେତ ୧୦.୩୬ଥିବାବେଳେ ୧୧.୦୩ରେ ବନ୍ୟାଜଳ ବ୍ରବାହିତ ହେଉଛି । ଭୋଗରାଇ, ବାଲିଆପାଳ ଓ ଜଳେଶ୍ୱର ବ୍ଲକରେ ୩୦ଟି ପଂଚାୟତରେ ୫୦ଟି ଗାଁ ଜଳମଗ୍ନ ହୋଇଛି।
Kanak News is now on WhatsApp
Join and get latest news updates delivered to you via WhatsApp
୪ଟି ଜିଲ୍ଲାକୁ ବନ୍ୟା ମଧ୍ୟ ସତର୍କ ସୂଚନା ଦିଆଯାଇଛି । ଢେଙ୍କାନାଳ, ଯାଜପୁର, ବାଲେଶ୍ୱର ଓ କେନ୍ଦ୍ରାପଡା ଜିଲ୍ଲାପାଳଙ୍କୁ ସତର୍କ ସୂଚନା ଜାରି କରିଛନ୍ତି ସ୍ୱତନ୍ତ୍ର ରିଲିଫ କମିଶନର । ବ୍ରହ୍ମଣୀ ଓ ସୁବର୍ଣ୍ଣରେଖା ନଦୀରେ ଜଳସ୍ତର ବଢୁଥିବ ନେଇ ଏସଆରସି ସୂଚନା ଦେଇଛନ୍ତି । ସୁନ୍ଦରଗଡରେ ମଧ୍ୟ ଇବ ନଦୀରେ ବନ୍ୟା ପରିସ୍ଥିତି ସୃଷ୍ଟି ହୋଇଥିବାବେଳେ ସାରଙ୍ଗବାହର ଗାଁରୁ ଲୋକଙ୍କୁ ସ୍ଥାନାନ୍ତରିତ କରାଯାଇଛି । ତଳିଆ ଅଂଚଳ ଲୋକଙ୍କୁ ସ୍ଥାନାନ୍ତର ପାଇଁ ନିର୍ଦ୍ଦେଶ ଦିଆଯାଇଥିବା ବେଳେ ଓଡ୍ରାଫ ଓ ଏନଡିଆରଏଫକୁ ସତର୍କ ରହିବା ପାଇଁ ନିର୍ଦ୍ଦେଶ ଦିଆଯାଇଛି ।