ବିଜେପୁରରେ ବିଜେଡିର ବାଜି ରୀତା ସାହୁ !
କନକ ବ୍ୟୁରୋ : ବିଜେପୁର ବିବାଦରେ ପୂର୍ଣ୍ଣଛେଦ ଟାଣିଲେ ବିଜେଡି ସୁପ୍ରିମୋ । ଦିବଙ୍ଗତ ବିଧାୟକ ସୁବଳ ସାହୁଙ୍କ ପତ୍ନୀ ରୀତା ସାହୁଙ୍କ ନାଁରେ ମୋହର ମାରିଛନ୍ତି ନବୀନ ପଟ୍ଟନାୟକ । ବିଜେପୁର ଉପ-ନିର୍ବାଚନରେ ରିତା ସାହୁଙ୍କୁ ବିଜେଡି, ପ୍ରାର୍ଥୀ କରିବ ବୋଲି ନବୀନ ଘୋଷଣା କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଦୁଇ ଦିନ ତଳେ ବିଜେପୁରର ଦିବଙ୍ଗତ କଂଗ୍ରେସ ବିଧାୟକ ସୁବଳ ସାହୁଙ୍କ ପତ୍ନୀ ରୀତା ବିଜେଡିରେ ଯୋଗ ଦେଇଥିଲେ । ଏହା ପରେ ରୀତା ବିଜେପୁରରୁ ବିଜେଡି ପ୍ରାର୍ଥୀ ହେବା ନେଇ ଚର୍ଚ୍ଚା ଜୋର ଧରିଲା । କିନ୍ତୁ ବରିଷ୍ଠ ନେତା ପ୍ରସନ୍ନ ଆଚାର୍ଯ୍ୟ ସନ୍ଦେହ ଉଠାଇଲେ । ହେଲେ ନବୀନଙ୍କ ଘୋଷଣା ପରେ ବଳଦଯାଇଛି ପ୍ରସନ୍ନଙ୍କ ମତ ।
ରୀତା ସାହୁ । ଦିବଙ୍ଗତ କଂଗ୍ରେସ ବିଧାୟକ ସୁବଳ ସାହୁଙ୍କ ପତ୍ନୀ । ସ୍ୱାମୀଙ୍କ ମୃତ୍ୟୁ ପରେ ପ୍ରଥମ ଥର ପାଇଁ ନିର୍ବାଚନ ଲଢିବାକୁ ଯାଉଥିବା ଏହି ମହିଳା, ଏବେ ବିଜେଡିର ବିଜେପୁର ପ୍ରାର୍ଥୀ । ସେପଟେ କଂଗ୍ରେସ ଛାଡିଥିବା ସୁବଳଙ୍କ ପରିବାରକୁ ସହଜରେ ଗ୍ରହଣ କରି ପାରୁ ନାହାନ୍ତି ବିଜେପୁରର କିଛି ବିଜେଡି ନେତା । ୨୦୦୯ ମସିହାରେ ବିଜେପୁରରୁ ବିଜେଡି ପ୍ରାର୍ଥୀ ହୋଇଥିବା ପ୍ରଭାତ ଆଦିତ୍ୟ ମିଶ୍ର ରୀତାଙ୍କୁ ବିରୋଧ କରି ଦସ୍ତଖତ ଅଭିଯାନ ଆରମ୍ଭ କରିଛନ୍ତି ।
ଦିବଙ୍ଗତ ସୁବଳଙ୍କ ପତ୍ନୀ ଅନୁକମ୍ପା ଭୋଟ ପାଇବେ ବୋଲି ବିଜେଡି ଆଶା କରିଛି । ହେଲେ ଦଳ ଭିତରେ କୁହୁଳୁଥିବା ଅସନ୍ତୋଷ ଦୂର ନ ହେଲେ, ବିଜେପୁରରେ ବିଜେଡି କର୍ମୀଙ୍କ ଭୋଟ ବିଭାଜନର ବି ଭୟ ରହିଛି । ଏସବୁ ଭିତରେ ଉପ-ନିର୍ବାଚନର ବିଜ୍ଞପ୍ତି ପ୍ରକାଶ ପାଇବା ପୂର୍ବରୁ, ଦଳୀୟ କନ୍ଦଳ ଦୂର କରିବା ବିଜେଡି ନେତୃତ୍ୱ ପାଇଁ ବଡ ଚ୍ୟାଲେଞ୍ଜ ।