ପ୍ରଧାନମନ୍ତ୍ରୀଙ୍କୁ ଚିଠି ଲେଖିଲେ ଦୁଇ ଛାତ୍ର ! ୬୯ ବର୍ଷ ପରେ ସ୍କୁଲକୁ ପହଞ୍ଚିଲା ବିଜୁଳୀ
ପ୍ରଧାନମନ୍ତ୍ରୀ ମୋଦି ପ୍ରାୟ ସମୟରେ ସାଧାରଣ ଲୋକଙ୍କ ସମସ୍ୟା ବୁଝିବା ସହ ତା’ର ସମାଧାନ କରୁଥିବାର ଖବର ଗଣମାଧ୍ୟମରେ ପ୍ରକାଶ ପାଉଛି । କେଉଁଠି ପ୍ରଧାନମନ୍ତ୍ରୀଙ୍କୁ ଚିଠି ଦେଇ କିଏ ଝିଅ ବାହାଘର ପାଇଁ ଆର୍ଥିକ ସାହାୟତା ମାଗୁଛି ତ ଆଉ କେଉଁଠି ଚିକିତ୍ସା ପାଇଁ ସାହାଯ୍ୟ ଭିକ୍ଷା କରୁଛି । ନିକଟରେ ମୋଦିଙ୍କ ଅଟୋଗ୍ରାଫ ଯୋଗୁଁ ଜଣେ ଯୁବତୀଙ୍କୁ ଗୋଟିଏ ପରେ ଗୋଟିଏ ବିବାହ ପ୍ରସ୍ତାବ ଆସିଥିବା ଖବର ଶୁଣିବା ପାଇଁ ମିଳିଥିଲା । ତେବେ ଝାଡ଼ଖଣ୍ଡ ପାଲାମମୁର ହୁସୈନାବାଦରେ ଏପରି ଏକ ଘଟଣା ଘଟିଛି । ମନ କି ବାତ୍ ଶୁଣି ଦୁଇ ଜଣ ଛାତ୍ର ସ୍କୁଲରେ ବିଜୁଳି ସଂଯୋଗ ନଥିବା ନେଇ ପିଏମଓଙ୍କୁ ଚିଠି ଲେଖି ଜଣାଇଥିଲେ । ତେବେ ଛାତ୍ରଙ୍କ ଚିଠି ପଢ଼ି ୬୯ ବର୍ଷ ପରେ ସ୍କୁଲକୁ ବିଜୁଳି ପହଞ୍ଚି ଯାଇଥିଲା । ଏହା ପୂର୍ବରୁ ସ୍କୁଲ ପ୍ରିନସିପାଲଙ୍କ ସମସ୍ତ ଅଭିଯୋଗ ବିଫଳ ହୋଇଥିଲା ।
Kanak News is now on WhatsApp
Join and get latest news updates delivered to you via WhatsApp
ପ୍ରକୃତକଥା ହେଲା ମୋଦିଙ୍କ କାର୍ଯ୍ୟକ୍ରମ ‘ମନ କି ବାତ୍’ କାର୍ଯ୍ୟକ୍ରମ ଶୁଣି ଝାଡ଼ଖଣ୍ଡ ରାଜକୀୟକୃତ ଉଚ୍ଚ ବିଦ୍ୟାଳୟର ଦୁଇ ଛାତ୍ର ପ୍ରମୋଦ କୁମାର ଓ ଆମୋଦ କୁମାର ସ୍କୁଲରେ ବିଜୁଳୀ ସଂଯୋଗ ନଥିବା ନେଇ ଚିଠି ଲେଖିଥିଲେ । ତେବେ ଆଶ୍ଚର୍ଯ୍ୟର କଥା ଛାତ୍ରଙ୍କ ଚିଠି ପାଇବା ପରେ ତୁରନ୍ତ ପିଏମଓରୁ ଉତ୍ତର ମିଳିଥିଲା । ଆଉ ଏହାପରେ ଜିଲ୍ଲା ପ୍ରଶାସନ ତତ୍ପର ହୋଇଉଠିଥିଲା । ତୁରନ୍ତ ସ୍କୁଲରେ ଟ୍ରାନ୍ସଫରମର ଲଗାଇ ବିଜୁଳୀ ସଂଯୋଗ କରାଯାଇଥିଲା । ସ୍କୁଲର ପ୍ରିନସିପାଲଙ୍କ କହିବା ଅନୁସାରେ ପୂର୍ବରୁ ଏନେଇ ଅନେକ ଅଭିଯୋଗ କରିଥିଲେ ମଧ୍ୟ କୌଣସି ପଦକ୍ଷେପ ନିଆଯାଇନଥିଲା । କିନ୍ତୁ ଦୁଇ ଛାତ୍ରଙ୍କ ପ୍ରୟାସ ଯୋଗୁଁ ଏବେ ସ୍କୁଲରେ ବିଜୁଳୀ ସଂଯୋଗ ହୋଇପାରିଛି ।
ବିଜୁଳି ନଥିବା ଯୋଗୁଁ ସ୍କୁଲରେ କମ୍ପ୍ୟୁଟର ଶିକ୍ଷା ଦିଆଯାଇପାରୁନଥିଲା । ଛାତ୍ର ଓ ଶିକ୍ଷକ/ଶିକ୍ଷୟତ୍ରୀମାନେ ଅନ୍ୟ ଅସୁବିଧା ମଧ୍ୟ ଭୋଗୁଥିଲେ । ବିଗତ ଦୁଇ ଦଶକ ଧରି ସ୍କୁଲରେ ବିଜୁଳୀ ସଂଯୋଗ ପାଇଁ ଦାବି କରାଯାଉଥିଲା । ଜନପ୍ରତିନିଧିଙ୍କ ଠାରୁ ଆରମ୍ଭ କରି ଅଧିକାରୀଙ୍କ ଅସୁବିଧା ନେଇ ଅବଗତ କରାଯାଇଥିଲା । କିନ୍ତୁ କୌଣସି ଲାଭ ମିଳୁନଥିଲା । ଏବେ ଛାତ୍ରଙ୍କ ଏକ ଚିଠି ସ୍କୁଲକୁ ଆଲୋକିତ କରିଛି । ସୂଚନା ଅନୁସାରେ ୧୯୪୯ରେ ରାଜକୀୟକୃତ ଉଚ୍ଚ ବିଦ୍ୟାଳୟ ହେଇଦରନଗର ସ୍ଥାପନ ହୋଇଥିଲା । ଆଉ ସେବେଠାରୁ ସ୍କୁଲକୁ ବିଜୁଳୀ ନଥିଲା ।