ଏଣିକି ସ୍କୁଲରେ ପିଲାମାନେ ଶୁଣିବେ ବୁଢୀ ଆଈ ମା’ କାହାଣୀ ! ସ୍କୁଲରେ ହେବ ସାଧୁ ସନ୍ଥ ପ୍ରବଚନ କାର୍ଯ୍ୟକ୍ରମ ।
ଛୋଟ ଛୋଟ ପିଲାମାନଙ୍କୁ ସଂସ୍କାର ଦେବା ପାଇଁ ଏଣିକି ସ୍କୁଲଗୁଡିକୁ ବୁଢୀ ଆଇ ମା’ ମାନଙ୍କୁ ଡକାଯିବ । ଏବଂ ସାଧୁ ସନ୍ଥ ପ୍ରବଚନ ମଧ୍ୟ ଶୁଣାଯିବ । ପ୍ରଥମ କରି ରାଜସ୍ଥାନରେ ଏହି ବ୍ୟବସ୍ଥା ଆସନ୍ତା ଜୁଲାଇ ମାସରୁ ଆରମ୍ଭ ହେବ । ରାଜସ୍ଥାନର ମାଧ୍ୟମିକ ଶିକ୍ଷା ନିର୍ଦ୍ଦେଶାଳୟ ପ୍ରତି ଶିକ୍ଷାବର୍ଷରେ ହେଉଥିବା ପରିବର୍ତ୍ତନକୁ ନେଇ କ୍ୟାଲେଣ୍ଡର ଜାରି କରାଯାଇଥାଏ । ଶିବିର ପଂଚାଙ୍ଗ ନାମକ ଏହି କ୍ୟାଲେଣ୍ଡରରେ ପ୍ରତି ମାସ ସ୍କୁଲରେ ହେବାକୁ ଥିବା କାର୍ଯ୍ୟକ୍ରମର ବିବରଣୀ ଦିଆଯାଇଥାଏ । ତେବେ ଏହି କ୍ୟାଲେଣ୍ଡରରେ କୁହାଯାଇଛି ଯେ, ପ୍ରତି ମାସର ପ୍ରଥମ ଶନିବାର ଦିନ କୌଣସି ମହାପୁରୁଷଙ୍କ ଜୀବନ ବିଷୟରେ ପିଲାମାନଙ୍କୁ ଶିକ୍ଷିତ କରାଯିବ ।
Kanak News is now on WhatsApp
Join and get latest news updates delivered to you via WhatsApp
ସେହିପରି ପ୍ରତି ମାସର ଦ୍ୱିତୀୟ ଶନିବାର ପିଲାମାନଙ୍କୁ ଶିକ୍ଷଣୀୟ କାହାଣୀ ଶୁଣାଯିବା ନେଇ ଏକ ସଂସ୍କାର ସଭା ଆୟୋଜନ ହେବ । ଏହି ସଭାରେ ପିଲାମାନଙ୍କର ବୁଢୀ ମା କିମ୍ବା ଆଈ ମା ମାନଙ୍କୁ ଡକାଯିବ । ଏବଂ ସେମାନେ ପିଲାମାନଙ୍କୁ ପରମ୍ପରାଗତ କାହାଣୀ ଶୁଣାଇବେ । ସେହିପରି ତୃତୀୟ ଶନିବାର ଦିନ ସ୍କୁଲରେ ସାମୟିକ ବିଷୟର ସମୀକ୍ଷା କିମ୍ବା କୌଣସି ମହାପୁରୁଷ ଏବଂ ସ୍ଥାନୀୟ ସନ୍ଥମାନଙ୍କର ପ୍ରବଚନ କରାଯିବ । ଏବଂ ଶେଷ ଶନିବାର ଦିନ ସ୍କୁଲରେ ମହାକାବ୍ୟ ଉପରେ ପ୍ରଶ୍ନ ଉତ୍ତର କାର୍ଯ୍ୟକ୍ରମର ଆୟୋଜନ କରାଯିବ । ଏହା ସହ ପିଲାମାନଙ୍କ ମଧ୍ୟରେ ଦେଶ ଭକ୍ତି ସଙ୍ଗୀତକୁ ନେଇ ପ୍ରତିଯୋଗିତାର ଆୟୋଜନ କରାଯିବ ।
ଏହି କାର୍ଯ୍ୟକ୍ରମ ରାଜସ୍ଥାନର ସମସ୍ତ ସରକାରୀ ସ୍କୁଲ ଠାରୁ ଆରମ୍ଭ କରି ବେସରକାରୀ, ସିବିଏସଇ ସମ୍ବନ୍ଧୀୟ ସ୍କୁଲ, ଅନାଥ ପିଲାମାନଙ୍କ ପାଇଁ ଚାଲିଥିବା ଆବାସିକ ବିଦ୍ୟାଳୟ, ଶିକ୍ଷକ ପ୍ରଶିକ୍ଷଣ ବିଦ୍ୟାଳୟ ଗୁଡିକରେ ବାଧ୍ୟତାମୂଳକ ଭାବେ ଲାଗୁ କରାଯିବ । ରାଜସ୍ଥାନରେ ଶିକ୍ଷା ବିଭାଗ ପ୍ରଥମରୁ ହିଁ ପାଠ୍ୟକ୍ରମରେ ପରିବର୍ତ୍ତନ, ସୂର୍ଯ୍ୟ ନମସ୍କାରକୁ ଅନିର୍ବାଯ୍ୟ ଏବଂ ଅନ୍ୟ କିଛି ମାମଲାକୁ ନେଇ ବିବାଦ ଘେରରେ ରହିଛି । ତେବେ ଏହି ନୂଆ ନିଷ୍ପତ୍ତି ପରେ ଏବେ ଏହାକୁ ନେଇ ବିବାଦ ହେବା ସୁନିଶ୍ଚିତ ବୋଲି ଚର୍ଚ୍ଚା ଜୋର ଧରିଛି ।