କନକ ବ୍ୟୁରୋ : କଲେଜରେ ଭଲ ପାଠ ପଢ଼ୁଥିବା ପିଲାଙ୍କ ବୃତ୍ତି ଟଙ୍କାକୁ ଦଲାଲ ଓ ଅସାଧୁ କର୍ମଚାରୀମାନେ କିଭଳି ହଡ଼ପ କରିଛନ୍ତି ତାର ପ୍ରମାଣ ମିଳିଛି ଅଡିଟ୍ ରିପୋର୍ଟରୁ । ଉଚ୍ଚଶିକ୍ଷା ବିଭାଗ ସଚିବଙ୍କ ମୌଖିକ ନିର୍ଦ୍ଦେଶରେ ଅର୍ଥାତ୍ କୌଣସି ଲିଖିତ ନିର୍ଦ୍ଦେଶ ନଦେଇ କଥା କଥାରେ ବାଂଟି ଦେଇଛନ୍ତି କୋଟି କୋଟି ଟଙ୍କା । ଗୁରୁତ୍ୱପୂର୍ଣ୍ଣ କଥା ହେଲା- ମେଧାବୀ ଛାତ୍ରଛାତ୍ରୀଙ୍କ ସ୍ଥାନରେ ଅନେକ ଅଯୋଗ୍ୟ ପିଲାଙ୍କୁ ଦିଆଯାଇଛି ମେଧାବୃତ୍ତି । ଅଡିଟ୍ ରିପୋର୍ଟରୁ ଏହା ଧରାପଡ଼ିବା ପରେ କାଠଗଡ଼ାକୁ ଆସିଯାଇଛନ୍ତି ଉଚ୍ଚଶିକ୍ଷା ବିଭାଗର ତତ୍କାଳୀନ ପ୍ରମୁଖ ଶାସନ ସଚିବ ଗଗନ କୁମାର ଧଳ ।
Kanak News is now on WhatsApp
Join and get latest news updates delivered to you via WhatsApp
ଅଡିଟ୍ ରିପୋର୍ଟ କହୁଛି, ଉଚ୍ଚଶିକ୍ଷା ବିଭାଗର ତତ୍କାଳୀନ ପ୍ରମୁଖ ସଚିବ ତଥା ଆଇଏଏସ୍ ଅଫିସର ଗଗନ କୁମାର ଧଳ ଓ ସ୍ୱତନ୍ତ୍ର ସଚିବଙ୍କ କୌଣସି ଲିଖିତ ନିର୍ଦ୍ଦେଶନାମା ନଦେଇ ଆବଶ୍ୟକ ପ୍ରମାଣପତ୍ର ନଥିବା ୭,୧୧୨ ଛାତ୍ରଛାତ୍ରୀଙ୍କୁ ମେଧାବୃତ୍ତି ବଂଟନ କରିବାକୁ ନିର୍ଦ୍ଦେଶ ଦେଇଥିଲେ । ୨୦୧୪-୧୫ ମସିହାରେ ଦିଆଯାଇଥିବା ବୃତ୍ତି ରାଶିରୁ କଲେଜରେ ପରୀକ୍ଷା ଦେବାର ପ୍ରମାଣପତ୍ର ନଥାଇ କେବଳ ଗୋଟିଏ ବିଲ୍ ଜରିଆରେ ୮୧୮ଜଣ ପିଲାଙ୍କୁ ୧୦ ହଜାର ଟଙ୍କା ଲେଖାଏଁ ମେଧାବୃତ୍ତି ବଂଟନ କରାଯାଇଛି ।
ଅଡିଟ୍ ଦର୍ଶାଇଛି, ଶତାଧିକ ଅଯୋଗ୍ୟ ଛାତ୍ରଙ୍କୁ ମେଧାବୃତ୍ତି ବଂଟନ ଯୋଗୁଁ ୧ କୋଟି ୬୯ ଲକ୍ଷ ଟଙ୍କାର ଅନିୟମିତତା ହୋଇଛି ଓ ଏଥିରୁ ୯୨ ଲକ୍ଷ ୫୦ ହଜାର ଟଙ୍କା ଅସୁଲ କରାଯାଉ । ଘୋଟାଲାର ତଦନ୍ତ ପାଇଁ ଦୁଇ ବର୍ଷ ତଳୁ କ୍ରାଇମ୍ ବ୍ରାଂଚକୁ ନିର୍ଦ୍ଦେଶ ଦିଆଯାଇଥିଲେ ସୁଦ୍ଧା କୌଣସି ଅଫିସରଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନାହିଁ । ସେପଟେ ଏବିଷୟରେ ପ୍ରଶ୍ନ କରାଯିବାରୁ ଅଜବ ଯୁକ୍ତି ବାଢ଼ିଛନ୍ତି ବର୍ତ୍ତମାନର ଉଚ୍ଚଶିକ୍ଷା ମନ୍ତ୍ରୀ ।
ମେଧାବୃତ୍ତିରେ ଘୋଟାଲା- “ମେଧାବୀଙ୍କୁ ଠକିଲେ ସରକାର’’ ଶୀର୍ଷକରେ କନକନ୍ୟୁଜ୍ ପକ୍ଷରୁ ପୂର୍ବରୁ ମଧ୍ୟ ରିପୋର୍ଟ ପ୍ରକାଶ ପାଇଛି । ଗୋଟିଏ ଗୋଟିଏ ବିଲରୁ କୋଟି ଟଙ୍କାର ଦୁର୍ନୀତିର ଗନ୍ଧ ଆସୁଥିବା ବେଳେ ୪ ବର୍ଷରେ ପ୍ରାୟ ୫୦ କୋଟି ଟଙ୍କାରୁ ଅଧିକ ଟଙ୍କାର ସ୍କାମ୍ ହୋଇଥିବା ସନ୍ଦେହ ହେଉଛି ।