‘ ମୁଁ ମରିଯାଇଛି’ ଆତ୍ମହତ୍ୟା ପୂର୍ବରୁ ଫେସବୁକ ପୋଷ୍ଟ ! ବ୍ଲୁ ହ୍ୱେଲ ଗେମ ପ୍ରଭାବରେ ଆତ୍ମହତ୍ୟା ଆଶଙ୍କା
କନକ ବ୍ୟୁରୋ : କିଛି ଦିନର ନିରବତା ପରେ ପୁଣି ଫେରିଲା ବ୍ଲୁ ହ୍ୱେଲ ଆତଙ୍କ ।କେନ୍ଦ୍ରାପଡା ଅର୍ନ୍ତଗତ ମାର୍ଶାଘାଇ ବ୍ଲକରେ ଗତକାଲି କେଶବ ମଲିକ ନାମକ ଜଣେ ଛାତ୍ର ଲୁଣା ନଦୀକୁ ଡେଇଁ ଆତ୍ମହତ୍ୟା କରିଛନ୍ତି । ଆତ୍ମହତ୍ୟାର ପ୍ରକୃତ କାରଣ ଜଣା ପଡିନଥିଲେ ମଧ୍ୟ ବ୍ଲୁ ହ୍ୱେଲ ଗେମ ଯୋଗୁଁ ସେ ଆତ୍ମହତ୍ୟା କରିଥିବା ସନ୍ଦେହ କରାଯାଉଛି । କାରଣ ଆତ୍ମହତ୍ୟା କରିବା ପୂର୍ବରୁ ସେ ଫେସବୁକ ଆକାଉଣ୍ଟରେ ନିଜ ମୃତ୍ୟୁ ବିଷୟରେ ଉଲ୍ଲେଖ କରିଛନ୍ତି । ସେ ନିଜ ଫେସବୁକ ଆକାଉଣ୍ଟରେ ‘ମୁଁ ମରିଯାଇଛି’ ବୋଲି ଏକ ଷ୍ଟାଟସ ଲେଖି ପୋଷ୍ଟ କରିଥିଲେ । ବ୍ଲୁ ହ୍ୱେଲ ଗେମ ପ୍ରଭାବରେ କେଶବ ଏଭଳି ନିଷ୍ୱତି ନେଇଥିବା ଆଶଙ୍କା କରାଯାଉଛି । ପୁଲିସ ଏ ଦିଗରେ ଅଧିକ ତଦନ୍ତ ଜାରି ରଖିଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, ପାରାଚକ ଗ୍ରାମର କେଶବ ମଲିକ ସବୁଦିନ ପରି ଗତକାଲି ମଧ୍ୟ ଫୁଲ ତୋଳିବାକୁ କହି ଘରୁ ବାହାରି ଯାଇଥିଲେ । କିନ୍ତୁ ଆଉ ଘରକୁ ଫେରି ନଥିଲେ ।ଫୁଲ ତୋଳିବାକୁ କହି ଘରୁ ଆସିଥିବା କେଶବ ବସପୁର ନିକଟରେ ଥିବା ଲୁଣା ନଦୀକୁ ଡେଇଁ ପଡିଥିଲେ । ତେବେ ସ୍ଥାନୀୟ ଲୋକ ଏନେଇ ଅଗ୍ନିଶମ ବିଭାଗକୁ ଖବର ଦେବା ପରେ ଘଟଣା ସ୍ଥଳରେ ଅଗ୍ନିଶମ ବିଭାଗ କର୍ମଚାରୀ ପହଞ୍ଚି ଦିନ ୨ଟା ବେଳକୁ ମୃତଦେହ ଉଦ୍ଧାର କରିଥିଲେ ।
କେଶବ ଆତ୍ମହତ୍ୟା କରିବା ପୂର୍ବଦିନ ବିଳମ୍ବିତ ରାତିରେ ତାଙ୍କ ଫେସବୁକ ଆକାଉଣ୍ଟରେ ‘ମୁଁ ମରିଯାଇଛି’ ବୋଲି ଲେଖି ପୋଷ୍ଟ କରିଥିଲେ । ଏହି ପୋଷ୍ଟକୁ କିଛି ସାଙ୍ଗ ଦେଖିଥିଲେ ମଧ୍ୟ ଏତେଟା ଗୁରୁତ୍ୱ ଦେଇନଥିଲେ । ଏହା ପୂର୍ବରୁ କିଛି ମାସ ତଳେ କେଶବ ନିଜ ହାତକୁ ମଧ୍ୟ କାଟିଥିବା ଜଣା ପଡିଛି । ଏସବୁ ଘଟଣାରୁ କେଶବ ବ୍ଲୁ ହ୍ୱେଲ ଗେମ ଖେଳୁଥିବା ଅନୁମାନ କରାଯାଉଛି ।