ପୋଲିସ ଡିଜିରୁ ପରିବହନ ସିଏମଡି ! ସରକାରଙ୍କ କଳାପାଣି ସଜାର କାହାଣୀ
କନକ ନ୍ୟୁଜ୍ : କେବି ସିଂଙ୍କୁ ପୋଲିସ ଡିଜି ପଦରୁ ହଟାଇ ଓଏସଆରଟିସିର ସିଏମଡି ଭାବେ ଦାୟିତ୍ୱ ଦିଆଯାଇଛି । ଯାହା ଓଡିଶା କ୍ଷେତ୍ରରେ କିଛି ନୂଆ ନୁହେଁ । କାରଣ ପୂର୍ବରୁ ମଧ୍ୟ ଅନେକଥର ଓଡିଶା ପୋଲିସର ସର୍ବୋଚ୍ଚ ପଦବୀରୁ ହଟାଇ ଅଫିସରମାନଙ୍କୁ ଦିଆଯାଇଛି ଓଏସଆରଟିସିର ଦାୟିତ୍ୱ । ଯାହାକୁ କଳାପାଣି ସଜା ବୋଲି ମଧ୍ୟ କୁହାଯାଏ । କାରଣ ରାଜ୍ୟର ଆଇନ ଶୃଙ୍ଖଳା ତଦାରଖ କରୁଥିବା ଜଣେ ଆଇପିଏସ ଅଧାକାରୀଙ୍କ ପାଇଁ ପରିବହନ ବିଭାଗ କଥା ବୁଝିବା ଓ ଏହାର ଉନ୍ନତି ପାଇଁ ଯୋଜନା ପ୍ରସ୍ତୁତ କରିବା ଭିତରେ ଏକ ବିରାଟ ଅନ୍ତର ରହିଛି ।
Kanak News is now on WhatsApp
Join and get latest news updates delivered to you via WhatsApp
ପ୍ରକାଶ ମିଶ୍ର
୨୦୧୪ରେ ପୋଲିସ ଡିଜି ପ୍ରକାଶ ମିଶ୍ରଙ୍କୁ ତାଙ୍କ କାର୍ଯ୍ୟକାଳ ସରିବା ଆଗରୁ ହଟାଇ ଦେଇଥିଲେ ସରକାର । କୁହାଯାଉଛି ସାଧାରଣ ନିର୍ବାଚନ ସମୟରେ ବିଜେଡି ପ୍ରଚାର ଗାଡିରୁ ଟଙ୍କା ଜବତ କରିଥିବାରୁ ତାଙ୍କ ବିରୋଧରେ ଏପରି ପଦକ୍ଷେପ ନିଆଯାଇଥିଲା । ତାଙ୍କ ସ୍ଥାନରେ ସଂଜୀବ ମାରିଙ୍କୁ ମିଳିଲା ନୂଆ ଡିଜିପି ଦାୟିତ୍ୱ ।
ସଂଜୀବ ମାରିକ
ତେବେ ୨୦୧୫ ମସିହାରେ ତକ୍ରାଳୀନ ପୋଲିସ ମହାନିର୍ଦ୍ଦେଶକ ସଂଜୀବ ମାରିକଙ୍କୁ ମଧ୍ୟ ଲମ୍ବା ଛୁଟିରେ ପଠାଇ ଦିଆଯାଇ ତାଙ୍କ ସ୍ଥାନରେ କେବି ସିଂଙ୍କୁ ଅବସ୍ଥାପିତ କରାଯାଇଥିଲା । ମାରିକଙ୍କ ବିରୋଧରେ ଡିଏସପି ଓ ଏସିପି ବଦଳିରେ ଅନିୟମିତତା ହୋଇଥିବା ଦର୍ଶାଇ ତାଙ୍କ ବିରୋଧରେ ସରକାର କଡା ଆଭିମୁଖ୍ୟ ଦେଖାଇଥିବା ଚର୍ଚ୍ଚା ହୁଏ । ତେବେ ତାଙ୍କୁ ମଧ୍ୟ ବଦଳି କରାଯାଇଥିଲା ଓସଆରଟିସିର ସିଏମଡି ଭାବରେ ।
ବିନୟ ବେହେରା
ବରିଷ୍ଠ ଆଇପିଏସ ଅଫିସର ବିନୟ କୁମାର ବେହେରାଙ୍କୁ ଓଏସଆରଟିସିରୁ ଆଣି କମିଶନରେଟ ପୋଲିସର ଦାୟିତ୍ୱ ଦିଆଯାଇଥିଲା । ତେବେ ବିରଂଚି ଦାସ ହତ୍ୟାକାଣ୍ଡ ପରେ ଯେଉଁ ପରିସ୍ଥିତି ସୃଷ୍ଟି ହେଲା ତାକୁ ସଠିକ ଭାବେ ପରିଚାଳନା କରିନପାରିବାରୁ ତାଙ୍କୁ ପୁଣି ଓଏସଆରଟିସିକୁ ପଠାଇ ଦିଆଯାଇଥିବା ଚର୍ଚ୍ଚା ହୁଏ ।
କେବି ସିଂ
ଏବେ ପୁଣି ପାଳି ପଡିଛି କେବି ସିଂଙ୍କର । କୌଣସି କାରଣରୁ ସରକାର ତାଙ୍କ ଉପରେ ଅସନ୍ତୁଷ୍ଟ ହୋଇ ତାଙ୍କୁ ମଧ୍ୟ ସେହି ଓସଆରଟିସିକୁ ପଠାଇ ଦେଇଛନ୍ତି ।
ରାଜ୍ୟର ଆଇନ ଶୃଙ୍ଖଳା ତଦାରଖ କରୁଥିବା ଜଣେ ବରିଷ୍ଠ ଆଇପିଏସ ଅଧିକାରୀଙ୍କୁ ଅଚାନକ ପରିବହନ ବିଭାଗର ଦାୟିତ୍ୱ ଦିଆଯିବା କୌଣସି କଳାପାଣି ସଜାଠାରୁ କମ ନୁହେଁ । କୁହାଯାଉଛି ରାଜନୈତିକ ନିଷ୍ପତିରେ ପରିଚାଳିତ ପୋଲିସ ବିଭାଗର ସର୍ବୋଚ୍ଚ ପଦବୀରେ ବସୁଥିବା ଅଫିସର ବସଙ୍କୁ ଖୁସି କରିନପାରିଲେ ଏଭଳି ଆକ୍ରୋଶର ଶିକାର ହେବାକୁ ପଡେ । ଯାହା ଅନେକଙ୍କ କ୍ଷେତ୍ରରେ ଘଟିଛି ।
ଚର୍ଚ୍ଚା ଏଭଳି ବି ହେଉଛି ଯେ, ପୂର୍ବତନ ପୋଲିସ ଡିଜି ପ୍ରକାଶ ମିଶ୍ରଙ୍କ ବିରୋଧରେ ମିଥ୍ୟା ମାମଲା କରି କେବି ସିଂ ଯେଉଁଭଳି ତାଙ୍କ ପାଇଁ ଖାଲ ଖୋଳିଥିଲେ ଏବେ ସେ ତାର ଫଳ ଭୋଗିଛନ୍ତି । ଆଉ ପୋଲିସ ଡିଜି ପଦରୁ ସିଧାଯାଇ ପହଂଚିଛନ୍ତି ପରିବହନ ବିଭାଗ ଦାୟିତ୍ୱରେ ଯେଉଁ ବିଭାଗରେ ମଧ୍ୟ ରହିଥିଲେ ପ୍ରକାଶ ମିଶ୍ର ।