ରାଜଧାନୀରୁ ଅଢେଇ କୋଟି ଟଙ୍କାର ୨ଟି ଅଷ୍ଟଧାତୁ ମୂର୍ତ୍ତି ଜବତ ! ଅଭିଯୁକ୍ତ ସୟଦ ଜିଲନୁରକୁ ଗିରଫ କଲା କ୍ରାଇମବ୍ରାଞ୍ଚ ଏସଟିଏଫ ।
କନକ ବ୍ୟୁରୋ : ରାଜଧାନୀରୁ ଜବତ ହେଲା ୨ କୋଟି ୫୦ ଲକ୍ଷ ଟଙ୍କାର ଅଷ୍ଟଧାତୁ ମୂର୍ତ୍ତି ! ଭୁବନେଶ୍ୱର ଉପକଣ୍ଠ ଖଣ୍ଡଗିରିର ଯଦୁପୁର ଅଞ୍ଚଳର ଏକ ଘରୁ ଏହି ମୂର୍ତ୍ତି ଜବତ ହୋଇଥିବା ଜଣାପଡିଛି । ସୟଦ ଜିଲନୁର ଓରଫ ରାଜା ବେଆଇନ ଭାବେ ଏହି ମୂର୍ତ୍ତିକୁ ଅନେକ ବର୍ଷ ଧରି ନିଜ ପାଖରେ ରଖିଥିବା ଜଣାପଡିଛି । ତେବେ ଗତକାଲି ରାତିରେ ଗୁଇନ୍ଦା ସୂଚନା ପାଇ କ୍ରାଇମବ୍ରାଞ୍ଚ ଏସଟିଏଫର ଏକ ଟିମ୍ ରାଜାଙ୍କ ଯଦୁପୁର ସ୍ଥିତ ଘରେ ଚଢାଉ କରିଥିଲା । ତେବେ ତାଙ୍କ ଘରୁ ଦୁଇଟି ଦାମୀ ମୂର୍ତ୍ତି ଜବତ ହୋଇଥିବା ଜଣାପଡିଛି । ମୂର୍ତ୍ତି ଦୁଇଟିର ଓଜନ ୧୮.୪୪ କେଜି ଏବଂ ୧୨.୬ କେଜି ହୋଇଥିବା ବେଳେ ଏହାର ମୂଲ୍ୟ ପାଖାପାଖି ୨ କୋଟି ୫୦ ଲକ୍ଷ ଟଙ୍କା ହେବ ବୋଲି ଜଣାପଡିଛି ।
Kanak News is now on WhatsApp
Join and get latest news updates delivered to you via WhatsApp
ଚୋରୀ ହୋଇଥିବା ଅଷ୍ଟଧାତୁ ମୂର୍ତ୍ତି ସଂପର୍କରେ ବିଶ୍ୱସ୍ତ ସୂତ୍ରରୁ ସୂଚନା ମିଳିବା ପରେ କ୍ରାଇମବ୍ରାଞ୍ଚ ଏସ୍ଟିଏଫ୍ର ଡିଏସ୍ପି ପି.ଆର. ଶତପଥୀଙ୍କ ନେତୃତ୍ୱରେ ଯଦୁପୁର ଗାଁର ସୟଦ ଜିଲନୁର ଓରଫ ରାଜା (୪୦)ଙ୍କ ଘରେ ମଙ୍ଗଳବାର ମଧ୍ୟ ରାତ୍ରୀରେ ଚଢ଼ାଉ କରାଯାଇଥିଲା । କୋଟି କୋଟି ଟଙ୍କାରେ ବିକ୍ରି କରିବା ଉଦ୍ଦେଶ୍ୟରେ ଏହି ମୂଲ୍ୟବାନ ମୂର୍ତ୍ତି ଦ୍ୱୟକୁ ମନ୍ଦିରରୁ ଚୋରୀ କରାଯାଇଥିଲା ।
ମୂର୍ତ୍ତିର କୌଣସି କାଗଜପତ୍ର ରାଜା ପାଖରେ ନଥିବା ବେଳେ ତାର କୌଣସି ବନ୍ଧୁ ଏହାକୁ ଦେଇଥିବା ଅଭିଯୁକ୍ତ କହିଛି । ମୂର୍ତ୍ତି ଜବତ ସହ ଅଭିଯୁକ୍ତ ସୟଦ ଜିଲନୁରକୁ ମଧ୍ୟ କ୍ରାଇମବ୍ରାଞ୍ଚ ଗିରଫ କରିଛି । ତେବେ କୋଟି କୋଟି ଟଙ୍କାର ଏହି ମୂର୍ତ୍ତିକୁ ନେପାଳ ଏବଂ ଅନ୍ୟ ରାଜ୍ୟକୁ ଚୋରାଚାଲାଣ କରାଯାଉଥିବା କ୍ରାଇମବ୍ରାଞ୍ଚ ସନ୍ଦେହ କରୁଛି । ଅଭିଯୁକ୍ତଙ୍କ ସହ କେଉଁମାନେ ଏଥିରେ ସମ୍ପୃକ୍ତ ଅଛନ୍ତି, ସେନେଇ ଅଧିକ ଖୋଳତାଡ କରୁଛି କ୍ରାଇମବ୍ରାଞ୍ଚ ।