ଅଗଷ୍ଟ ୨୯ରୁ ରାଜ୍ୟ ଓପନ୍ ସ୍କୁଲ ପରୀକ୍ଷା । ଏଥର ନୂଆ ଢ଼ାଞ୍ଚାରେ ହେବ ପରୀକ୍ଷା, ୱେବସାଇଟରେ ଉପଲବ୍ଧ ହେଲା ଆଡମିଟ୍ କାର୍ଡ ।
କନକ ବ୍ୟୁରୋ: ମାଧ୍ୟମିକ ଶିକ୍ଷା ପରିଷଦ ପକ୍ଷରୁ ୨୦୧୮ମସିହାର ଦ୍ୱିତୀୟ ରାଜ୍ୟ ଓପନ୍ ସ୍କୁଲ ସାର୍ଟିଫିକେଟ୍ ପରୀକ୍ଷା ଅଗଷ୍ଟ ୨୯ରୁ ଆରମ୍ଭ ହୋଇ ସେପ୍ଟେମ୍ବର ୮ତାରିଖରେ ଶେଷ ହେବ। ଓପନ୍ ସ୍କୁଲ ପରୀକ୍ଷା ପାଇଁ ୧୪ ହଜାର ୬୧ଜଣ ପ୍ରାର୍ଥୀଙ୍କ ନାମ ପଞ୍ଜିକରଣ କରିଛନ୍ତି । ଅନ୍ୟପଟେ ରାଜ୍ୟର ୬୪ଟି କେନ୍ଦ୍ରରେ ଏହି ପରୀକ୍ଷା ଅନୁଷ୍ଠିତ ହେବ। ଫର୍ମପୂରଣ କରିଥିବା ପ୍ରାର୍ଥୀଙ୍କ ଆଡ୍ମିଟ କାର୍ଡ ବୋର୍ଡ ୱେବସାଇଟ www.bseodisha.ac.in ରେ ଉପଲବ୍ଧ କରାଯାଇଛି।
Kanak News is now on WhatsApp
Join and get latest news updates delivered to you via WhatsApp
ଷ୍ଟଡି ସେଣ୍ଟର ମୁଖ୍ୟମାନେ ପରୀକ୍ଷାର୍ଥୀଙ୍କ ଆଡ୍ମିଟ୍ କାର୍ଡକୁ ଡାଉନ୍ଲୋଡ୍ କରି ଏଥିରେ ଦସ୍ତଖସ୍ତ କରି ପରୀକ୍ଷାର୍ଥୀଙ୍କୁ ଯୋଗାଇଦେବେ। ବୋର୍ଡ ପକ୍ଷରୁ ଆଡମିଟ କାର୍ଡର ହାର୍ଡକପି ପରୀକ୍ଷା କେନ୍ଦ୍ରକୁ ପଠାଯିବ ନାହିଁ। ଏହି ପରୀକ୍ଷା ନୂଆ ଢ଼ାଞ୍ଚାରେ କରାଯିବ। ଏଥିରେ ଓଏମ୍ଆର୍ ଉତ୍ତର ସିଟ୍ ବ୍ୟବସ୍ଥା ରହିବ ନାହିଁ। ପରୀକ୍ଷାର୍ଥୀମାନେ ପ୍ରଶ୍ନ-ଉତ୍ତର ବୁକ୍ଲେଟ୍ରେ ପରୀକ୍ଷା ଦେବେ।
ସେହିଭଳି ପରବର୍ତ୍ତୀ ସମୟରେ ବି ଏହି ପରୀକ୍ଷାରେ ଆଉ ଓଏମ୍ଆର୍ ବ୍ୟବସ୍ଥା ରହିବ ନାହିଁ ବୋଲି ବୋର୍ଡ ପରୀକ୍ଷା ନିୟନ୍ତ୍ରକ ଡକ୍ଟର ନିହାର ରଞ୍ଜନ ମହାନ୍ତି ସୂଚନା ଦେଇଛନ୍ତି। ଆସନ୍ତା ଓପନ୍ ସ୍କୁଲ ପରୀକ୍ଷା ପାଇଁ ଉପସ୍ଥାନ ସିଟ୍ ଅଗଷ୍ଟ ୨୫ତାରିଖ ସୁଦ୍ଧା ପରୀକ୍ଷା କେନ୍ଦ୍ରକୁ ପଠାଇଦିଆଯିବ ବୋଲି ଡକ୍ଟର ମହାନ୍ତି କହିଛନ୍ତି।