ନୂଆ ଗାଡି କିଣୁଛନ୍ତି କି? ଧ୍ୟାନ ଦିଅନ୍ତୁ, ନଚେତ ୧୦ ହଜାର ଟଙ୍କାର ଜରିମାନା ସହ ୧ ବର୍ଷ ପର୍ଯ୍ୟନ୍ତ ହୋଇପାରେ ଜେଲ୍ ଦଣ୍ଡ ।
କନକ ବ୍ୟୁରୋ : ନୂଆ ମୋଟରଯାନ ଆଇନ୍ ଲାଗୁ ହେବା ପରେ ଗାଡି ଚାଳକଙ୍କ ନିଦ ହଜିଯାଇଛି । ଗାଡିର ବୀମା, କାଗଜପତ୍ର, ଲାଇସେନ୍ସ ଆଦି ପାଖରେ ନରଖି ଗାଡି ଚଳାଇଲେ ଦେବାକୁ ପଡୁଛି ମୋଟା ଅଙ୍କର ଜରିମାନା । ରାଜ୍ୟରେ ଏଭଳି ଅନେକ ଘଟଣା ସାମ୍ନାକୁ ଆସିଲାଣି । କେଉଁଠି ଟ୍ରକ ଉପରେ ୬ ଲକ୍ଷରୁ ଅଧିକ ଟଙ୍କାର ଚାଲାଣ କଟାଯାଇଛି ତ ପୁଣି କେଉଁଠି ବିନା ରେଜିଷ୍ଟ୍ରେସନରେ ସ୍କୁଟି ବିକ୍ରି ପାଇଁ ସୋରୁମ ମାଲିକଙ୍କ ନାଁରେ ୧ ଲକ୍ଷ ଟଙ୍କାର ଚାଲାଣ କଟାଯାଇଛି । ଏପରିକି ଜରିମାନା ଆଦାୟକୁ ନେଇ ଭୁବନେଶ୍ୱରରେ ପୋଲିସ ଓ ପବ୍ଲିକ ମଧ୍ୟରେ ଭୟଙ୍କର ଗଣ୍ଡଗୋଳ ମଧ୍ୟ ଦେଖିବାକୁ ମିଳିଛି । ଆଉ ଏସବୁ ଭିତରେ ଜନସାଧାରଣଙ୍କୁ ବିଭିନ୍ନ ଉପାୟରେ ସଚେତନ କରି ଆସୁଛନ୍ତି ସରକାର । ଖାସକରି ରାଜ୍ୟ ପରିବହନ ଆୟୁକ୍ତ ଏବେ ସୋସିଆଲ ମିଡିଆରେ ଜନସାଧାରଣଙ୍କୁ ସଚେତନ କରିବା ଆରମ୍ଭ କରିଛି ।
Kanak News is now on WhatsApp
Join and get latest news updates delivered to you via WhatsApp
ନୂତନ ଯାନ କ୍ରୟ କରୁଥିବା ବ୍ୟକ୍ତି ଏବଂ ମୋଟରଯାନ ଡିଲରମାନେ ଧ୍ୟାନ ଦିଅନ୍ତୁ। ମୋଟରଯାନ ଆଇନ ୧୯୮୮ ଧାରା ୪୧(୬) ଆଧାରରେ ଡିଲରମାନେ ହାଇ ସିକ୍ୟୁରିଟି ରେଜିଷ୍ଟ୍ରେସନ ପ୍ଲେଟରେ ସ୍ଥାୟୀ ରେଜିଷ୍ଟ୍ରେସନ ନମ୍ବର ଲେଖା ନଥାଇ ଗାଡି ହସ୍ତାନ୍ତର କରିପାରିବେ ନାହିଁ। ଏଥିରେ ଖିଲାପ ହେଲେ ଉଭୟ କ୍ରେତା ଓ ଡିଲର ଆଇନ ଅନୁଯାୟୀ ଦଣ୍ଡିତ ହେବେ। pic.twitter.com/T9p3dHNZsq
— STA Odisha (@STAOdisha) September 21, 2019
ନୂଆ କରି ଗାଡି କିଣୁଥିବା ବ୍ୟକ୍ତିଙ୍କୁ ସଚେତନ କରିବାକୁ ଯାଇ ରାଜ୍ୟ ପରିବହନ ଆୟୁକ୍ତ ଏକ ଟ୍ୱିଟ୍ କରିଛି । ଯେଉଁଥିରେ ସାଧାରଣ ଲୋକ ଓ ଗାଡି ଡିଲରଙ୍କ ପାଇଁ ଅନେକ ଗୁରୁତ୍ୱପୂର୍ଣ୍ଣ ସୂଚନା ଜାରି କରିଛି ବିଭାଗ । ମୋଟରଯାନ ଆଇନ ୧୯୮୮ର ଧାରା ୪୧(୬) ଆଧାରରେ ଡିଲର ମାନେ ହାଇ ସିକ୍ୟୁରିଟି ରେଜିଷ୍ଟ୍ରେସନ ପ୍ଲେଟରେ ସ୍ଥାୟୀ ରେଜିଷ୍ଟ୍ରେସନ ନମ୍ବର ନ ଲେଖି ଗ୍ରାହକଙ୍କୁ ଗାଡି ହସ୍ତାନ୍ତର କରିପାରିବେ ନାହିଁ । ଏହାକୁ ଖିଲାପ କଲେ ଉଭୟ ଗାଡି ମାଲିକ ଓ ଡିଲର ଆଇନ ଅନୁଯାୟୀ ଦଣ୍ଡିତ ହେବେ । ଏପରିକି ସମ୍ପୃକ୍ତ ଡିଲରଙ୍କ ଟ୍ରେଡ ସାର୍ଟିଫିକେଟ ମଧ୍ୟ ରଦ୍ଦ କରାଯିବ ବୋଲି କହିଛି ବିଭାଗ ।ତେଣୁ ନୂତନ ଗାଡି କିଣୁଥିବା ବେଳେ ଅନେକ ଗୁଡିଏ ଦିଗ ଉପରେ ନଜର ଦେବାକୁ କହିଛି ବିଭାଗ । ହାଇ ସିକ୍ୟୁରିଟି ରେଜିଷ୍ଟ୍ରେସନ ପ୍ଲେଟରେ ସ୍ଥାୟୀ ରେଜିଷ୍ଟ୍ରେସନ ନମ୍ବର ନଥିଲେ ଗାଡି ନ କିଣିବାକୁ ପରାମର୍ଶ ଦେଇଛି ପରିବହନ ବିଭାଗ ।
ତେବେ ବିନା ରେଜିଷ୍ଟ୍ରେସନର ଗାଡି ବ୍ୟବହାର କରୁଥିଲେ ଗାଡି ମାଲିକଙ୍କୁ ୧୦ ହଜାର ଟଙ୍କାର ଜରିମାନା ସହ ୧ ବର୍ଷ ପର୍ଯ୍ୟନ୍ତ ଜେଲ ଦଣ୍ଡାଦେଶର ବ୍ୟବସ୍ଥା ରହିଛି । ଏହାପୂର୍ବରୁ ଗତ କିଛି ଦିନ ତଳେ କଟକ ବାରଙ୍ଗରେ ଏକ ବିନା ରେଜିଷ୍ଟ୍ରେସନ ନମ୍ବରର ସ୍କୁଟି ଧରାପଡିଥିଲା । ବିନା ରେଜିଷ୍ଟ୍ରେସନ ନମ୍ବରରେ ସ୍କୁଟି ବିକ୍ରି କରିଥିବାରୁ ଗାଡି ସୋରୁମ ଉପରେ ୧ ଲକ୍ଷ ଟଙ୍କାର ଚାଲାଣ କାଟିଥିଲା ପରିବହନ ବିଭାଗ । ଏପରିକି ତାଙ୍କ ଟ୍ରେଡ ଲାଇସେନ୍ସ ରଦ୍ଦ କରିବାକୁ ମଧ୍ୟ ବିଭାଗ ପକ୍ଷରୁ ନିର୍ଦ୍ଦେଶ ଦିଆଯାଇଛି । ତେଣୁ ବିନା ରେଜିଷ୍ଟ୍ରେସନ ନମ୍ବରରେ ଗାଡି କିଣିବା କିମ୍ବା ବିକ୍ରି ନ କରିବାକୁ ପରାମର୍ଶ ଦେଇଛନ୍ତି ରାଜ୍ୟ ପରିବହନ ଆୟୁକ୍ତ ।