ରୋହିତ-ରାହୁଲଙ୍କ ଶାନଦାର ଶତକ । ଲିଗ୍ ଶେଷରେ ଶ୍ରୀଲଙ୍କା ଶିକାର କଲା ବିରାଟ ବାହିନୀ, ବଡ ବିଜୟ ସହ ପଏଣ୍ଟ ଟେବୁଲ ଶୀର୍ଷରେ ଭାରତ ।
କନକ ବ୍ୟୁରୋ : ଲିଗ ପର୍ଯ୍ୟାୟ ଶେଷରେ ଶ୍ରୀଲଙ୍କା ଶିକାର କଲା ବିରାଟ ବାହିନୀ । ଆଜି ବିଶ୍ୱକପରେ ଖେଳାଯାଉଥିବା ୪୪ତମ ମ୍ୟାଚରେ ଶ୍ରୀଲଙ୍କାକୁ ୭ ୱିକେଟରେ ପରାସ୍ତ କରିଛି ଟିମ୍ ଇଣ୍ଡିଆ । ଏହି ବଡ ବିଜୟ ସହ ବର୍ତ୍ତମାନ ସମୟରେ ପଏଣ୍ଟ ଟେବୁଲର ଶୀର୍ଷରେ ରହିଛି ଭାରତ । ଆଜି ଲିଡସ ଗ୍ରାଉଣ୍ଡରେ ଟସ୍ ଜିତି ପ୍ରଥମେ ବ୍ୟାଟିଂ କରିବାର ନିଷ୍ପତି ନେଇଥିଲେ ସିଂହଳି ଦଳ । ତେବେ ଭାରତୀୟ ବୋଲରଙ୍କୁ ସାମନା କରିପାରିନଥିଲେ ଶ୍ରୀଲଙ୍କାର ଟପ୍ ଅଡର । ମାତ୍ର ୫୫ ରନରେ ୪ଟି ୱିକେଟ୍ ହରାଇବା ପରେ ମାଥ୍ୟୁ ଓ ଥୀରିମାନେ ବ୍ୟାଟିଂ ଭାର ସମ୍ଭାଳି ସ୍କୋର ବୋର୍ଡକୁ ଆଗକୁ ନେଇଥିଲେ । ମାଥ୍ୟୁଙ୍କ ଶତକ ଓ ଥୀରିମାନେଙ୍କ ଅର୍ଦ୍ଧଶତକ ବଳରେ ନିର୍ଦ୍ଧାରିତ ୫୦ ଓଭରରେ ୭ ୱିକେଟ୍ ହରାଇ ୨୬୪ ରନ୍ କରିବାକୁ ସମର୍ଥ ହୋଇଛି ଶ୍ରୀଲଙ୍କା । ଯଶପ୍ରୀତ ବୁମରାଙ୍କୁ ୩ଟି ୱିକେଟ୍ ମିଳିଥିବା ବେଳେ ଭୁବନେଶ୍ୱର କୁମାର, ରବୀନ୍ଦ୍ର ଜାଡେଜା, କୁଳଦୀପ ଯାଦବ ଓ ହାର୍ଦ୍ଧିକ ପାଣ୍ଡ୍ୟା ଗୋଟିଏ ଲେଖାଏଁ ୱିକେଟ୍ ନେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
୨୬୫ ରନର ବିଜୟ ଲକ୍ଷ୍ୟ ରଖି ବ୍ୟାଟିଂ ଆରମ୍ଭ କରିଥିବା ଭାରତୀୟ ଦଳ ପୁଣି ଥରେ ଓପନିଂ ଯୋଡ଼ିରେ ଶତକୀୟ ଭାଗିଦାରୀ କରିବାରେ ସଫଳ ହୋଇଛନ୍ତି । ଅନ୍ୟପଟେ ଭାରତ-ଶ୍ରୀଲଙ୍କା ବିଶ୍ୱକପ୍ ଟକ୍କରରେ ପୁଣିଥରେ ଦେଖିବାକୁ ମିଳିଛି ଓପନର୍ ରୋହିତ ଶର୍ମାଙ୍କ ଧୁଆଁଧାର ବ୍ୟାଟିଂ । ବିଶ୍ୱକପ୍ କ୍ରିକେଟର ଗୋଟିଏ ସିଜିନରେ ସର୍ବାଧିକ ଶତକ ଓ ସର୍ବାଧିକ ରନ୍ ସ୍କୋର କରି ଦୁଇଟି ବିରଳ ରେକର୍ଡର ଅଧିକାରୀ ହୋଇଛନ୍ତି ରୋହିତ ଶର୍ମା । ସେହିପରି ଲୋକେଶ ରାହୁଲ ମଧ୍ୟ ବିଶ୍ୱକପରେ ନିଜର ପ୍ରଥମ ଶତକ ହାସଲ କରିଛନ୍ତି ।