‘ଫୋନି’ ପ୍ରଭାବିତ ଅଞ୍ଚଳରେ ଜଳ ଯୋଗାଣ ନେଇ ଏସଆରସି ଦେଲେ ରିପୋର୍ଟ । କହିଲେ, ୪ଟି ସ୍ଥାନରେ ହୋଇଛି ଶତ ପ୍ରତିଶତ ଜଳ ଯୋଗାଣ ।
କନକ ବ୍ୟୁରୋ: ବାତ୍ୟା ‘ଫୋନି’ ପ୍ରଭାବିତ ୪ ଟି ସ୍ଥାନରେ ଜଳ ଯୋଗାଣ କାର୍ଯ୍ୟ ଶତ ପ୍ରତିଶତ ହୋଇଛି । ଏନେଇ ସ୍ୱତନ୍ତ୍ର ରିଲିଫ୍ କମିଶନର ବିଷ୍ଣୁପଦ ସେଠୀ ସୂଚନା ଦେଇଛନ୍ତି । କହିଛନ୍ତି କି, ବାତ୍ୟାରେ ପ୍ରଭାବିତ ହୋଇଥିବା ପୁରୀ ଜିଲ୍ଲାରେ ଜଳ ଯୋଗାଣ ନେଇ ୨୪ଟି ହେଭି-ଡ୍ୟୁଟି ଡି.ଜି ସେଟ୍ , ୫୪ଟି ପାଣି ଟ୍ୟାଙ୍କର ଏବଂ ୫୪ଟି ପି.ଭି.ସି ଟ୍ୟାଙ୍କ ଜରିଆରେ ପ୍ରଭାବିତ ଲୋକଙ୍କୁ ଜଳ ଯୋଗାଣ ହୋଇଛି । ବାତ୍ୟାର ୭୬ ଘଣ୍ଟା ମଧ୍ୟରେ ଏଭଳି ଏହି ସବୁ ଉପାୟରେ ପ୍ରଭାବିତଙ୍କୁ ଜଳ ଯୋଗାଣ କରାଯାଉଥିଲା ।
Kanak News is now on WhatsApp
Join and get latest news updates delivered to you via WhatsApp
ସେହିପରି କୋଣାର୍କ ଟାଉନ ଅଞ୍ଚଳରେ ୯୯ ଏମଏଲଡି ଜଳ ଆବଶ୍ୟକତା ହେଉଥିବାବେଳେ ରାଜ୍ୟ ସରକାର ୨ଟି ହେଭି ଡ୍ୟୁଟି ଡିଜି ସେଟ୍ , ୭ଟି ପାଣି ଟ୍ୟାଙ୍କର ଏବଂ ୧୫ଟି ପିଭିସି ଟ୍ୟାଙ୍କ ଜରିଆରେ ଲୋକମାନଙ୍କୁ ଜଳ ଯୋଗାଣ ହୋଇଛି । ସେହିଭଳି ନିମାପଡ଼ା ଟାଉନ ଅଞ୍ଚଳରେ ୧.୯୯ ଏମଏଲଡ଼ି ପାଣି ଆବଶ୍ୟକତା ପଡୁଥିବାବେଳେ ରାଜ୍ୟ ସରକାର ୩ଟି ହେଭି ଡ୍ୟୁଟି ଡିଜି ସେଟ୍, ୭ଟି ପାଣି ଟ୍ୟାଙ୍କର ଏବଂ ୫ଟି ପିଭିସି ଟ୍ୟାଙ୍କ ଜରିଆରେ ପ୍ରଭାବିତଙ୍କ ପାଖରେ ପାଣି ଯୋଗାଇ ଦିଆଯାଇଛି ।
ପାଣି ପାଇଁ ଡହଳ ବିକଳ ହେଉଥିବା ଭୁବନେଶ୍ୱର ସହରାଞ୍ଚଳରେ ଜଳ ଯୋଗାଣ ସ୍ୱାଭାବିକ ହୋଇଛି । କାରଣ ଏଠାରେ ୨୨୫ ଏମଏଲଡି ଜଳ ଆବଶ୍ୟକ ହେଉଥିବା ବେଳେ ୨୩୦ ଏମଏଲଡ଼ି ଜଳ ସହରାଞ୍ଚଳର ବସ୍ତି ଗୁଡିକରେ ଯୋଗାଇ ଦିଆଯାଇଛି । ଯେଉଁଥିରେ ୧୦୮ଟି ହେଭି ଡ୍ୟୁଟି ଡିଜି ସେଟ୍, ୧୪୫ଟି ପାଣି ଟ୍ୟାଙ୍କର ଏବଂ ୬୦୦ଟି ପିଭିସି ମାଧ୍ୟବରେ ଏହି ସବୁ ଉପାୟରେ ପ୍ରଭାବିତଙ୍କୁ ଜଳ ଯୋଗାଣ କରାଯାଉଥିଲା । ଯାହାର ସ୍ଥିତି ଏବେ ସ୍ୱାଭାବିକ ହୋଇଥିବା ରାଜ୍ୟ ସରକାର କହିଛନ୍ତି ।