ରାଜ୍ୟସଭାରେ ପାରିତ ହେଲା ଏସପିଜି ସଂଶୋଧନ ବିଲ-୨୦୧୯ । ଶାହା କହିଲେ, ଗାନ୍ଧି ପରିବାରକୁ ଟାର୍ଗେଟ କରି ନିଆଯାଇନାହିଁ ଏଭଳି ନିଷ୍ପତ୍ତି ।
ଲୋକସଭା ପରେ ରାଜ୍ୟସଭାରେ ଗୃହୀତ ହେଲା ଏସପିଜି ସଂଶୋଧନ ବିଲ୍-୨୦୧୯ । ଏହାପୂର୍ବରୁ ୨୭ ନଭେମ୍ବରରେ ଏହି ସଂଶୋଧନ ବିଲ ଲୋକସଭାରେ ପାରିତ ହୋଇଥିଲା । ତେବେ ଏହି ବିଲ୍ ରାଜ୍ୟସଭାରେ ପାରିତ ହେବା ପରେ କଂଗ୍ରେସ ସଦସ୍ୟ ଗୃହତ୍ୟାଗ କରିଥିଲେ । ଗୃହମନ୍ତ୍ରୀଙ୍କ ଉତ୍ତର କଂଗ୍ରେସକୁ ସନ୍ତୁଷ୍ଟ କରି ପାରିନାହିଁ ବୋଲି ଦଳ ପକ୍ଷରୁ କୁହାଯାଇ କକ୍ଷତ୍ୟାଗ କରାଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଏହି ଅବସରରେ ବିତର୍କରେ ଭାଗ ନେଇ ଗୃହମନ୍ତ୍ରୀ ଅମିତ ଶାହା କହିଛନ୍ତି ଯେ ଗାନ୍ଧି ପରିବାରକୁ ଟାର୍ଗେଟକରି ଏହି ସଂଶୋଧନ କରାଯାଇନାହିଁ । ଏସପିଜି ଆଇନରେ ପୂର୍ବରୁ ୪ଟି ସଂଶୋଧନ କରାଯାଇଥିବାବେଳେ ଏହା ହେଉଛି ୫ମ ସଂଶୋଧନ । ପୂର୍ବ ସଂଶୋଧନଗୁଡ଼ିକ କେବଳ ଗୋଟିଏ ପରିବାରକୁ ସୁହାଇବା ଲାଗି କରାଯାଇଥିଲା ବୋଲି ସେ କହିଛନ୍ତି ।
ଗୃହମନ୍ତ୍ରୀ ଅମିତ ଶାହା କହିଛନ୍ତି ଯେ ସ୍ପେଶାଲ ପ୍ରୋଟେକ୍ସନ ଗ୍ରୁପ କେବଳ ପ୍ରଧାନମନ୍ତ୍ରୀ ଓ ତାଙ୍କ ସହିତ ସରକାରୀ ବାସଭବନରେ ରହୁଥିବା ପରିବାରବର୍ଗଙ୍କ ପାଇଁ ଗଠନ କରାଯାଇଥିଲା । ‘ସ୍ପେଶାଲ’ ଅର୍ଥ କେବଳ ପ୍ରଧାନମନ୍ତ୍ରୀଙ୍କୁ ହିଁ ବୁଝାଉଛି ବୋଲି ସେ କହିଛନ୍ତି । କଂଗ୍ରେସ କାହିଁକି କେବଳ ଏସପିଜି ସୁରକ୍ଷା ପାଇଁ ଦାବି କରୁଛି ? ସୁରକ୍ଷାକୁ ଷ୍ଟାଟସ ସିମ୍ବଲ କରିବାକୁ ଦିଆଯିବ ନାହିଁ ବୋଲି ସେ କହିଛନ୍ତି । ଏହାଛଡା ଅମିତ ଶାହା କହିଛନ୍ତି ଗାନ୍ଧୀ ପରିବାର ଠାରୁ ସୁରକ୍ଷା କାଢି ନିଆଯାଇ ନାହିଁ କେବଳ ଏଥିରେ ପରିବର୍ତ୍ତନ କରାଯାଇଛି । ପ୍ରତିରକ୍ଷା ମନ୍ତ୍ରୀ, ଗୃହ ମନ୍ତ୍ରୀ, ଉପରାଷ୍ଟ୍ରପତି ଓ ରାଷ୍ଟ୍ରପତିଙ୍କୁ ଯେଉଁ ସୁରକ୍ଷା ମିଳୁଛି ଗାନ୍ଧୀ ପରିବାରକୁ ମଧ୍ୟ ସେହି ସୁରକ୍ଷା ମିଳୁଛି । କେବଳ ଗାନ୍ଧୀ ପରିବାରର ସୁରକ୍ଷା ନୁହେଁ ୧୩୦ କୋଟି ଭାରତୀୟଙ୍କ ସୁରକ୍ଷା ମୋଦି ସରକାରଙ୍କର ଦାୟିତ୍ୱ ।
କେନ୍ଦ୍ର ସରକାର ଗତ ମାସରେ କଂଗ୍ରେସର ଅନ୍ତରୀଣ ଅଧ୍ୟକ୍ଷା ସୋନିଆ ଗାନ୍ଧି, ରାହୁଲ ଗାନ୍ଧି ଓ ପ୍ରିୟଙ୍କା ଗାନ୍ଧିଙ୍କଠାରୁ ଏସପିଜି ସୁରକ୍ଷା ହଟାଇ ଜେଡ ପ୍ଲସ ସୁରକ୍ଷା ଦେଇଥିଲେ ।