ମଦୁଆ ବାପାର ବ୍ୟବହାରରେ ଅତିଷ୍ଠ ହୋଇ ଶେଷରେ ଆତ୍ମହତ୍ୟା କରିବାକୁ ବାଧ୍ୟ ହୋଇଛି ଜଣେ ମେଧାବୀ ବାଳକ । ଆଉ ମଲା ପରେ ସେ ଲେଖିଯାଇଥିବା ସୁଇସାଇଡ ନୋଟ୍ ଅନ୍ୟଙ୍କ ପାଇଁ ପାଲଟି ଯାଇଛି ଏକ ବହୁତ ବଡ ବାର୍ତ୍ତା । ଏହି ଘଟଣାଟି ଘଟିଛି ତାମିଲନାଡୁର ତିରୁନେଲଭେଲିର ଅଂଚଳରେ । ଏହି ଅଂଚଳରେ ଥିବା ଏକ ପୋଲରୁ ପୁଲିସ ଜଣେ ବାଳକର ମୃତ ଦେହ ଝୁଲନ୍ତା ଅବସ୍ଥାରେ ଉଦ୍ଧାର କରିଥିଲା । ଏଥିସହିତ ମୃତ ଦେହ ନିକଟକୁ ଏକ ସୁଇସାଇଡ ନୋଟ୍ ମଧ୍ୟ ପୁଲିସ ଜବତ କରିଥିଲା । ପିଲାଟିର ସୁଇସାଇଡ୍ ନୋଟଟିକୁ ପଢିବା ପରେ ପୁଲିସ ହତବାକ୍ ହୋଇପଡିଥିଲା । କାରଣ ପିଲାଟିର ମୃତ୍ୟୁର କାରଣ ଅନ୍ୟ କୌଣସି ମାମଲା ନଥିଲା ବରଂ ପିଲାଟି ନିଜର ମଦ୍ୟପ ବାପାର ବ୍ୟବହାରରେ ଅତିଷ୍ଟ ହୋଇ ଏଭଳି ଏକ ଚରମ ନିଷ୍ପତି ନେଇଥିଲା ।
Kanak News is now on WhatsApp
Join and get latest news updates delivered to you via WhatsApp
ପିଲାଟିର ମୃତଦେହ ନିକଟରୁ ଜବତ ହୋଇଥିବା ସୁଇସାଇଡ୍ ନୋଟରେ ଲେଖାଥିଲା କି, “ବାପା, ମୁଁ ଦିନେସ ଏହି ଚିଠିଟିକୁ ଲେଖୁଛି । ମୁଁ ମରିବା ପରେ ତୁମେ ମୋ ଚିତାରେ ମୁଖାଗ୍ନି ଦେବନାହିଁ । କାରଣ ତୁମେ ସବୁବେଳେ ମଦ ପିଉଛ । ତୁମେ ମୋ ପାଇଁ ନଣ୍ଡା ମଧ୍ୟ ହେବନି , ମୋର କ୍ରିୟାକର୍ମରେ ବି କରିବନି । କାରଣ ଏହା ମୋର ଶେଷ ଇଚ୍ଛା । ତୁମେ ମଦ ପିଇବା ବନ୍ଦ କଲେ ଯାଇ ମୋ ଆତ୍ମାକୁ ଶାନ୍ତି ମିଳିବ । ଏବେ ଦେଖିବା ସରକାର ମଦ କାରବାର ଉପରେ ରୋକ ଲଗାଉଛନ୍ତି କି ନାହିଁ । ଯଦି ସରକାର ଏପରି ନକରନ୍ତି ତେବେ ମୋର ଆତ୍ମା ବାରମ୍ବାର ଆସି ଏଭଳି କହୁଥିବ ।”
ଏଠାରେ ଆମେ କହି ରଖୁଛୁ କି, ଦିନେସ ଜଣେ ମେଧାବୀ ଛାତ୍ର । ଦଶମ ଶ୍ରେଣୀ ପାସ୍ କରିବା ପରେ ସେ ନିଟ୍ ପାଇଁ ପ୍ରସ୍ତୁତ ହେଉଥିଲେ । ଦିନେସଙ୍କ ମାଆଙ୍କର ୯ ବର୍ଷ ପୂର୍ବରୁ ହିଁ କୌଣସି କାରଣରୁ ମୃତ୍ୟୁ ହୋଇଯାଇଥିଲା । ଯାହା ପରେ ଦିନେସଙ୍କ ବାପା ଦ୍ୱିତୀୟ ବିବାହ କରିଥିଲେ । ତେବେ ପ୍ରତିଦିନ ଦିନେସଙ୍କ ବାପା ମଦ୍ୟପାନ କରି ଘରକୁ ଫେରିଥିଲେ । ଯାହାକୁ ସେ ବାରମ୍ବାର ବିରୋଧ କରୁଥିଲେ । ଏପରିକି ଏଥିପାଇଁ ଦିନେସଙ୍କୁ ବାପାଙ୍କଠାରୁ ମାଡ ମଧ୍ୟ ଖାଇବାକୁ ପଡିଥିଲା । ତେଣୁ ପ୍ରତିଦିନର ଏହି ସତ୍ୟକୁ ସାମ୍ନା କରିବା ଅପେକ୍ଷା ଦିନେସ୍ ଆତ୍ମହତ୍ୟା ଭଳି କଠୋର ନିଷ୍ପତି ନେବାକୁ ବାଧ୍ୟ ହୋଇଥିଲେ ।