କେଉଁଠି ହୋଇଥିଲା ସାଇ ବାବାଙ୍କ ଜନ୍ମ ? ବ୍ରତଧାରୀ କୁହନ୍ତି ଏହି ବହିରେ ରହିଛି ବାବାଙ୍କ ଜନ୍ମସ୍ଥାନର ଠିକଣା…
କନକ ବ୍ୟୁରୋ: ଶିରିଡି ସାଇ ବାବାଙ୍କ ଜନ୍ମ ସ୍ଥାନକୁ ନେଇ ଉଠିଛି ବିବାଦ । ସାଇ ବାବାଙ୍କ ଜନ୍ମ ମହାରାଷ୍ଟ୍ରର ପାଥରିରେ ବୋଲି ମୁଖ୍ୟମନ୍ତ୍ରୀ ଉଦ୍ଧବ ଠାକରେ କହିବା ପରେ ଏହାକୁ ବିରୋଧ କରୁଛନ୍ତି ଶ୍ରଦ୍ଧାଳୁ ଓ ଶିରିଡି ବାସିନ୍ଦା । ତେବେ ସାଇ ବାବାଙ୍କ ବ୍ରତ ରଖୁଥିବା ଓଡିଶାର ଅନେକ ଭକ୍ତଙ୍କୁ, ସଦଗୁରୁ ଶ୍ରୀ ସାଇନାଥଙ୍କ ଚମକ୍ରାରୀ ତିନି ଗୁରୁବାର ବ୍ରତ ବହି ସମ୍ପର୍କରେ ଜଣା । ବ୍ରତଧାରୀମାନେ ଏହି ବହିକୁ ପଢି ବାବାଙ୍କ ଆରାଧନା କରିଥାନ୍ତି । ଆଉ ଏହି ବହିରେ ସାଇ ବାବାଙ୍କ ଜନ୍ମସ୍ଥାନ ସଂପର୍କରେ ସୂଚନା ରହିଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ବହିରେ ଲେଖା ଯାଇଛି ଶିରିଡି ସାଇ ବାବାଙ୍କ ଜନ୍ମ, ଜାତି, ଧର୍ମ ବିଷୟରେ ଏପର୍ଯ୍ୟନ୍ତ ସମସ୍ତଙ୍କୁ ଅଗୋଚର । ଶ୍ରୀ ଶିରିଡି ସାଇ ବାବା ମହାରାଷ୍ଟ୍ର ପ୍ରଦେଶର ପଥୁରୀ ଅର୍ଥାତ ଉଦ୍ଧବ କହିଥିବା ପାଥରି ଗ୍ରାମରେ ଜନ୍ମଗ୍ରହଣ କରିଥିଲେ ବୋଲି ସମସ୍ତେ ମନେ କରନ୍ତି । କାରଣ ସାଇ ବାବା ଅନେକ ଥର ପଥୁରୀ ଓ ଔରଙ୍ଗାବାଦ ବିଷୟରେ ସେଠାକାର ମୁଖିଆ ଓ ଜଣାଶୁଣା ଲୋକଙ୍କ ସଂପର୍କରେ ପଚାରୁଥିଲେ । ପଥୁରୀ ଗ୍ରାମରୁ ଆସୁଥିବା ଲୋକଙ୍କଠାରୁ ସେଠାକାର ହାଲଚାଲ ଓ ଲୋକଙ୍କ ବିଷୟରେ ଅନୁଧ୍ୟାନ କରୁଥିଲେ ।
ସେହିପରି ଶରଣାନନ୍ଦ ତାଙ୍କ ଲାଇଫ ଅଫ ସାଇ ବାବା ପୁସ୍ତକରେ ବାବାଙ୍କ ଜନ୍ମସ୍ଥାନ ପଥୁରୀ ବୋଲି ଉଲ୍ଲେଖ କରିଥିଲେ । ସେହିପରି ଦାସ ଗୁଣୁ ମଧ୍ୟ ତାଙ୍କ ମରାଠୀ ପୁସ୍ତକରେ ଏ ବିଷୟରେ ବର୍ଣ୍ଣନା କରିଛନ୍ତି । ଯଦିଓ ବାବା କେବେ ତାଙ୍କ ଜନ୍ମ, ଜାତି, ଧର୍ମ କିମ୍ବା ମାତା, ପିତାଙ୍କ ବିଷୟରେ କାହାରିକୁ କିଛି କହିନଥିବା ଲୋକମତ ରହିଛି । ଏବଂ ପଚାରିଲେ ବାବା ସବୁବେଳେ କହୁଥିଲେ ବସୁଧା ମୋର ଜନନୀ ଓ ଆକାଶ ମୋର ପିତା, ଏ ସଂସାର ମୋର ସନ୍ତାନ । କିନ୍ତୁ ଏହି ଆରାଧନା ପୁସ୍ତିକାରେ ବର୍ଣ୍ଣନା ରହିଛି ଯେ, ବାବା ଥରେ କହିଥିଲେ ତାଙ୍କର ଜନ୍ମ ପଥୁରୀ ଗ୍ରାମର ଏକ ବ୍ରାହ୍ମଣ କୂଳରେ ହୋଇଥିଲା ଏବଂ ପରେ ଏକ ମୁସଲମାନ ଫକିରଙ୍କ ଘରେ ଲାଳନ ପାଳନ ହୋଇଥିଲା ।
ଏଭଳି ଦାବିର କୌଣସି ଐତିହାସିକ ପ୍ରମାଣ ରହିଛି କି ନାହିଁ, ତାହା ଆମକୁ ଜଣାନାହିଁ । କିନ୍ତୁ ଏକଥା ସତ ଯେ, ମହାରାଷ୍ଟ୍ର ପରବାଣୀ ଜିଲ୍ଲାର ପଥରିରେ ରହିଛି ଶ୍ରୀ ସାଇ ଜନ୍ମସ୍ଥାନ ମନ୍ଦିର । ୧୯୭୦ରେ ଜଣେ ଗବେଷକ ଦାବି କରିଥିଲେ ଯେ, ସାଇ ବାବାଙ୍କ ଜନ୍ମ ପଥରି ଗ୍ରାମରେ ହୋଇଥିଲା । ଏହାପରେ ପଥରିରେ ତିଆରି ହେଲା ଶ୍ରୀ ସାଇ ସ୍ମାରକ ସମିତି । ସାଇ ବାବାଙ୍କ ଜନ୍ମସ୍ଥାନରେ ଏକ ଜମି କିଣି ୧୯୯୪ରେ ସମିତି ଏହି ମନ୍ଦିର ପ୍ରତିଷ୍ଠା କରିଥିଲା । ୧୯୯୯ରୁ ଏଠାରେ ଲୋକେ ପୂଜାର୍ଚ୍ଚନା ଆରମ୍ଭ କଲେ । ଯାହାର ବିକାଶ ପାଇଁ ଏବେ ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ଉଦ୍ଧବ ଠାକରେ ।