ଭାରତ ହେବ ଇଲେକ୍ଟ୍ରିକ୍ ଗାଡ଼ିର ଦେଶ ! ବନ୍ଦ ହୋଇପାରେ ପେଟ୍ରୋଲ୍, ଡିଜେଲ ଚାଳିତ ଯାନ
ଭାରତରେ ପେଟ୍ରୋଲ୍ ଏବଂ ଡିଜେଲ୍ ଗାଡ଼ିକର ଭବିଷ୍ୟତ ଭଲ ନାହିଁ । ଆଗାମୀ କିଛି ବର୍ଷ ଭିତରେ ଏଭଳି ଗାଡ଼ି ଉତ୍ପାଦନ ବନ୍ଦ ହୋଇଯାଇପାରେ । ରାସ୍ତାରେ କେବଳ ଇଲେକ୍ଟ୍ରିକ୍ ଗାଡ଼ି ଗଡ଼ିବ । ଏବେ ଏହା ସ୍ୱପ୍ନ ଭଳି ଲାଗୁଥାଇପାରେ, ମାତ୍ର ଭବିଷ୍ୟତରେ ତାହା ହିଁ ହେବ । ଭବିଷ୍ୟତରେ ଦେଶରେ ବିଭିନ୍ନ ରାସ୍ତାରେ ଇଲେକ୍ଟ୍ରିକ୍ କାର୍, ବସ୍, ବାଇକ୍, ଟାକ୍ସି ଆଦି ଚାଲୁଥିବାର ଦେଖିବାକୁ ମିଳିବ ।
Kanak News is now on WhatsApp
Join and get latest news updates delivered to you via WhatsApp
ଗତକାଲି କେନ୍ଦ୍ର ସଡ଼କ ପରିବହନ ଏବଂ ରାଜପଥ ମନ୍ତ୍ରୀ ନୀତୀନ ଗଡ଼କରୀ କାର୍ କଂପାନିଗୁଡ଼ିକୁ ଯେଉଁ ଚେତାବନୀ ଦେଇଛନ୍ତି ସେଥିରୁ ଏହା ସ୍ପଷ୍ଟ ଯୋଇଯାଇଛି ଯେ ପେଟ୍ରୋଲ୍ ଏବଂ ଡିଜେଲ୍ ଗାଡ଼ିଗୁଡ଼ିକର କୌଣସି ଭବିଷ୍ୟତ ନାହିଁ ।
ସୂଚନା ମୁତାବକ, ଗତକାଲି ଗାଡ଼ି ନିର୍ମାତାମାନଙ୍କ ସଂଘ ସିଆମ୍ ପକ୍ଷରୁ ଆୟୋଜନ କରାଯାଇଥିବା କାର୍ଯ୍ୟକ୍ରମରେ ଅତିଥି ଭାବେ ଯୋଗ ଦେଇ ଗଡ଼କରୀ କହିଛନ୍ତି ଯେ, ବିକଳ୍ପ ଇନ୍ଧନ ପାଇଁ ଏବେଠାରୁ ପ୍ରସ୍ତୁତ ହୋଇଯାଅ । ତାହା ହିଁ ହେଉଛି ଭବିଷ୍ୟତ । ଆମେ ବିକଳ୍ପ ଇନ୍ଧନ ଆଡ଼କୁ ମୁହାଁଉଛୁ । ତୁମେ ଏହାକୁ ପସନ୍ଦ କର ବା ନକର ତାହା ହିଁ ହେବ ବୋଲି ସେ କହିଛନ୍ତି । ଚେତାବନୀ ଦେଇଛନ୍ତି ଯେ ଯଦି ବିକଳ୍ପ ଇନ୍ଧନ ଉପଯୋଗୀ ଗାଡ଼ି ନ ଆଣିବ ତେବେ ବୁଲଡୋଜର ଚଢ଼ାଇ ଦେବି, ସେତେବେଳେ ମୋତେ କିଛି କହିବ ନାହିଁ ।
ସେ ଏହା ମଧ୍ୟ କହିଛନ୍ତି ଯେ, ବିକଳ୍ପ ଇନ୍ଧନ ଯୋଜନାରେ ଯେଉଁମାନେ ସରକାରଙ୍କୁ ସମର୍ଥନ କରିବେ ସେମାନେ ଲାଭରେ ରହିବେ । ଯେଉଁମାନେ କେବଳ ଟଙ୍କା ରୋଜଗାର କରିବାକୁ ଚାହୁଁଛନ୍ତି ସେମାନେ ସମସ୍ୟାରେ ପଡ଼ିବେ । ସେତେବେଳେ ଆମ ପାଖକୁ ଆସିବ ବହୁତ ପୁରୁଣା ଷ୍ଟକ୍ ରହିଗଲା ବୋଲି ଗୁହାରି କରିବ ନାହିଁ ବୋଲି ଗଡ଼କରୀ ଗାଡ଼ି ନିର୍ମାତାମାନଙ୍କୁ କହିଛନ୍ତି । ଦେଶରେ ପ୍ରଦୂଷଣ କମ୍ କରିବା ଏବଂ ଆମଦାନି ହ୍ରାସ କରିବା ପାଇଁ ସରକାର ଏକ ସ୍ପଷ୍ଟ ନୀତି ଉପରେ କାମ କରୁଛନ୍ତି । ସେ କହିଛନ୍ତି ଯେ, ଇଲେକ୍ଟ୍ରିକ୍ କାର୍ ଉପରେ କ୍ୟାବିନେଟ୍ ନୋଟ୍ ପ୍ରସ୍ତୁତ ହୋଇଗଲାଣି । ଆମେ ଚାର୍ଜିଂ ଷ୍ଟେସନ୍ କଥା ମଧ୍ୟ ବୁଝିବୁ । ଗଡ଼କରୀଙ୍କ ଏହି କଥାରୁ ଏହା ସ୍ପଷ୍ଟ ହେଉଛି ଯେ ଭାରତ ଏବେଠାରୁ ନିଜକୁ ଇଲେକ୍ଟ୍ରିକ୍ ଯାନ ପାଇଁ ପ୍ରସ୍ତୁତ କରିବା ଆରମ୍ଭ କଲାଣି ।
ଗାଡ଼ି ନିର୍ମାତାମାନଙ୍କୁ ଗଡ଼କରୀ କହିଛନ୍ତି ଯେ, ମୁଁ କହିଥିଲି ଗବେଷଣା କର । ପ୍ରଥମେ କହିଥିଲି ଇଲେକ୍ଟ୍ରିକ୍ ଗାଡ଼ି କଥା। ତୁମେମାନେ କହିଲ ବ୍ୟାଟେରିର ଦାମ ବହୁତ ଅଧିକ । ଏବେ ତ ବ୍ୟାଟେରି ଦାମ ୪୦% କମିଗଲାଣି । ଯଦି ତୁମେ ଏବେଠାରୁ ଉତ୍ପାଦନ ଆରମ୍ଭ କରିବା ଉପରେ କାମ କରିବ ତେବେ ଆଗକୁ ଦର ଆହୁରି ଖସିଯିବ । ଅଧିକ ମାତ୍ରାରେ ଉତ୍ପାଦନ ହେଲେ ଦର ନିଶ୍ଚିତ ଖସିବ ବୋଲି ସେ କହିଛନ୍ତି । ବିଶ୍ୱର ଅନେକ ବିକଶିତ ରାଷ୍ଟ୍ରରେ ପେଟ୍ରୋଲ୍ ଏବଂ ଡିଜେଲ୍ ଇଞ୍ଜିନର ଗାଡ଼ି ନିର୍ମାଣ କରିବାକୁ ନିରୁତ୍ସାହିତ କରାଯାଉଛି ।
ଆମେ କେତେ ପ୍ରସ୍ତୁତ
ଦୁଇ ବର୍ଷ ତଳେ ଦେଶରେ ବର୍ଷକୁ ୧୬୦୦୦ଟି ଇଲେକ୍ଟ୍ରିକ୍ ଗାଡ଼ି ବିକ୍ରି ହେଉଥିଲା । ୨୦୧୬-୧୭ରେ ୨୫,୦୦୦ଟି ଇଲେକ୍ଟ୍ରିକ୍ ଗାଡ଼ି ବିକ୍ରି ହୋଇଛି । ଏହାର ଅର୍ଥ ହେଉଛି ଏଭଳି ଗାଡ଼ିର ଗ୍ରହଣୀୟତା ବଢ଼ୁଛି । ଇଲେକ୍ଟ୍ରିକ୍ ଗାଡ଼ି ନିମନ୍ତେ ପରିବେଶ ସୃଷ୍ଟି କରିବା ପାଇଁ ସବୁଠୁ ବଡ଼ ଆବଶ୍ୟକତା ହେଉଛି ଚାର୍ଜିଂ ଷ୍ଟେସନ୍ । ବର୍ତ୍ତମାନ ଦେଶରେ ୨୦୬ଟି ଚାର୍ଜିଂ ଷ୍ଟେସନ୍ ରହିଛି । ତାହା ପୁଣି କିଛି ବଡ଼ ସହର ମଧ୍ୟରେ ସୀମିତ ।
ସୁଯୋଗ ଓ ସମ୍ଭାବନା
ଭାରତରେ ଇଲେକ୍ଟ୍ରିକ୍ ଗାଡ଼ି ପାଇଁ ବିପୁଳ ସୁଯୋଗ ରହିଛି । ନିତି ଆୟୋଗ ସିଇଓ ଅମିତାଭ କାନ୍ତ କହିଛନ୍ତି ଯେ, ୨୦୩୦ ସୁଦ୍ଧା ୭.୩୦ ନିୟୁତ ଇଲେକ୍ଟ୍ରିକ୍ ଗାଡ଼ି ବିକ୍ରି ହେବ ବୋଲି ଆକଳନ କରାଯାଇଛି । ୨୦୪୦ ସୁଦ୍ଧା ଏଭଳି ଗାଡ଼ି ସଂଖ୍ୟା ୩୦.୮୧ ନିୟୁତରେ ପହଞ୍ଚିବ । ଭାରତରେ କାର୍ ମାଲିକଙ୍କ ସଂଖ୍ୟା ବହୁତ କମ୍ । ଆମେରିକାରେ ପ୍ରତି ୧୦୦୦ ଲୋକଙ୍କ ମଧ୍ୟରୁ ୮୦୦ ଲୋକ ହେଉଛନ୍ତି କାର୍ ମାଲିକ । ମାତ୍ର ଭାରତରେ ପ୍ରତି ୧୦୦୦ରେ ମାତ୍ର ୨୦ ଜଣ ହେଉଛନ୍ତି କାର୍ ମାଲିକ । ଭାରତରେ ଚାର୍ଜିଂ ଷ୍ଟେସନ୍ ନିର୍ମାଣ କରିବା ପାଇଁ ଇଣ୍ଡିଆନ୍ ଅଏଲ୍, ଏନଟିପିସି, ପାଓ୍ଵାର ଗ୍ରିଡ୍ କର୍ପୋରେସନ୍ ଏବଂ ରିଲାଏନ୍ସ ଇଣ୍ଡଷ୍ଟ୍ରିଜ୍ ଭଳି ସଂସ୍ଥା ଆଗ୍ରହ ପ୍ରକାଶ କରିଛନ୍ତି । ସେମାନେ ଏ କ୍ଷେତ୍ରରେ ନିବେଶ ପରିମାଣ ବଢ଼ାଇବେ ବୋଲି ସଙ୍କେତ ଦେଇଛନ୍ତି ।