ଭୋକିଲା ମଣିଷର ଭଗବାନ ଶୀତଲ! ନିତି ରାତିରେ ଗରିବ ଲୋକଙ୍କୁ ପରସନ୍ତି ଖାଦ୍ୟ
ବିଚିତ୍ର ଆମର ଏ ଦୁନିଆ । ଏଇଠି କିଛି ଲୋକ ସୁଖ ଆରାମରେ ଦିନ ବିତେଉଥିବା ବେଳେ ଆଉ କିଛି ପେଟ ଚାଖଣ୍ଡକ ପାଇଁ ଭିକ୍ଷା ବୃତ୍ତି କରନ୍ତି । ଭୋକିଲା ପେଟରେ ପାଣି ପିଇ ଶୋଇଯା’ନ୍ତି ନିଦରେ । ନିଦତ ହୁଏନି , କିନ୍ତୁ ସେମାନଙ୍କୁ ନିଦର ବାହାନା କରିବାକୁ ପଡେ । ଆଉ ଗୋଟେ ସକାଳକୁ ଅପେକ୍ଷା କରିବାକୁ ହୁଏ । ସେହି ଭୋକିଲା ମଣିଷର ଦୁଃଖକୁ ଖୁବ୍ ପାଖରୁ ଦେଖନ୍ତି କିଛି ଲୋକ । ନିଜ ପେଟ ଭରିବା ଆଗରୁ , ସେ ଅନ୍ୟର ପେଟକୁ ଦାନା ଦେଇଥାନ୍ତି । ଏମିତି ଜଣେ ମହତ ମଣିଷ ହେଲେ ଗୁଜୁରାଟର ଝିଅ ଶୀତଲ ଶର୍ମା । ବୟସ ମାତ୍ର ୨୦ ବର୍ଷ । କିନ୍ତୁ ଆଜି ସେ ଯେଉଁ କାର୍ଯ୍ୟକରୁଛନ୍ତି , ପାଲଟିଛନ୍ତି ପ୍ରଶଂସାର ପାତ୍ରୀ । ‘ଦ ଲଜିକାଲ୍ ଇଣ୍ଡିଆନ’ ରେ ପ୍ରକାଶିତ ହୋଇଛି ଏହି ଖବର ।
Kanak News is now on WhatsApp
Join and get latest news updates delivered to you via WhatsApp
ରାତିରେ ସମସ୍ତେ ଆରାମରେ ସୁଖ ନିଦ୍ରା ଯିବା ବେଳେ ଶୀତଳ ଏବଂ ତାଙ୍କର ବନ୍ଧୁୁମାନେ ଆରମ୍ଭ କରିଦିଅନ୍ତି ନିଜର ଅଭିଯାନ । ଖାଦ୍ୟ ସଂଗ୍ରହ ପାତ୍ର ଧରି ହାତରେ ଗ୍ଲୋଭସ୍ ପିନ୍ଧି ସେମାନେ ଭୋକିଲା ଲୋକଙ୍କ ପାଖରେ ଖାଦ୍ୟ ପହଁଚାଇବାରେ ଲାଗିପଡନ୍ତି । ବିଭିନ୍ନ ଲୋକଙ୍କ ଘର ,କଂପାନୀ କ୍ୟାଣ୍ଟିନ୍ ତଥା ହୋଟେଲ ଏପରିକି ବାହାଘର ପରି ଉତ୍ସବରେ ବଳିପଡୁଥିବା ଖାଦ୍ୟ ସବୁ ସଂଗ୍ରହ କରି ସହରର ଭୋକିଲା ଲୋକଙ୍କୁ ବାଣ୍ଟି ଚାଲନ୍ତି । ଏହା ଦିନେ କି ଦୁଇ ଦିନର ନୁହେଁ , ଶୀତଲ ଓ ତାଙ୍କର ବନ୍ଧୁମାନେ ଏହା ପ୍ରତିଦିନ କରିଥାନ୍ତି । ଆଉ ଲୋକଙ୍କର କୌଣସି କଥାକୁ ଖାତିର କରନ୍ତି ନାହିଁ । କାହାର ପ୍ରଶ୍ନର ଉତ୍ତର ଦେବାକୁ ମଧ୍ୟ ଅପେକ୍ଷା କରନ୍ତି ନାହିଁ ଶୀତଲ । ସେ ଜାଣନ୍ତି ସେ କଣ କରୁଛନ୍ତି । ଆଉ ସମସ୍ତେ ବି ଆଜି ପାଇଯାଇଛନ୍ତି ରାତିରେ ବନ୍ଧୁମାନଙ୍କ ସହ ଘୁରିବୁଲୁଥିବା ଶୀତଲଙ୍କ ଉଦ୍ଦେଶ୍ୟକୁ ।
ଅହମ୍ମଦାବାଦର ଏସଜି ହାଇୱେ ଶିବରଂଜନୀ , ପଂଜରପୋଲ , ଲାଖୁଡି , ତଲୱଡି , ଅଂଚଳ କ୍ରସ୍ ରୋଡ୍ ଆଦି ଅଂଚଳରେ ୬୦୦ରୁ ଅଧିକ ଲୋକଙ୍କୁ ଶୀତଲ ଖାଦ୍ୟ ବାଣ୍ଟିଥାନ୍ତି । ସେମାନେ ପ୍ରାୟତଃ ରେସ୍ତୋରାଁ ଏବଂ ହୋଟେଲରୁ ବଳକା ଖାଦ୍ୟ ସଂଗ୍ରହ କରନ୍ତି । କଲେଜରେ ପଢୁଥିବା ଶୀତଲ ଦିନରେ ନିଜର କାମଧନ୍ଦା କରିବା ଏବଂ ପାଠପଢା ସହ ରାତିରେ ଏଭଳି କାମରେ ଲାଗିଥାନ୍ତି । ‘ଫିଡିଙ୍ଗ ଇଣ୍ଡିଆ’ ସଂଗଠନ ସହ ସେ ଜଡିତ । ଏହି ସଂସ୍ଥା ଦେଶରେ ଅନାହାର ଏବଂ ଖାଦ୍ୟ ନଷ୍ଟ ବିରୋଧରେ ଅଭିଯାନ ଚଳାଇଛି । ଦେଶରେ ପର୍ଯ୍ୟାପ୍ତ ଖାଦ୍ୟଶସ୍ୟ ଉତ୍ପାଦନ ହେଉଥିବା ବେଳେ ୨୦ କୋଟିରୁ ଅଧିକ ଲୋକ ଅନାହାରରେ ପୀଡିତ ଥିବା ନେଇ ଚିନ୍ତା ପ୍ରକଟ କରନ୍ତି ଏହି ସଂଗଠନର ସଦସ୍ୟମାନେ ।
ଏବେ ଶୀତଲ ବିବିଏ ପାଠ୍ୟକ୍ରମର ଛାତ୍ରୀ । ‘ଫିଡିଙ୍ଗ୍ ଇଣ୍ଡିଆ’ର ସିଟି ଲିଡର ଭାବେ ସେ କାର୍ଯ୍ୟରତ । ଏହା ପୂର୍ବରୁ ‘ମେକ୍ ଏ ଡିଫରେନ୍ସ’ ସଂଗଠନ ସହ ସେ କାମ କରିସାରିଛନ୍ତି । ପିଲାଟି ଦିନରୁ ସମାଜସେବା କରିବାରେ ସେ ବେଶ୍ ଆଗ୍ରହୀ କୌଣସି ଅଭାବୀ ଭୋକିଲା ଲୋକଙ୍କୁ ଖାଦ୍ୟ ଯେଉଁ ସନ୍ତୋଷ ମିଳେ ତା’ଠାରୁ ବେଶିି ଖୁସି ଆଉ କେଉଁ କାମରେ ମିଳିପାରେନି ବୋଲି ଶୀତଲ କହନ୍ତି । ଆଜି ସେ ନିଜ କାମକୁ ନେଇ ଖୁବ୍ ଗର୍ବତ ।