କନକ ବ୍ୟୁରୋ : କୁହାଯାଏ ପ୍ରେମ ମାନେନା କିଛି ବନ୍ଧନ , ନା ଜାତି ନା ଧର୍ମ । ଆଉ ନିଜ ପ୍ରେମିକକୁ ଜୀବନ ସାଥି କରିବାକୁ ସାତଦରିଆ ପାରି ହୋଇ କେନ୍ଦ୍ରାପଡାକୁ ଚାଲି ଆସିଛନ୍ତି ନାଇଜେରିଆର ଜଣେ ଝିଅ । ତିନିମୁହାଣୀସ୍ଥିତ ରାମମନ୍ଦିର ପରିସରରେ ଦୁଇ ପ୍ରେମୀ ଯୁଗଳଙ୍କ ବିବାହ ସଂପନ୍ନ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ରାପଡା ଜିଲ୍ଲା ପାଟକୁରା ଥାନା ଅନ୍ତର୍ଗତ ପୋଦନା ଗାଁର ପ୍ରଶାନ୍ତ ପରିଡାଙ୍କ ପୁଅ ଅମୀୟ ମେକାନିକାଲ ଇଞ୍ଜିନିଅରିଂ ପାସ କଲା ପରେ ଭଲ ଦୁଇ ପଇସା ରୋଜଗାର କରିବା ଆଶା ନେଇ ସୁଦୂର ନାଇଜେରିଆ ଯାଇଥିଲେ । ଆଉ ନାଇଜେରିଆର ଉଗର୍ଜି ପିସ ଏନକେଚି ନାମକ ଜଣେ ନାଇଜେରିଆ ଯୁବତୀଙ୍କ ସହ ତାଙ୍କର ପ୍ରେମ ସଂପର୍କ ଗଢିଉଠିଥିଲା । ଉଭୟ ଜୀବନସାଥୀ ହୋଇ ସଂସାର କରିବେ ବୋଲି ନିଷ୍ପତି ନେବା ପରେ ଅମୀୟ ଏନେଇ ନିଜ ପରିବାରକୁ ପ୍ରସ୍ତାବ ଦେଇଥିଲେ ।
ପରିବାରରୁ ସହମତି ମିଳିବା ପରେ ଅମୀୟ ନିଜ ପ୍ରେମୀକା ଉଗର୍ଜିଙ୍କୁ ଆଣି କେନ୍ଦ୍ରାପଡାରେ ପହଁଚିବାପରେ ବିବାହ ହୋଇଥିଲା । ତିନିମୁହାଣୀସ୍ଥିତ ରାମମନ୍ଦିରରେ ହିନ୍ଦୁ ରୀତୀନୀତି ଅନୁଯାୟୀ ବିବାହ ହୋଇଥିଲା । ଅମୀୟଙ୍କ ବାପା ପ୍ରଶାନ୍ତଙ୍କ ବନ୍ଧୁ ଗଙ୍ଗାଧର ସାମଲ କନ୍ୟାପିତା ହୋଇଥିଲେ । ସେହିପରି ନୂଆ ଦୁନିଆ , ନୂଆ ଦେଶ ଆଉ ନୂଆ ପରିବାରରେ ନୂଆ ପରମ୍ପରାକୁ ଆପଣାଇ ନୂଆ ସଂସାର କରିବା ପାଇଁ ବେଶ୍ ଖୁସି ଅନୁଭବ କରିଛନ୍ତି ଉଗର୍ଜି । ଜଣେ ବିଦେଶୀନିଙ୍କୁ ବୋହୁ କରିବା ପାଇଁ ସ୍ୱୀକୃତି ଦେବା ସହ ତାଙ୍କୁ ଘରର ବୋହୁ ଭାବରେ ପାଇ ବେଶ୍ ଖୁସି ଅନୁଭବ କରିଛନ୍ତି ଅମୀୟଙ୍କ ବାପା ପ୍ରଶାନ୍ତ ।