ଆୟକର ଲେନ୍ସରେ ଫେସବୁକ୍ ପୋଷ୍ଟ ! ସୋସିଆଲ ମିଡିଆ ଦ୍ୱାରା ଲୋକଙ୍କ ଆୟବ୍ୟୟ ଯାଂଚ କରାଯିବ
ନିଜ ନୂଆ କାର ସହିତ ଫଟୋ ଉଠାଇ ଇନଷ୍ଟାଗ୍ରାମ୍ କିମ୍ବା ଫେସବୁକରେ ପୋଷ୍ଟ କରିଛନ୍ତି କି ? ବାହାରକୁ ବୁଲିବାକୁ ଯିବା ଅବସରରେ ଫଟୋ ପୋଷ୍ଟ କରିଛନ୍ତି କି ? ଏଥିପାଇଁ ଟିକେ ସାବଧାନ ହୋଇଯା’ନ୍ତୁ । କାରଣ ଏହି ପୋଷ୍ଟଗୁଡିକୁ କେବଳ ଫେସବୁକ୍ କିମ୍ବା ଇନଷ୍ଟାଗ୍ରାମ ଦେଖୁନାହିଁ , ଟିକସ ଅଧିକାରୀମାନେ ମଧ୍ୟ ଏହା ଉପରେ ତୀକ୍ଷଣ ନଜର ରଖିଛନ୍ତି । ଜି ନ୍ୟୁଜରେ ପ୍ରକାଶିତ ଏହି ଖବରକୁ ନେଇ ଏବେ ଚର୍ଚ୍ଚା ।
Kanak News is now on WhatsApp
Join and get latest news updates delivered to you via WhatsApp
ସୋସିଆଲ ମିଡିଆରେ ପୋଷ୍ଟଗୁଡିକୁ ଟିକସ ଅଧିକାରୀମାନେ ଭଲ ଭାବେ ଯାଂଚ କରିବା ପରେ ସଂପୃକ୍ତ ଲୋକଙ୍କ ବ୍ୟକ୍ତିଗତ ତଥ୍ୟ ଯାଂଚ କରିବେ । ସେମାନେ କେତେ ଟଙ୍କା ଆୟ କରୁଛନ୍ତି , କେତେ ସଂପତ୍ତି ଧାରଣ କରିଛନ୍ତି ଏବଂ କେତେ ଟଙ୍କା ଖର୍ଚ୍ଚ କରୁଛନ୍ତି ତାହାସବୁ ଯାଂଚ ହେବ । ମୋଟା ପରିମାଣର ଆୟ କରୁଥିଲେ , ସରକାରଙ୍କୁ ଟିକସ ଦେଇଛନ୍ତି କି ନାହିଁ ତାହା ଯାଂଚ କରାଯିବ । ଏଥିରେ ସାମାନ୍ୟତମ ସନ୍ଦେହ ପ୍ରକାଶ ପାଇଲେ ସେମାନେ ସେହି ଲୋକଙ୍କ ନିକଟରେ ପହଁଚିଯିବେ ।
ସୂଚନା ଅନୁସାରେ , ଆସନ୍ତା ମାସରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱାଧୀନ ସରକାର ବିଭିନ୍ନ ସୂତ୍ରରୁ ଲୋକଙ୍କ ତଥ୍ୟ ଏକତ୍ରିତ ପ୍ରକ୍ରିୟା ଆରମ୍ଭ କରୁଛନ୍ତି । କେବଳ ବ୍ୟାଙ୍କ୍ କିମ୍ବା ଅନ୍ୟ ପାରମ୍ପରିକ ଉତ୍ସ ନୁହେଁ ,ବରଂ ଆଧୁନିକ ସମାଜରେ ଲୋକପ୍ରିୟତା ହାସଲ କରିଥିବା ସୋସିଆଲ୍ ମିଡିଆକୁ ମଧ୍ୟ ପ୍ରମୁଖ ଉତ୍ସ ଭାବେ ଗ୍ରହଣ କରାଯିବ । ଲୋକମାନେ ଘୋଷଣା କରିଥିବା ଆୟ ଉତ୍ସ ସହିତ ସେମାନଙ୍କ ଖର୍ଚ୍ଚକୁ ତୁଳନା କରାଯିବ । ଆୟଠାରୁ ବିଭିନ୍ନ କ୍ଷେତ୍ରରେ ବ୍ୟୟ ବୃଦ୍ଧି ପାଇଥିବା ନେଇ ସୂଚନା ମିଳିଲେ ଟିକସ ଅଧିକାରୀମାନେ ଲୋକଙ୍କ ଘର ପରିଦର୍ଶନ କରିବେ ବୋଲି ପ୍ରସଙ୍ଗ ସହ ଜଡିତ କିଛି ଲୋକ ଦର୍ଶାଇଛନ୍ତି ।
ସୂଚନା ମୁତାବକ, ଯେଉଁମାନେ ଆୟ ତୁଳନାରେ ଅତ୍ୟନ୍ତ ସ୍ୱଳ୍ପ ପରିମାଣର ଟିକସ ଦେଉଛନ୍ତି, ସେମାନଙ୍କୁ ଅବଗତ କରାନଯାଇ ସେମାନଙ୍କ କାର୍ଯ୍ୟାଳୟ ଏବଂ ବାସଭବନ ଉପରେ ଅଚାନକ ଚଢ଼ାଉ କରାଯିବ । ସଂପ୍ରତି ବେଲଜିୟମ୍, କାନାଡ଼ା ଓ ଅଷ୍ଟ୍ରେଲିଆ ଭଳି ରାଷ୍ଟ୍ର ଟିକସ ଫାଙ୍କିକୁ ଏଡାଇବା ପାଇଁ ବିଗ୍ ଡାଟା (ବିଭିନ୍ନ ସୂତ୍ରରୁ ହାସଲ କରାଯାଇଥିବା ବ୍ୟାପକ ସୂଚନା ) ବ୍ୟବହାର କରୁଛନ୍ତି । ପ୍ରଯୁକ୍ତି ବିନା ଯେଉଁମାନଙ୍କୁ ଚିହ୍ନଟ କରାଯାଇ ପାରିନଥିଲା ଏବେ ସେମାନଙ୍କୁ ପ୍ରଯୁକ୍ତି ସହାୟତାରେ ଚିହ୍ନଟ କରାଯାଉଛି । ଅନ୍ୟପକ୍ଷରେ ଭାରତରେ ଏଯାଏ ବିଗ୍ ଡାଟାର ଉପଯୋଗ କରାଯାଇନାହିଁ । ଫଳରେ ଏଠାରେ ଟିକସ ଫାଙ୍କି ଘଟଣା ଅଧିକ ରହିଛି । ସୂଚନାଯୋଗ୍ୟ , ଭାରତର ଟିକସ-ଜିଡିପି ଅନୁପାତ ପାଖାପାଖି ୧୭% ରହିଥିବା ବେଳେ ଅଧିକାଂଶ ଏସୀୟ ରାଷ୍ଟ୍ରରେ ଏହା ୨୫% ରହିଛି । ତେବେ ସରକାର ଏବେ ଯେଉଁ ପଦକ୍ଷେପ ନେବାକୁ ଯାଉଛନ୍ତି ତଦ୍ୱାରା ପ୍ରଥମ ପର୍ଯ୍ୟାୟରେ ଟିକସ ନିୟମ ଅନୁପାଳନ ୩୦% ରୁ ୪୦% ବୃଦ୍ଧି ପାଇବ ।
ନୂଆ ପଦକ୍ଷେପ ଭାବେ ସରକାର ଲୋକଙ୍କ କ୍ରେଡିଟ୍ କାର୍ଡ ବ୍ୟୟ . ସଂପତ୍ତି ଓ ଷ୍ଟକ୍ ନିବେଶ ,ନଗଦ କ୍ରୟ ଏବଂ ଜମା ଆଦି ବିଭିନ୍ନ କାରବାର ତଥ୍ୟକୁ ଏକାଠି କରି ନୂଆ ବ୍ୟବସ୍ଥାରେ ସାମିଲ୍ କରିବେ । ଏହାପରେ ଏକ କେନ୍ଦ୍ରୀୟ ଟିମ୍ ଡାକ ଯୋଗେ ଏବଂ ଇମେଲ୍ ମାଧ୍ୟମରେ ଲୋକଙ୍କୁ ଟିକସ ଘୋଷଣାନାମା ଫାଇଲ୍ କରିବା ପାଇଁ ନିର୍ଦ୍ଦେଶ ଦେବେ । ଡିସେମ୍ବର ସୁଦ୍ଧା ଦ୍ୱିତୀୟ ପର୍ଯ୍ୟାୟ ଆରମ୍ଭ କରାଯିବାକୁ ଥିବାବେଳେ ଆସନ୍ତା ମାସରୁ ଲୋକଙ୍କ ନିକଟକୁ ନୋଟିସ୍ ପଠାଯିବ ବୋଲି ଜଣାପଡିଛି ।