ସିଆଚେନରେ ମୁତୟନ ଥିବା ଯବାନଙ୍କ ପାଇଁ ସ୍ପେଶାଲ କିଟ୍ ପ୍ରସ୍ତୁତି କରୁଛି ସେନା । ୮୦୦ କୋଟି ବଦଳରେ ଖର୍ଚ୍ଚ ହେବ ମାତ୍ର ୫୦୦ କୋଟି
ସିଆଚେନ ଓ ଡୋକଲାମ ଭଳି ବିପଦପୂର୍ଣ୍ଣ କ୍ଷେତ୍ରରେ ନିୟୋଜିତ ଥିବା ଯବାନ ମାନଙ୍କ ପାଇଁ ସ୍ୱତନ୍ତ୍ର କିଟ୍ ପ୍ରସ୍ତୁତ କରିବାକୁ ଭାରତର ସମସ୍ତ ପ୍ରକାର ପ୍ରସ୍ତୁତି ଯୋଜନା ଶେଷ ପର୍ଯ୍ୟାୟରେ ପହଞ୍ଚିଛି । ବିଶ୍ୱର ସବୁଠାରୁ ବିପଦଜନକ ଯୁଦ୍ଧ କ୍ଷେତ୍ରରେ ନିୟୋଜିତ ଥିବା ଯବାନ ମାନଙ୍କ ପାଇଁ ପୋଷାକ, ଶୋଇବା ପାଇଁ ଆବଶ୍ୟକୀୟ ସରଞ୍ଜାମ ଓ ବିଭିନ୍ନ ଜରୁରୀ ଉପକରଣର ଉତ୍ପାଦନ ଦେଶରେ ହିଁ କରାଯିବ । ଏହାଦ୍ୱାରା ଭାରତୀୟ ସେନା ପାଖାପାଖି ୩୦୦ କୋଟି ବଞ୍ଚାଇପାରିବ ।
Kanak News is now on WhatsApp
Join and get latest news updates delivered to you via WhatsApp
ସେନାର ଏକ ଅଧିକାରୀଙ୍କ କହିବା ଅନୁଯାୟୀ, ୧୬ ହଜାରରୁ ୨୦ ହଜାର ଫୁଟ ଉପରେ ନିୟୋଜିତ ଥିବା ଯବାନ ବ୍ୟବହାର କରୁଥିବା ଅଧିକାଂଶ ଉପକରଣ ଭାରତରେ ହିଁ ଉତ୍ପାଦନ କରାଯିବ । ଏହାପୂର୍ବରୁ ଏହି ଉପକରଣ ଗୁଡିକୁ ଆମେରିକା, ଅଷ୍ଟ୍ରେଲିଆ, କାନାଡା ଓ ସ୍ୱିଜରଲ୍ୟାଣ୍ଡରୁ ଆମଦାନୀ କରାଯାଉଥିଲା । ଯାହା ପାଇଁ ସରକାରଙ୍କୁ ପ୍ରତିବର୍ଷ ୮୦୦ କୋଟି ଟଙ୍କା ଖର୍ଚ୍ଚ କରିବାକୁ ପଡୁଥିଲା । କିନ୍ତୁ ଏବେ ଚଷମା, ସିଲ୍ପିଂ କିଟ୍, ଜୋତା, ହିମସ୍ଫଳନର ସୂଚନା ଦେଉଥିବା ଉପକରଣ, ପର୍ବତାରୋହଣ ପାଇଁ ଆବଶ୍ୟକୀୟ କିଟ୍ ଭଳି ବିଭିନ୍ନ ଉପକରଣ ଦେଶରେ ହିଁ ପ୍ରସ୍ତୁତ କରାଯିବ ।
ଏହି ଉପକରଣ ଗୁଡିକୁ ଦୁଇଟି ଶ୍ରେଣୀରେ ଉତ୍ପାଦନ କରାଯିବ । ପ୍ରଥମ ଶ୍ରେଣୀରେ ଆସୁଥିବା ସ୍ପେଶାଲ କିଟ୍ ଗୁଡିକୁ ୯ରୁ ୧୨ ହଜାର ଫୁଟ୍ ଉପରେ ନିୟୋଜିତ ଥିବା ଯବାନ ମାନଙ୍କୁ ଦିଆଯିବ । ସେହିଭଳି ଏହାଠାରୁ ଉଚ୍ଚରେ ନିୟୋଜିତ ଥିବା ଯବାନ ମାନଙ୍କୁ ଦ୍ୱିତୀୟ ଶ୍ରେଣୀର କିଟ୍ ଦିଆଯିବ । ସମୁଦ୍ର ପତନରୁ ପ୍ରାୟ ୫୪୦୦ ମିଟର ଉଚ୍ଚରେ ସିଆଚେନ ରହିଛି । ଏହା ବିଶ୍ୱର ସବୁଠାରୁ ଉଚ୍ଚତମ ଯୁଦ୍ଧକ୍ଷେତ୍ର । ତେବେ ୧୯୮୪ ପୂର୍ବରୁ ଏଠାରେ ଯବାନ ମାନଙ୍କୁ ନିୟୋଜିତ କରାଯାଉନଥିଲା । କିନ୍ତୁ ପାକିସ୍ତାନ ସେନାର ଅନୁପ୍ରବେଶ ପରେ ଏଠାରେ ପ୍ରଥମ ଥର ପାଇଁ ୧୯୮୪ରେ ଯବାନ ମାନଙ୍କୁ ମୁତୟନ କରାଯାଇଥିଲା । ସିଆଚେନ ପୋଷ୍ଟକୁ ଚୀନ ଓ ପାକିସ୍ତାନ ସୀମା ଲାଗି କରି ରହିଛି । ଏଠାରେ ଭାରତୀୟ ସେନାର ୧୫୦ଟି ପୋଷ୍ଟ ରହିଛି ଯେଉଁଠାରେ ପ୍ରାୟ ୧୦ ହଜାର ସୈନିକଙ୍କୁ ମୁତୟନ କରାଯାଇଛି ।