ଏଣିକି ବୃଦ୍ଧ ବାପାମାଆ ଏବଂ ଦିବ୍ୟାଙ୍ଗ ଭାଇଭଉଣୀଙ୍କୁ ଅଣଦେଖା କଲେ କାଟିଦିଆଯିବ ଦରମା ! ଜାଣନ୍ତୁ କେବେଠାରୁ ଲାଗୁ ହେଉଛି ସରକାରଙ୍କ ଏହି ନୂଆ ନିୟମ
ଚଳନ୍ତି ପ୍ରତିମା ହେଉଛନ୍ତି ବାପାମାଆ । ବାପାମାଆଙ୍କ ସେବା କରିବା ଭଗବାନଙ୍କ ସେବା କରିବା ସହିତ ସମାନ ଆଉ ତାଙ୍କର ନିଃସ୍ୱାର୍ଥର ସହ ସେବା କରିବା ଉଚିତ । ହେଲେ ଏସବୁ ସତ୍ୱେ କିଛି ସନ୍ତାନ ଏଭଳି ବି ଅଛନ୍ତି ଯେଉଁମାନେ କି, ନିଜ ବୃ୍ଦ୍ଧା ବାପାମାଆଙ୍କ ସେବା କରିବା ତ ଦୂରର କଥା ବରଂ ତାଙ୍କୁ ସବୁବେଳେ ଦୁଃଖ ଦେଇଆସୁଛନ୍ତି । ତେବେ ଏହାକୁ ଦୃଷ୍ଟିରେ ରଖି ସରକାରଙ୍କ ତରଫରୁ ଅନେକ ଗୁରୁତ୍ୱପୂର୍ଣ୍ଣ ନିଷ୍ପତି ନିଆଯାଇଛି । ଏପରିକି ଯଦି କୌଣସି ସନ୍ତାନ ନିଜ ବାପାମାଆଙ୍କୁ ଅଣଦେଖା କରେ ତେବେ ସେ ପୈତୃକ ସଂପତିରୁ ବଂଚିତ ହେବେ ବୋଲି ନିକଟରେ ବମ୍ବେ ହାଇକୋର୍ଟ ଘୋଷଣା କରିଛନ୍ତି । ଠିକ୍ ଏଭଳି ହିଁ ଏକ ନିଷ୍ଟତି ନେଇଛନ୍ତି ଆସାମ ସରକାର ।
Kanak News is now on WhatsApp
Join and get latest news updates delivered to you via WhatsApp
ଆସାମ ସରକାର ୨ ଅକ୍ଟୋବରକୁ ଏକ ନୂଆ ନିୟମ ଲାଗୁ କରିବାକୁ ଯାଉଛନ୍ତି । ଯାହାଦ୍ୱାରା ସେଠାକାର ସମସ୍ତ ସରକାରୀ କର୍ମଚାରୀଙ୍କ ଉପରେ ନିର୍ଭର କରୁଥିବା ବାପାମାଆ ଏବଂ ଦିବ୍ୟାଙ୍ଗ ଭାଇ ଭଉଣୀଙ୍କ ସେବା କରିବାକୁ ବାଧ୍ୟ ହେବେ । ଯଦି କେହି ଏହି ନିୟମକୁ ଉଲ୍ଲଂଘନ କରନ୍ତି ତେବେ ଉକ୍ତ କର୍ମଚାରୀଙ୍କ ଦରମାରୁ କିଛି ଟଙ୍କା କାଟିଦିଆଯିବ । ଅର୍ଥମନ୍ତ୍ରୀ ହେମନ୍ତ ବିଶ୍ୱ ଶର୍ମା ସୂଚନା ଦେଇ କହିଛନ୍ତି କି, ଏଭଳି ପ୍ରକାରର ନିୟମ ଆଣିଥିବା ଆସାମ ଦେଶର ପ୍ରଥମ ରାଜ୍ୟ ଅଟେ ।
ସୂଚନା ମୁତାବକ, ଏଭଳି ଏକ ବିଲ୍ ଗୃହୀତ କରାଯାଇଛି ଆସାମ ବିଧାନସଭାରେ । ଯାହାର ଅର୍ଥ ହେଲା ଯଦି କେହି ସରକାରୀ କର୍ମଚାରୀ ନିଜର ବୃଦ୍ଧ ବାପାମାଆ କିମ୍ବା ଦିବ୍ୟାଙ୍ଗ ଭାଇ ଭଉଣୀଙ୍କର ଦେଖାରଖା ନକରନ୍ତି ତେବେ ତାଙ୍କ ଦରମାରୁ ପାଖାପାଖି ୧୦ରୁ ୧୫ ପ୍ରତିଶତ ଭାଗ କାଟି ଦିଆଯିବ ଆଉ ଏହି ଟଙ୍କାକୁ ପୀଡିତାଙ୍କ ଖାତାକୁ ଟ୍ରାନ୍ସଫର କରିଦିଆଯିବ ।
ପ୍ରଣାମ (ପ୍ୟାରେଂଟ୍ସ ରେସପନ୍ସିବିଲିଟି ଆଣ୍ଡ ନମର୍ସ ଫର ଆକାଉଂଟିବିଲିଟି ଆଣ୍ଡ ମନିଟରିଂ) ନାମକ ଏହି ବିଲଟିକୁ ୧୫ ସେପ୍ଟେମ୍ବରରେ ଆସାମ ବିଧାନସଭାରେ ପାସ କରାଯାଇଥିଲା । ଯାହାକୁ ଅକ୍ଟୋବର ୨ ତାରିଖ ତଥା ଗାନ୍ଧୀ ଜୟନ୍ତୀରୁ ସଂପୂର୍ଣ୍ଣ ରାଜ୍ୟରେ କଡାକଡି ଭାବରେ ଲାଗୁ କରାଯିବ । ବିଲରେ ଉଲ୍ଲେଖ ରହିଛି କି, ଜୀବିତ ବୃଦ୍ଧ ବାପାମାଆଙ୍କୁ ଲିଖିତି ରୂପରେ ଏହାର ଅଭିଯୋଗ ସରକାର ଦ୍ୱାରା ନିଯୁକ୍ତ ଅଥରିଟିଙ୍କଠାରେ କରିବାକୁ ପଡିବ ଏବଂ ଅଥରିଟି ଏହି ଅଭିଯୋଗକୁ ୯୦ ଦିନ ଭିତରେ ସମସ୍ତ ଛାନଭିନ କରି, ମାମଲାର ଫଇସଲା କରିବେ ।
ତେବେ ବିଧାନସଭାରେ ଆସାମ ଅର୍ଥମନ୍ତ୍ରୀ ହେମନ୍ତ ବିଶ୍ୱ ଶର୍ମା ଜାତୀୟ ଗଣମାଧ୍ୟମ ଦ ଟେଲିଗ୍ରାଫକୁ ସୂଚନା ଦେଇ କହିଛନ୍ତି କି, ଏହି ନିୟମ ତିଆରି କରିବା ପଛରେ ମୁଖ୍ୟ ଉଦ୍ଦେଶ୍ୟ ହେଲା କି, କୌଣସି ବି ବୃଦ୍ଧ ବାପାମାଆଙ୍କୁ ନିଜ ଜୀବନର ଅନ୍ତିମ ଦିନ ପର୍ଯ୍ୟନ୍ତ ଏକାକୀ କୌଣସି ବୃଦ୍ଧାଶ୍ରମରେ କାଟିବାକୁ ନପଡୁ ଏବଂ ସେମାନେ ଏହି ସମୟକୁ ନିଜ ପିଲାମାନଙ୍କ ସହିତ ବିତାଇପାରିବେ । ଶର୍ମା ଆହୁରୀ ମଧ୍ୟ କହିଛନ୍ତି ଯେ, ଏହା ଦେଶର ଏକ ସ୍ୱତନ୍ତ୍ର ତଥା ଅଭିନ୍ନ ନିୟମ ଅଟେ । ଯାହାକି ପୂର୍ବରୁ କୌଣସି ଦେଶରେ ଲାଗୁ କରାଯାଇନାହିଁ । ସେ କହିଛନ୍ତି କି, ଏଦିଗରେ ସରକାର ଖୁବ୍ ଶୀଘ୍ର ପବ୍ଲିକ୍ ସେକ୍ଟର ୟୁନିଟ୍ ଏବଂ ପ୍ରାଇଭେଟ୍ ସେକ୍ଟରରେ କାମ କରୁଥିବା ବ୍ୟକ୍ତିବିଶେଷଙ୍କ ପାଇଁ ମଧ୍ୟ ଲାଗୁ କରିପାରନ୍ତି । ତେବେ ବିଧାନସଭା ଅଧ୍ୟକ୍ଷ ହିତିନ୍ଦ୍ର ନାଥ ଗୋସ୍ୱାମୀ ଏହି ବିଲଟିକୁ ଅନୁମୋଦନ କରିଛନ୍ତି ।
ଏଠାରେ ଆମେ କହି ରଖୁଛୁ କି, ପଶ୍ଚିମବଙ୍ଗ ସମେତ ଅଧିକାଂଶ ରାଜ୍ୟମାନଙ୍କରେ ବୃଦ୍ଧ ବାପାମାଆଙ୍କୁ ଅଣଦେଖା କରିବା ଏକ ଅପରାଧ ଭାବେ ଗ୍ରହଣ କରାଯାଉଛି ଏବଂ ଏହାକୁ କ୍ରିମିନାଲ ପ୍ରୋସ୍ୟୁଜର କୋର୍ଡ ଆଣ୍ଡ ଦ ମେନଟେନାନ୍ସ ଆଣ୍ଡ ୱେଲଫେୟାର ଅଫ୍ ପ୍ୟାରେଂଟ୍ସ ଆଣ୍ଡ ସିନିୟର ସିଟିଜନ ଆକ୍ଟ-୨୦୦୭ ଆଧାରରେ ଦଣ୍ଡବିଧାନ ମଧ୍ୟ କରାଯାଉଛି । ସିଆରପିସିର ମାମଲାରେ ଜଜଙ୍କୁ ଅଧିକାର ଦିଆଯାଇଛି କି, ସେ ଚଳିବା ପାଇଁ ଭତ୍ତା ଦେବାକୁ ନିର୍ଦ୍ଦେଶ ପାରିତ କରନ୍ତୁ । ଏଥିସହିତ ଅଭିଯୁକ୍ତର ଦରମା କାଟିବାକୁ ପ୍ରଣାମ ନୀତିରେ ଏକ ଟ୍ରିବ୍ୟୁନାଲ ଗଠନ କରି ଏହି ଅଧିକାର ଦିଆଯାଇଥିଲା ।