ମୃତ୍ୟୁ ସହ ସଂଗ୍ରାମ କରୁଛନ୍ତି ଭାରତୀୟ କ୍ରିକେଟ୍ ଦଳର ଏହି ଦିଗଜ ଖେଳାଳି ! ଚିକିତ୍ସା ପାଇଁ ଅର୍ଥ ସାଜିଛି ବାଧକ, ଟଙ୍କା ଲାଗି ବାରଦୁଆର ବୁଲୁଛନ୍ତି କ୍ରିକେଟରଙ୍କ ପତ୍ନୀ
ଦମଦାର ପ୍ରଦର୍ଶନ ବଳରେ ବିପକ୍ଷ ଦଳକୁ ମାତ୍ ଦେଉଥିବା ଭାରତର ଜଣେ ପୂର୍ବତନ ଖେଳାଳି ଏବେ ହସ୍ପିଟାଲ ବେଡରେ ପଡି ମୃତ୍ୟୁ ସହ ସଂଗ୍ରାମ କରୁଛନ୍ତି । ଦୁର୍ଘଟଣା କାରଣରୁ ବର୍ତ୍ତମାନ ତାଙ୍କ ଅବସ୍ଥା ଗୁରୁତର ହୋଇପଡିଛି । ହେଲେ ବିଡମ୍ବନାର ବିଷୟ ହେଲା, ଏହି ପ୍ରତିଭାଶାଳୀ କ୍ରିକେଟରଙ୍କର ଚିକିତ୍ସା ପାଇଁ ତାଙ୍କ ପରିବାର ଲୋକଙ୍କ ନିକଟରେ କାଣିଟିଏ ବି ନାହିଁ । ଆଉ ଟଙ୍କା ପାଇଁ ତାଙ୍କ ପତ୍ନୀଙ୍କୁ ବାର ଦୁଆର ବୁଲିବାକୁ ପଡିଛି । ତେବେ ଦୁର୍ଘଟଣାର ଶିକାର ହୋଇ ମେଡିକାଲ ବେଡରେ ପଡି ମୃତ୍ୟୁ ସହ ସଂଗ୍ରାମ କରୁଥିବା ଏହି ଖେଳାଳି ଜଣକ ହେଉଛନ୍ତି ଜ୍ୟାକବ ମାର୍ଟିନ । ଯିଏକି ଭାରତୀୟ କ୍ରିକେଟ ଦଳର ଜଣେ ପୂର୍ବତନ ଖେଳାଳି ।
Kanak News is now on WhatsApp
Join and get latest news updates delivered to you via WhatsApp
ମାର୍ଟିନଙ୍କର ଚିକିତ୍ସା ବର୍ତ୍ତମାନ ବଡୋଦରା ମେଡିକାଲରେ ଚାଲିଛି । ତାଙ୍କୁ ଏବେ ଭେଂଟିଲେଟରରେ ରଖାଯାଇଛି । ଗତ ଡିସେମ୍ବର ମାସରେ ସେ ସଡକ ଦୁର୍ଘଟଣାର ଶିକାର ହୋଇଥିଲେ, ଯେଉଁ କାରଣରୁ ତାଙ୍କ ଫୁସଫୁସ୍ ଏବଂ ଲିଭରରେ ଗଭୀର ଆଘାତ ଲାଗିଥିଲା । ତେବେ ବିସିସିଆଇ ତରଫରୁ ତାଙ୍କର ଚିକିତ୍ସା ପାଇଁ ୫ ଲକ୍ଷ ଟଙ୍କା ଆର୍ଥିକ ସହାୟତା ମିଳିଥିଲା । ଏହାବ୍ୟତୀତ ବଡୋଦା କ୍ରିକେଟ୍ ସଂଘ ପକ୍ଷରୁ ବି ତାଙ୍କୁ ୩ ଲକ୍ଷ ଟଙ୍କାର ଆର୍ଥିକ ସହାୟତା ଦିଆଯାଇଥିଲା । ହେଲେ ତାଙ୍କର ଚିକିତ୍ସା ଖର୍ଚ୍ଚ ପାଇଁ ଏତିକି ଟଙ୍କା ଯଥେଷ୍ଟ ନୁହେଁ । କାରଣ ମାର୍ଟିନଙ୍କର ମେଡିକାଲ ଖର୍ଚ୍ଚ ପ୍ରଥମରୁ ହିଁ ୧୧ ଲକ୍ଷ ଟଙ୍କା ପାର ହୋଇସାରିଛି । ଏପରିକି ଟଙ୍କା କାରଣରୁ କିଛି ଦିନ ତାଙ୍କର ଚିକିତ୍ସାରେ ମଧ୍ୟ ଅବହେଳା କରାଯାଇଥିଲା । ଖବର ପାଇ ବିସିସିଆଇ ତରଫରୁ ଟଙ୍କା ପଠାଯାଇଥିଲା ଆଉ ଏହାପରେ ଯାଇ ତାଙ୍କୁ ଉପଯୁକ୍ତ ଚିକିତ୍ସା ମିଳିପାରିଥିଲା ।
ଏଠାରେ ଆମେ କହି ରଖୁଛୁ କି, ଜ୍ୟାକବ୍ ଭାରତ ପକ୍ଷରୁ ୧୦ଟି ଦିନିକିଆ ମ୍ୟାଚ୍ ଖେଳିଛନ୍ତି। ସେ ୧୯୯୯ରେ ୱେଷ୍ଟଇଣ୍ଡିଜ୍ ବିପକ୍ଷରେ ଡେବ୍ୟୁ କରିଥିଲେ। ସେତେବେଳେ ସୌରଭ ଗାଙ୍ଗୁଲି ଭାରତର ଅଧିନାୟକ ଥିଲେ। ଜ୍ୟାକବ୍ଙ୍କ ନେତୃତ୍ୱରେ ୨୦୦୦-୨୦୦୧ ସିଜିନ୍ରେ ବଡ଼ୋଦରା ରଣଜୀ ଟ୍ରଫି ଜିତିଥିଲା।