ଗାଡି ଚାଳକଙ୍କ ପାଇଁ ସତର୍କ ଘଣ୍ଟି ! ନାବାଳକଙ୍କ ଦ୍ୱାରା ଦୁର୍ଘଟଣା ଘଟିଲେ ଦୋଷୀ ହେବେ ଅଭିଭାବକ, ୨୫ ହଜାର ଟଙ୍କା ସହ ୩ ବର୍ଷ କାଳ ଜେଲ ଦଣ୍ଡାଦେଶ
ଆମ୍ବୁଲାନ୍ସକୁ ରାସ୍ତା ନଛାଡିଲେ ଦେବାକୁ ପଡିପାରେ ୧୦ ହଜାର ଟଙ୍କା ଯାଏଁ ଜରିମାନା
ଏଣିକି ନିୟମ ଭାଙ୍ଗିଲେ ମିଳିବନି ତ୍ରାହୀ । ରାସ୍ତା ଉପରେ ଗାଡି ଚାଳକଙ୍କ ବେପରୁଆ ଢଙ୍ଗରେ ଡ୍ରାଇଭିଂ ଯୋଗୁଁ ପ୍ରତିଦିନ ଅନେକ ଲୋକଙ୍କର ଅକାରଣରେ ମୃତ୍ୟୁ ଘଟୁଛି । ଗାଡି ଚାଳକଙ୍କ ଅସାବଧାନତା ପାଇଁ ପ୍ରତିଦିନ କୌଣସି ନା କୌଣସି ସ୍ଥାନରେ ସଡକ ଦୁର୍ଘଟଣା ଘଟି ଧନଜୀବନ ହାନୀ ଘଟୁଛି । ପ୍ରଶାସନ ପକ୍ଷରୁ ଯେତେବି କଡାକଡି ନିୟମ ବା ଲୋକଙ୍କୁ ସଚେତନତା କରାଗଲେ ମଧ୍ୟ ତାହା କେବଳ ଦିନେ କିମ୍ବା ଦୁଇ ଦିନ ପାଇଁ ମନରେ ରହୁଛି ଆଉ ତା ପରେ ଯେସାକୁ ତେସା । ହେଲେ ଏବେ ଆଉ ଗାଡି ଚାଳକଙ୍କ ମନମାନି ଚଳିବନି । କାହିଁକି ନା ମୋଟର ହ୍ୱିଲର (ସଂଶୋଧନ) ବିଲକୁ ଏବେ ମିଳିଛି କେନ୍ଦ୍ରୀୟ କ୍ୟାବିନେଟର ମଂଜୁରୀ । ଯେଉଁଥିରେ ଟ୍ରାଫିକ୍ ନିୟମ ଉଲ୍ଲଂଘନ ଉପରେ ମୋଟା ଅଙ୍କର ଜରିମାନା ଲଗାଯିବାର ପ୍ରସ୍ତାବ ରହିଛି ।
Kanak News is now on WhatsApp
Join and get latest news updates delivered to you via WhatsApp
ଖାଲି ସେତିକି ନୁହେଁ, ଆମ୍ବୁଲାନ୍ସ ଭଳି ଗାଡିକୁ ବି ରାସ୍ତା ନଛାଡିବା ଉପରେ ମଧ୍ୟ ୧୦ ହଜାର ଟଙ୍କା ପର୍ଯ୍ୟନ୍ତ ଜରିମାନା ଲଗାଯିବାର ନିୟମ ରହିଛି । ସେହିଭଳି ଆଯୋଗ୍ୟ ଘୋଷିତ କରାଯିବା ସତ୍ୱେ ଗାଡି ଚଲାଇବା ଦ୍ୱାରା ମଧ୍ୟ ଜରିମାନା ବାବଦକୁ ୧୦ ହଜାର ଟଙ୍କା ଦେବାକୁ ପଡିବ ।
ସୂଚନା ମୁତାବକ, ଏହି ବିଲରେ ନାବାଳକଙ୍କୁ ଗାଡି ଚଲାଇବା, ବିନା ଲାଇସେନ୍ସରେ ଗାଡି ଚଲାଇବା, ରେସ୍ ଡ୍ରାଇଭିଂ, ଡ୍ରଙ୍କ ଡ୍ରାଇଭିଂ, ଓଭରସ୍ପିଡ ଏବଂ ଓଭରଲୋଡିଂ ଉପରେ ବି କଡା କାର୍ଯ୍ୟାନୁଷ୍ଠାନ ନେବାର ନିୟମ ରହିଛି । ସେହିଭଳି ଓଲା , ଉବେର ଭଳି ଏଗ୍ରିଗ୍ରେଟର୍ସ ଯଦି ଟ୍ରାଫିକ୍ ନିୟମ ଉଲ୍ଲଂଘନ କରନ୍ତି ତେବେ ସେମାନଙ୍କ ଉପରେ ୧ ଲକ୍ଷ ଟଙ୍କା ପର୍ଯ୍ୟନ୍ତ ଜରିମାନା ଲାଗିପାରେ । ତେବେ ଏହି ବିଲର ନିୟମ ୧୮ଟି ରାଜ୍ୟଗୁଡିକର ପରିବହନ ମନ୍ତ୍ରୀମାନଙ୍କ ସିପାରିସ ଦ୍ୱାରା ପର୍ଯ୍ୟବେଶିତ । ଏହି ସୁପାରିସକୁ ସଂସଦର ସ୍ଥାୟୀ ସମିତି ବି ତଦାରଖ କରିଛନ୍ତି ।
ବିନା ହେଲମେଟ ଧରା ପଡିଲେ ୩ ମାସ ପାଇଁ ଲାଇସେନ୍ସ ରଦ୍ଦ
ଓଭରସ୍ପିଡ ପାଇଁ ହଜାରେରୁ ୨ ହଜାର ଟଙ୍କା ଏବଂ ବୀମା ପଲିସି ବିହୀନ ଗାଡି ଚଲାଇଲେ ୨ ହଜାର ଟଙ୍କାର ଜରିମାନା ଲାଗିବ ।
ସେହିଭଳି ବିନା ହେଲମେଟ ଗାଡି ଚଲାଇଲେ ହଜାରେ ଟଙ୍କା ଜରିମାନା ବାବଦକୁ ଦେବାକୁ ହେବ । ଏଥିସହିତ ହିଁ ୩ ମାସ ପାଇଁ ଆପଣଙ୍କର ଡ୍ରାଇଭିଂ ଲାଇସେନ୍ସକୁ ବି ରଦ୍ଦ କରିଦିଆଯିବ ।
୧୮ ବର୍ଷରୁ କମ୍ ପିଲାଙ୍କ ଯଦି ଗାଡି ଚଲାଇବା ସମୟରେ କୌଣସି ଅପରାଧ ତଥା ଦୁର୍ଘଟଣା ଘଟାନ୍ତି ତେବେ ଏଥିପାଇଁ ମାଲିକ -ଅଭିଭାବକଙ୍କୁ ଦୋଷୀ କରାଯିବ । ଏପରିକି ୩ ବର୍ଷ କାଳ ଜେଲ ଦଣ୍ଡାଦେଶ ସହ ୨୫ ହଜାର ଟଙ୍କାର ଜରିମାନା ମଧ୍ୟ ଲଗାଯିବ । ଏଥିସହିତ ହିଁ ରେଜିଷ୍ଟ୍ରେସନ ବି ରଦ୍ଦ କରିଦିଆଯିବ ।
ସେହିଭଳି ଟ୍ରାଫିକ୍ ନିୟମ ଉଲ୍ଲଂଘନ କଲେ ଅତି କମରେ ୧୦୦ ଜାଗାରେ ୫ ଶହ ଟଙ୍କା ଜରିମାନା ଲାଗିବ । ଅଧିକାରୀଙ୍କ ନିର୍ଦ୍ଦେଶ ନମାନିଲେ ୫ଶହ ପରିବର୍ତ୍ତେ ୨ ହଜାର ଟଙ୍କା ଜରିମାନା ବାବଦକୁ ତଣ୍ଡ ଗଣିବାକୁ ହେବ ।
ଯାନବାହନଗୁଡିକୁ ଅବୈଧ କାର୍ଯ୍ୟରେ ବ୍ୟବହାର କଲେ ୫ ହଜାର ଟଙ୍କା ଜରିମାନା ଲଗାଯିବାର ନିୟମ ରହିଛି । ବିନା ଲାଇସେନ୍ସ ଗାଡି ଚଲାଇଲେ ବି ସେତିକି ଟଙ୍କା ଜରିମାନା ବାବଦକୁ ଦେବାକୁ ହେବ ।
ଡିଏନଏ ପ୍ରୋଫାଇଲିଂ ବିଲକୁ ବି ମିଳିଲା ମଂଜୁରୀ
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ବସିଥିବା କ୍ୟାବିନେଟ ବୈଠକରେ ଡିଏନଏ ପ୍ରୋଫାଇଲିଂ ବିଲକୁ ମଧ୍ୟ ମଂଜୁରୀ ମିଳିଛି । ଏଥିରେ କୌଣସି ବି ବ୍ୟକ୍ତିଙ୍କ ପରିଚୟ ପାଇବା ପାଇଁ ଡିଏନଏ ଟେକନ୍ଲୋଜିର ବ୍ୟବହାରର ନିୟମ ରହିଛି । ଏହି ବିଲ ଜାନୁଆରୀରେ ଲୋକସଭାରେ ପ।।ରିତ ହୋଇଯାଇଥିଲା କିନ୍ତୁ ରାଜ୍ୟସଭାରେ ଝୁଲି ରହିଥିଲା । ଯାହାକୁ ଆଗାମୀ ଦିନରେ ସଂସଦରେ ଉପସ୍ଥାପନା କରାଯିବ ।