ପାଶ୍ଚାତ୍ୟ ଏଜେନ୍ସିଙ୍କ ପ୍ରତି ବିମୁଖ ! ଭାରତ ଚାହୁଁଛି ‘ବ୍ରିକ୍ସ ରେଟିଂ’
ପାଶ୍ଚାତ୍ୟ ରାଷ୍ଟ୍ରଗୁଡ଼ିକର ରେଟିଂ ଏଜେନ୍ସି ପ୍ରତି ବିମୁଖ ଥିବା ଭାରତ ବ୍ରିକ୍ସ ରାଷ୍ଟ୍ର ସମୂହର ନିଜସ୍ୱ ରେଟିଂ ଏଜେନ୍ସି ଗଠନ କରିବା ଉପରେ ଜୋର ଦେଇଛି । ଚଳିତ ବ୍ରିକ୍ସ ଶିଖର ସମ୍ମିଳନୀରେ ଯୋଗ ଦେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏଭଳି ରେଟିଂ ଏଜେନ୍ସିର ଆବଶ୍ୟକତା ରହିଛି ବୋଲି କହିଛନ୍ତି । ଏହା ଦ୍ୱାରା ପାଶ୍ଚାତ୍ୟ ରେଟିଂ ଏଜେନ୍ସିଗୁଡ଼ିକର ପ୍ରାଧାନ୍ୟ କମିବ ଏବଂ ଏହା ବିକାଶଶୀଳ ରାଷ୍ଟ୍ରଗୁଡ଼ିକ ପାଇଁ କାମ କରିବ ବୋଲି ସେ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ବ୍ରାଜିଲ୍ ରୁଷିଆ, ଭାରତ, ଚୀନ୍ ଏବଂ ଦକ୍ଷିଣ ଆଫ୍ରିକାକୁ ନେଇ ଗଠିତ ବ୍ରିକ୍ସ ରାଷ୍ଟ୍ର ସମୂହ ନିଜସ୍ୱ ରେଟିଂ ଏଜେନ୍ସି ଗଠନ କରି ଏହାର ସଦସ୍ୟ ରାଷ୍ଟ୍ରଗୁଡ଼ିକୁ କ୍ରେଡିଟ୍ ରେଟିଂ ପ୍ରଦାନ କରୁ ବୋଲି ଭାରତ ଚାହୁଛି । ଭାରତର ଅଭିଯୋଗ ହେଉଛି ଏସ୍ଆଣ୍ଡ୍ପି, ମୁଡିସ୍ ଏବଂ ଫିଚ୍ ଭଳି ବିଶ୍ୱ ସ୍ତରୀୟ ରେଟିଂ ଏଜେନ୍ସି କ୍ରେଡିଟ୍ ରେଟିଂ ପ୍ରଦାନ କରିବା ବେଳେ ପକ୍ଷପାତିତା କରୁଛନ୍ତି । ତେଣୁ ଗୋଟିଏ ଦେଶର ପ୍ରକୃତ ରେଟିଂ ଯାହା ତାହାକୁ କମ୍ କରି ସେମାନେ ପ୍ରଦର୍ଶନ କରୁଛନ୍ତି ଯାହା ଫଳ ଉକ୍ତ ରାଷ୍ଟ୍ରର ନିବେଶ ପ୍ରଭାବିତ ହେଉଛି ।
ଗତବର୍ଷ ଗୋଆଠାରେ ଆୟୋଜନ କରାଯାଇଥିବା ସମ୍ମିଳନୀରେ ଭାରତ ପକ୍ଷରୁ ବ୍ରିକ୍ସ ରେଟିଂ ଏଜେନ୍ସି ଗଠନ କରାଯିବାର ଆବଶ୍ୟକତା ରହିଛି ବୋଲି କୁହାଯାଇଥିଲା । ରୁଷିଆ, ବ୍ରାଜିଲ୍ ଏବଂ ଦକ୍ଷିଣ ଆଫ୍ରିକା ମଧ୍ୟ ପାଶ୍ଚାତ୍ୟ ରେଟିଂ ଏଜେନ୍ସିଗୁଡ଼ିକୁ ନେଇ ନିଜର ଚିନ୍ତା ପ୍ରକଟ କରିଛନ୍ତି । ଫିଚ୍ ଏବଂ ମୁଡିସ୍ ଉପରେ ଭାରତର ଅସନ୍ତୋଷ ଚରମ ସୀମାରେ ପହଞ୍ଚିଛି । ଭାରତକୁ ଫିଚ୍ ପକ୍ଷରୁ ବିବିବି- (ମାଇନସ୍) ରେଟିଂ ପ୍ରଦାନ କରାଯାଇଛି ଯାହା ଦଶ ବର୍ଷ ପୂର୍ବରୁ ଦିଆଯାଇଥିଲା । ସେଥିରେ କୌଣସି ପ୍ରକାର ପରିବର୍ତ୍ତନ କରାଯାଉନାହିଁ । ଭାରତ ଭାବୁଛି ୧୦ ବର୍ଷ ଭିତରେ ଅନେକ ପରିବର୍ତ୍ତନ ହୋଇଛି ଏବଂ ଏହା ରେଟିଂରେ ଉନ୍ନତି ଆଶା କରୁଛି ମାତ୍ର ଏଜେନ୍ସିଗୁଡ଼ିକ ତାହା କରୁନାହାନ୍ତି । ଏହି ୧୦ ବର୍ଷ ଭିତରେ ଚୀନର ବ୍ୟବସାୟ ବାତାବରଣ ଖରାପ ହୋଇଥିଲେ ମଧ୍ୟ ତାହାକୁ ଏଏ- (ମାଇନସ୍) ରେଟିଂ ପ୍ରଦାନ କରାଯାଇଥିବା ବିଷୟକୁ ଭାରତ ସହଜରେ ଗ୍ରହଣ କରିପାରୁନାହିଁ ।
ଆମେରିକାର ରେଟିଂ ଏଜେନ୍ସି ମୁଡିସ୍ ପକ୍ଷରୁ ଚୀନ୍ର ରେଟିଂକୁ ହ୍ରାସ କରାଯିବା ପରେ ଚୀନ୍ ଗଭୀର ଚିନ୍ତା ପ୍ରକଟ କରିଛି । ରେଟିଂ ହିସାବ ପାଇଁ ଭୁଲ ପଦ୍ଧତି ଗ୍ରହଣ କରାଯାଇଛି ବୋଲି ଚୀନ୍ ଅଭିଯୋଗ କରିଥିଲା । ବ୍ରିକ୍ସ ରାଷ୍ଟ୍ର ସମୂହରେ ଥିବା ପ୍ରାୟ ସମସ୍ତ ସଦସ୍ୟ ରାଷ୍ଟ୍ର ପାଶ୍ଚାତ୍ୟ ରେଟିଂ ଏଜେନ୍ସିଗୁଡ଼ିକର ପକ୍ଷପାତିତାର ଶିକାର ହୋଇଥିବାରୁ ବ୍ରିକ୍ସ ରେଟିଂ ଏଜେନ୍ସି ଗଠନ କରିବା ନେଇ ସହମତି ପ୍ରକାଶ ପାଇବା ସମ୍ଭାବନାକୁ ଏଡ଼ାଇ ହେବ ନାହିଁ ।
ରେଟିଂ ଏଜେନ୍ସି କ’ଣ
କ୍ରେଡିଟ୍ ରେଟିଂ ଏଜେନ୍ସିଗୁଡ଼ିକୁ ରେଟିଂ ଏଜେନ୍ସି କୁହାଯାଉଛି । ଏହି ସଂସ୍ଥାଗୁଡ଼ିକ ବିଭିନ୍ନ ସରକାର ଏବଂ କଂପାନିଙ୍କୁ କ୍ରେଡିଟ୍ ରେଟିଂ ପ୍ରଦାନ କରିଥାନ୍ତି । ଋଣ ଗ୍ରହଣ କରିବାକୁ ଚାହୁଁଥିବା ପକ୍ଷର ଋଣ ପରିଶୋଧ ପାଇଁ କିଭଳି କ୍ଷମତା ରହିଛି ଏବଂ ଋଣ ଖିଲାପ ହେବାର ସମ୍ଭାବନା ରହିଛି ନା ନାହିଁ ତାହାକୁ ବିଚାରକୁ ନେଇ ରେଟିଂ ଏଜେନ୍ସିଗୁଡ଼ିକ କ୍ରେଡିଟ୍ ରେଟିଂ ପ୍ରଦାନ କରିଥାନ୍ତି । ତେଣୁ ଯେଉଁମାନଙ୍କୁ ଖରାପ ରେଟିଂ ମିଳେ ସେମାନଙ୍କୁ ସହଜରେ ବଜାରରୁ ପାଣ୍ଠି ମିଳେ ନାହିଁ।