ମାଆ ୭ମ ପାସ୍ , ବାପା ୩ଥର ମାଟ୍ରିକ୍ ଫେଲ୍ ହେଲେ ପୁଅ ଆଇପିଏସ ଅଫିସର ! ବାବୁଙ୍କ ଦରମାର ଅଧା ଯାଏ ଦାନରେ
୨୦୦୬ ବ୍ୟାଚର ବିହାରର କାଡ୍ରେର ଆଇପିଏସ୍ ଅଫିସର ଶିବଦୀପ ବାମନରାଓ ଲାଣ୍ଡେଙ୍କର କାହାଣୀ କୌଣସି ସିନେମାରୁ ବି କମ୍ ନୁହେଁ । ମହାରାଷ୍ଟ୍ରର ଅଙ୍କୋଲା ଜିଲ୍ଲାର ପରସା ନାମକ ଗାଁରେ ଏକ କୃଷକ ପରିବାରରେ ଜନ୍ମ ହୋଇଥିବା ଶିବଦୀପ ଲାଣ୍ଡେଙ୍କ ପିଲାଦିନ ବିତିଥିଲା ବହୁ ଦୁଃଖ କଷ୍ଟରେ । ଘରର ଆର୍ଥିକ ଏବଂ ଶିକ୍ଷାଗତ ପରିସ୍ଥିତି ଦୁର୍ବଳ ଥିବା କାରଣକରୁ ତାଙ୍କୁ ସାମ୍ନା କରିବାକୁ ପଡିଥିଲା ଅନେକ ସମସ୍ୟା । ତେବେ ସେ ଯାହା ହେଉନା କାହିଁକି ଆଜିକା ଦିନରେ ଶିବଦୀପ ଜଣେ ସଫଳ ଆଇପିଏସ୍ ଅଫିସ ଭାବରେ ବେଶ ନାଁ କମେଇଛନ୍ତି । ଏବେ ସେ ମହାରାଷ୍ଟ୍ରରେ କାମ କରୁଛନ୍ତି । କେନ୍ଦ୍ର ସରକାରଙ୍କ ପକ୍ଷରୁ ତାଙ୍କୁ ମଇ ୨୦୧୫ରେ ଏଠାରେ ତିନି ବର୍ଷ ପାଇଁ ନିଯୁକ୍ତି ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ଶିବଦୀପଙ୍କର କଠିନ ପରିଶ୍ରମ ଏବଂ କିଛି କରି ଦେଖାଇ ଭଳି ଦୃଢ ଇଚ୍ଛା ଶକ୍ତି ବଳରେ ଏହା ସମ୍ଭବ ହୋଇପାରିଛି । ଆପଣ ଜାଣିଲେ ଆଶ୍ଚର୍ଯ୍ୟ ହେବେକି ଶିବଦୀପଙ୍କ ମାଆ ସପ୍ତମ ଶ୍ରେଣୀ ଯାଏଁ ପାଠପଢି ଥିବାବେଳେ ଶିବଦୀପଙ୍କର ବାପା ଦଶମ ଶ୍ରେଣୀରେ ତିନି ତିନି ଥର ଫେଲ ହେବା ପରେ ଶେଷରେ ପାଠପଢା ଛାଡି ବିଲରେ କାମ କରିଥିଲେ । ତେବେ ଶିବଦୀପ ଲାଣ୍ଡେ ଦୁଇ ଭାଇଙ୍କ ମଧ୍ୟରୁ ହେଉଛନ୍ତି ବଡ । ସ୍କୋଲାର୍ସିପ ସହାୟତାରେ ଶିବଦୀପ ଇଂଜିନିୟରିଂ ପାଠାପଢା ଶେଷ କରିସାରିବା ପରେ ମୁମ୍ବାଇରେ ରହି ୟୁପିଏସସି ପାଇଁ ପ୍ରସ୍ତୁତ ହେଉଥିଲେ । ଏହାପରେ ସେ ଭାରତୀୟ ରାଜସ୍ୱ ବିଭାଗରେ ଚାକିରୀ ମଧ୍ୟ କରିଥିଲେ । ଏହି ଅବସରରେ ସେ ୟୁପିଏସସି ପାଇଁ ଚୟନ ହୋଇଥିଲେ । ଏହାପରେ ଶିବଦୀପଙ୍କୁ ପ୍ରଥମେ ମୁଂଗେର ଜିଲ୍ଲାର ମାଓ ପ୍ରବଣ ଅଂଚଳ ତଥା ଜମାଲପୁରରେ ନିଯୁକ୍ତି ଦିଆଯାଇଥିଲା ।
ବିହାରର ରାଜଧାନୀ ପାଟଣାର ଏସିପି ଭାବେ ନିଜର ଅଭିନ୍ନ କାର୍ଯ୍ୟଶୈଳୀ ପାଇଁ ଶିବଦୀପ ପାଲଟିଯାଇଥିଲେ ସାରା ଦେଶରେ ଚର୍ଚ୍ଚାର କେନ୍ଦ୍ରବିନ୍ଦୁ । ଯାହାକି କିଛି ଲୋକଙ୍କର ଏକଥା ହଜମ ହୋଇନଥିଲା ଆଉ ଯେଉଁଥିପାଇଁ ତାଙ୍କୁ ବାରମ୍ବାର ବଦଳି କରାଯାଉଥିଲା । ତେବେ ଶିବଦୀପ ଡ୍ୟୁଟି ସମୟରେ ଯେତିକି କଠୋର ନଜର ଆସନ୍ତି, ସେ ସେତିକି ମଧ୍ୟ ବିନମ୍ର ଅଟନ୍ତି । ଶିବଦୀପ କୁହନ୍ତି କି , ବିବାହ ପୂର୍ବରୁ ସେ ନିଜ ପାରଶ୍ରମିକ ତଥା ଦରମାର ୬୦ ପ୍ରତିଶତ ଅଂଶ ବିଭିନ୍ନ ଏନଜିଓକୁ ଦାନ କରିଦେଉଥିଲେ । ଯାହାକୁ ସେ ଏବେବି ବଜାୟ ମଧ୍ୟ ରଖିଛନ୍ତି । କିନ୍ତୁ ସ୍ତ୍ରୀ ପିଲାଙ୍କ କାରଣରୁ ସେ ଏହି ଅର୍ଥ ରାଶିକୁ ଟିକେ କମ୍ କରିଦେଇଛନ୍ତି ।
ଏବେବି ସେ ନିଜର ଦରମାର ପାଖାପାଖି ୨୫ରୁ ୩୦ ପ୍ରତିଶତ ଅଂଶ ଦାନ କରିଦିଅନ୍ତି । ଏହାବ୍ୟତୀତ ଅନେକ ସାମାଜିକ କାର୍ଯ୍ୟରେ ମଧ୍ୟ ସେ ସହଯୋଗର ହାତ ବଢାଇବାକୁ କୁଣ୍ଠାବୋଧ କରିନାହାଁନ୍ତି । ଖାଲି ସେତିକି ନୁହେଁ, ଶିବଦୀପ ଅନେକ ଗରିବ ଝିଅଙ୍କର ସାମୂହିକ ବିବାହ ବି କରାଇଛନ୍ତି । ଏଥିସହିତ ମହିଳାଙ୍କ ସୁରକ୍ଷା ପାଇଁ ମଧ୍ୟ ଶିବପାଳ ସର୍ବଦା ଯନ୍ତ୍ରବାନ ଅଟନ୍ତି ।
ଶିବଦୀପଙ୍କ ବିବାହ ମହାରାଷ୍ଟ୍ରର ମନ୍ତ୍ରୀ ବିଜୟ ଶିବତାରେଙ୍କର କନ୍ୟା ମମତାଙ୍କ ସହିତ ହୋଇଛି । ଶିବଦୀପ ଏବଂ ମମତାଙ୍କର ପ୍ରଥମ ଭେଟ ଶିବଦୀପଙ୍କର ଜଣେ ବନ୍ଧୁଙ୍କ ଘରେ ହୋଇଥିବା ଉତ୍ସବରେ ହୋଇଥିଲା । ଆଉ ପ୍ରଥମ ଦେଖାର୍ ହିଁ ଉଭୟଙ୍କ ମଧ୍ୟରେ ପ୍ରେମ ସଂପର୍କ ଗଢିଉଠିଥିଲା । ଏହାପରେ ଉଭୟେ ୨୦୧୪, ଫେବୃୟାରୀ ୨ରେ ବିବାହ କରିଥିଲେ । ସେମାନଙ୍କର ଗୋଟିଏ ପୁଅ ମଧ୍ୟ ରହିଛି ।
ସୌଜନ୍ୟ- ଜନସତ୍ତା