କଂଗ୍ରେସକୁ ଲାଗିପାରେ ବଡ ଝଟକା ! ଅଖିଲେଶ କହିଲେ, ଉତ୍ତରପ୍ରଦେଶ ମହାମେଂଟରେ ସାମିଲ ହେବନି କଂଗ୍ରେସ ।
କନକ ବ୍ୟୁରୋ : ବିଜେପିକୁ ରୋକିବା ପାଇଁ ମହାମେଂଟ ଗଠନ କରୁଥିବା କଂଗ୍ରେସକୁ ଲାଗିପାରେ ବଡ ଝଟକା । ଉତ୍ତରପ୍ରଦେଶ ପରି ସବୁଠୁ ଅଧିକ ଲୋକସଭା ଆସନ ବିଶିଷ୍ଟ ରାଜ୍ୟରେ କଂଗ୍ରେସକୁ ଏକାକି ନିର୍ବାଚନ ଲଢିବାକୁ ପଡିପାରେ । ୟୁପି ମହାମେଂଟରେ କଂଗ୍ରେସ ସାମିଲ ହେବନାହିଁ ବୋଲି କହିଛନ୍ତି ଅଖିଲେଶ । ସେପଟେ ୨୦୧୯ନିର୍ବାଚନରେ ଅଖିଲେଶ ଓ ମାୟାବତୀ ଏକାଠି ଆସି ନିର୍ବାଚନ ଲଢିବେ ଏବଂ ଏଥିପାଇଁ ଆସନ ବୁଝାମୁଣା ସରିଥିବା ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ରରେ ବିଜେପି ସରକାରକୁ ୨୦୧୯ ନିର୍ବାଚନରେ ଚେକ୍ ଦେବା ପାଇଁ କଂଗ୍ରେସ ଚେଷ୍ଟା କରୁଥିଲେ ବି ଦଳକୁ ଜବରଦସ୍ତ ଝଟକା ଲାଗିବାର ଆଶଙ୍କା କରାଯାଉଛି । ବିଶେଷ କରି ସବୁଠାରୁ ଅଧିକ ଲୋକସଭା ଆସନ ବିଶିଷ୍ଟ ଉତ୍ତରପ୍ରଦେଶରେ କଂଗ୍ରେସକୁ ଏକାକି ନିର୍ବାଚନ ଲଢିବାକୁ ପଡିପାରେ । କାରଣ ୟୁପିରେ ଅଖିଲେଶ ଯାଦବଙ୍କ ସମାଜବାଦୀ ପାର୍ଟି ଓ ମାୟାବତୀଙ୍କ ବହୁଜନ ସମାଜ ପାର୍ଟି ସହ ମେଂଟ କରିବାକୁ ତୟାର ଥିବା କଂଗ୍ରେସ ପାଇଁ ଏହା ଅସମ୍ଭବ ମନେ ହେଉଛି ।
ଉତ୍ତରପ୍ରଦେଶ ମହାମେଂଟରେ କଂଗ୍ରେସ ସାମିଲ ହେବନାହିଁ ବୋଲି କହିଛନ୍ତି ଅଖିଲେଶ ଯାଦବ । ମଧ୍ୟପ୍ରଦେଶରେ ସମାଜବାଦୀ ପାର୍ଟିର ଜଣେ ମାତ୍ର ପ୍ରାର୍ଥୀ ଜିତିଥିଲେ । ଏବଂ ତାଙ୍କୁ କଂଗ୍ରେସ ସରକାରରେ ମନ୍ତ୍ରୀ ପଦ ନମିଳିବାରୁ କଂଗ୍ରେସ ଉପରେ ଖପ୍ପା ଅଛନ୍ତି ସମାଜବାଦୀ ପାର୍ଟି ମୁଖ୍ୟ । ଅଖିଲେଶ କହିଛନ୍ତି ଯେ, ସମାଜବାଦୀ ପାର୍ଟିର ସମର୍ଥନ ଯୋଗୁଁ ମଧ୍ୟପ୍ରଦେଶରେ କଂଗ୍ରେସ ମ୍ୟାଜିକ ନମ୍ବର କ୍ରସ କଲା । କିନ୍ତୁ କମଲନାଥଙ୍କ ମନ୍ତ୍ରୀମଣ୍ଡଳରେ ତାଙ୍କ ବିଧାୟକଙ୍କୁ ସ୍ଥାନ ଦେଇନଥିବାରୁ ଧନ୍ୟବାଦ । କଂଗ୍ରେସର ଏପରି ପଦକ୍ଷେପ ଦ୍ୱାରା ତାଙ୍କ ମନରେ ଥିବା ଦ୍ୱନ୍ଦ୍ୱ ଦୂର ହୋଇଯାଇଛି ବୋଲି ଅଖିଲେଶ କହିଛନ୍ତି ।
୨୦୧୯ ନିର୍ବାଚନରେ ଏସପି ଓ ବିଏସପି ଏକାଠି ନିର୍ବାଚନ ଲଢିବେ । ଏଥିପାଇଁ ଆସନ ବୁଝାମଣା ମଧ୍ୟ ସରିଛି । ଏବଂ ମାୟାବତୀଙ୍କ ଜନ୍ମଦିନରେ ଏନେଇ ଘୋଷଣା ହୋଇପାରେ ବୋଲି ଚର୍ଚ୍ଚା ହେଉଛି । ଉତ୍ତରପ୍ରଦେଶ ଉପନିର୍ବାଚନରେ ମାୟାବତୀ ଓ ଅଖିଲେଶଙ୍କ ଯୋଡି ସଫଳ ହୋଇସାରିଛି । ଆଦିତ୍ୟନାଥଙ୍କ ଗଡ କୁହାଯାଉଥିବା ଗୋରଖପୁର ଆସନରେ ବାଜିମାତ କରିଥିଲା ସମାଜବାଦୀ ପାର୍ଟି । ସେହିପରି ଉପମୁଖ୍ୟମନ୍ତ୍ରୀ କେଶବ ପ୍ରସାଦ ମୌର୍ଯ୍ୟଙ୍କ ଆସନ ଫୁଲପୁରରେ ମଧ୍ୟ ବାଜି ମାରିଥିଲା ସମାଜବାଦୀ ପାର୍ଟି । ସେପଟେ ତୃତୀୟ ସାମ୍ମୁଖ୍ୟରେ ଅଖିଲେଶ ସାମିଲ ହେବା ନେଇ ମଧ୍ୟ ସଙ୍କେତ ଦେଇଛନ୍ତି ।
ତେଲେଙ୍ଗାନା ମୁଖ୍ୟମନ୍ତ୍ରୀ କେସିଆରଙ୍କ ତୃତୀୟ ସାମ୍ମୁଖ୍ୟ ଗଠନ ଉଦ୍ୟମକୁ ସମର୍ଥନ ଜଣାଇଛନ୍ତି ଅଖିଲେଶ ଯାଦବ । ଫେଡେରାଲ ଫ୍ରଂଟ ଗଠନ ନେଇ କସରତ କରୁଛନ୍ତି କେସିଆର । ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜି ଓ ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସାକ୍ଷାତ ମଧ୍ୟ କରିସାରିଛନ୍ତି କେସିଆର । ତେଲେଙ୍ଗାନା ମୁଖ୍ୟମନ୍ତ୍ରୀଙ୍କ ଦିଲ୍ଲୀ ଗସ୍ତ ବେଳେ ଅଖିଲେଶଙ୍କୁ ମଧ୍ୟ ସାକ୍ଷାତ କରିବାର ଥିଲା କିନ୍ତୁ ଏହି ସାକ୍ଷାତକାର ହୋଇପାରନିଥିଲା । ତେବେ ହାଇଦ୍ରାବାଦ ଯାଇ ସେଠାରେ କେସିଆରଙ୍କୁ ସାକ୍ଷାତ କରିବେ ବୋଲି ଅଖିଲେଶ କହିଛନ୍ତି ।