ଯାଜପୁରରେ କାଳବୈଶାଖୀର ତାଣ୍ଡବ ! ଭାଙ୍ଗିଗଲା କୋଟିଏ ଟଙ୍କାର ସୁସଜ୍ଜିତ ମଞ୍ଚ, ବନ୍ଦ ହେଲା ବଲିଉଡ ସିଙ୍ଗର ସୋନୁ ନିଗମ ଶୋ । ନିରାଶ ହେଲେ ଦର୍ଶକ
କନକ ବ୍ୟୁରୋ : ଯାଜପୁରରେ ତାଣ୍ଡବ ରଚିଲା କାଳବୈଶାଖୀ । ଭାଙ୍ଗିଦେଲା ଗୋଟିଏ କୋଟି ଟଙ୍କାର ବିଶାଳ ଷ୍ଟେଜ । ପୌରପାଳିକାର ୧୫୦ ବର୍ଷ ପୂର୍ତ୍ତି ଓ ଜିଲ୍ଲା ପ୍ରତିଷ୍ଠାର ୨୫ ବର୍ଷ ପୂର୍ତ୍ତି ଉପଲକ୍ଷେ ହେଉଥିବା ଉତ୍ସବର ଶେଷ ଦିନକୁ ଫିକା କରିଦେଲା କଳାହାଣ୍ଡିଆ ମେଘ । ସବୁଠାରୁ ବଡ କଥା ହେଲା ଆଜି ଉତ୍ସବର ଶେଷ ଦିନ ହୋଇଥିବାରୁ ବଲିଉଡ ସିଙ୍ଗର ସୋନୁ ନିଗମଙ୍କ ଶୋ ରହିଥିଲା । ଯାହାଙ୍କ ଗୀତ ଶୁଣିବା ପାଇଁ ଆଖ ପାଖ ଅଞ୍ଚଳରୁ ପାଖାପାଖି ୧ ଲକ୍ଷ ଲୋକ ଏକାଠି ହୋଇଥିଲେ । କିନ୍ତୁ ସୋନୁ ନିଗମଙ୍କ ଶୋ ପୂର୍ବରୁ ଆରମ୍ଭ ହୋଇଥିଲା କାଳବୈଶାଖୀ । ୫୦ରୁ ୬୦ କିଲୋମିଟର ବେଗରେ ପବନ ବହିବା ଯୋଗୁଁ ବାଳାଶ୍ରମ ପଡିଆରେ ତିଆରି ହୋଇଥିବା ଷ୍ଟେଜଟି ସମ୍ପ୍ରୂ୍ଣ୍ଣ ଭାବେ ଭାଙ୍ଗି ଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
କାଳବୈଶାଖୀର ତାଣ୍ଡବ ଦର୍ଶକଙ୍କୁ ଯେତିକି ବ୍ୟଥିତ କରିନଥିଲା ସୋନୁ ନିଗମ ଶୋ ବନ୍ଦ ହେବା ଦର୍ଶକଙ୍କୁ ଅଧିକ ନିରାଶ କରିଥିଲା । ନିଜ ପ୍ରିୟ ସିଙ୍ଗରଙ୍କ ଝଲକ ଟିକିଏ ପାଇବା ପାଇଁ ବିଭିନ୍ନ ଆଡୁ ଦର୍ଶକ ଆସିଥିଲେ ମଧ୍ୟ ଏହାକୁ ପାଣିଚିଆ କରି ଦେଇଥିଲା କାଳବୈଶାଖୀ । ପୂରା ପଡିଆରେ ମଞ୍ଚର ଭଙ୍ଗା ଖଣ୍ଡ ଦେଖିବାକୁ ମିଳିଥିଲା । ଶେଷରେ କାର୍ଯ୍ୟକ୍ରମକୁ ବାତିଲ କରାଯିବା ପରେ ଦର୍ଶକ ନିରାଶ ହୋଇ ଫେରିଥିଲେ । ତେବେ ଆସନ୍ତା କାଲି ଏହି ଉସ୍ୱବ ହେବ କି ନାହିଁ ସେ ନେଇ ଆୟୋଜକଙ୍କ ପକ୍ଷରୁ କିଛି ସ୍ପଷ୍ଟ କରାଯାଇନି ।