ପୁଅକୁ ଝୁରୁଛି ମା ! ଦାଦନ ଖଟିବାକୁ ଯାଇ ଗଲା ଜୀବନ, ମଲା ପୁଅକୁ ଦେଖିବା ପାଇଁ ଛାତିପିଟି କାନ୍ଦୁଛି ମା ।
ବାପାଙ୍କ ମୃତ୍ୟୁ ପରେ ପରିବାରର ପେଟ ପୋଷିବା ପାଇଁ ପୁଅ ଚାଲିଗଲା ଦାଦନ ଖଟିବାକୁ । ହେଲେ କେଉଁଠି ଥିଲେ ସେ ଯମରାଜଙ୍କ ଦୂତ ବାପା, ପରେ ପୁଅ ବି ଚାଲିଗଲା ଆରପାରିକୁ । ଏବେ ପୁଅର ମୃତଦେହକୁ ଦେଖିବା ପାଇଁ ଝୁରୁଛି ମା’ । ଢ଼େଙ୍କାନାଳ ଜିଲ୍ଲା ସିମିନଇ ଗାଁର ୨୧ ବର୍ଷର ଯୁବକ ପପୁ ରାଉତ ଆଇଟିଆଇ ପାସ କରି ୬ ମାସ ତଳେ ଗୁଜୁରାଟର ଅହମ୍ମଦାବାଦକୁ ଦାଦନ ଖଟିବାକୁ ଯାଇଥିଲା । ସେଠାରେ ‘କୋରିୟର ପ୍ଲାଷ୍ଟିକ’ ନାମକ ଏକ ଘରୋଇ କମ୍ପାନୀରେ ଇଲେକଟ୍ରିସିଆନ ଭାବେ କାମ କରୁଥିଲେ । ହଠାତ୍ ୨୬ ତାରିଖରେ ରାତି ଡ୍ୟୁଟି କରୁଥିବା ବେଳେ ବିଦ୍ୟୁତ ଆଘାତରେ ପପୁଙ୍କର ମୃତ୍ୟୁ ହୋଇଥିଲା । ଘଟଣାକୁ ୩ ଦିନ ବିତି ଯାଇଥିଲେ ମଧ୍ୟ ଏ ଯାଏଁ ମୃତ ପୁଅର ଶରୀର ପାଇପାରିଲେ ନାହିଁ ପରିବାର ଲୋକ ।
Kanak News is now on WhatsApp
Join and get latest news updates delivered to you via WhatsApp
ଭେଣ୍ଡିଆ ପୁଅକୁ ହରାଇ ମା ଛାତିପିଟି କାନ୍ଦୁଛି ହେଲେ ମା ଆଖିର ଲୁହକୁ ପୋଛିବାକୁ ପ୍ରଶାସନ ପଙ୍ଗୁ ପାଲଟି ଯାଇଥିବା ଅଭିଯୋଗ ହୋଇଛି । ସୁଚନା ମୁତାବକ ୬ ମାସ ତଳେ ବାପା ଆରପାରିକୁ ଚାଲିଗଲେ । ପରିବାର ପେଟ ପୋଷିବା ପାଇଁ ପୁଅ ପପୁ ରାଉତ ଚାଲିଗଲା ଗୁଜୁରାଟର ଅହମ୍ମଦାବାଦ ଦାଦନ ଖଟିବାକୁ । ହେଲେ ସେଠାରୁ ପୁଅ ଆଉ ଫେରିଲା ନାହିଁ । ଏପରିକି ନିଜ ମୃତ ପୁଅର ଶରୀରକୁ ବି ଦେଖିବା ପାଇଁ ଛାତିପିଟି କାନ୍ଦୁଛି ମା । ପରିବାର ଲୋକ ଏବଂ ସ୍ଥାନୀୟ ବାସିନ୍ଦା ଜିଲ୍ଲାପାଳଙ୍କୁ ଭେଟି ପପୁ ରାଉତଙ୍କ ମୃତ ଶରୀର ଅହମ୍ମଦାବାଦରୁ ଆଣିବା ପାଇଁ ଗୁହାରି କରିଛନ୍ତି । ହେଲେ ବର୍ତ୍ତମାନ ପଯ୍ୟନ୍ତ ମୃତ ଶରୀରକୁ ଆଣିବା ପାଇଁ କୌଣସି ପଦକ୍ଷେପ ନିଆଯାଇ ନଥିବା ଅଭିଯୋଗ ହୋଇଛି । ତେବେ ଯେଉଁ ମା, ତାର ସ୍ୱାମୀ ଚାଲିଗଲା ପରେ ପୁଅ ସାହାରା ଭାବେ ଜୀବନ କାଟୁଥିଲା । ଏବେ ଜବାନ ପୁଅକୁ ହରାଇ ତା ଆଖିରୁ ଲୁହ ଶୁଖୁନି ।