ଅବ୍ୟବସ୍ଥାର କରୁଣ ଚିତ୍ର ! ବ୍ୟବଚ୍ଛେଦ ପାଇଁ ମା’ର ଶବକୁ ଗାଡିରେ ବାନ୍ଧି ମେଡିକାଲ ନେଲା ପୁଅ ।
ଆଜିକାଲି ଦେଶର ସ୍ୱାସ୍ଥ୍ୟ ବ୍ୟବସ୍ତା କଥା କାହାକୁ ଅଛପା ନାହିଁ । ଦେଶର ସ୍ୱାସ୍ଥ୍ୟ ବ୍ୟବସ୍ଥା ଏତେ ଦୁର୍ବଳ ଯେ, ପ୍ରତିଦିନ ଲୋକମାନେ ଅନେକ ପ୍ରକାର ଅସୁବିଧାର ସମ୍ମୁଖୀନ ହେଉଛନ୍ତି । ସ୍ୱାସ୍ଥ୍ୟ ବ୍ୟବସ୍ଥାର ଅବହେଳା କାରଣରୁ କେଉଁଠି ଲୋକମାନେ ଛଟପଟ ହେଉଛନ୍ତି ତ ଆଉ କେଉଁଠି ସ୍ୱାସ୍ଥ୍ୟ ବ୍ୟବସ୍ଥାର ଅବହେଳା କାରଣରୁ ରୋଗୀର ଜୀବନ ଯାଉଛି । ସେହିଭଳି ଏକ ଅଭାବନିୟ ଘଟଣା ଘଟିଛି ମଧ୍ୟପ୍ରଦେଶର ଟିକମଗଡ଼ ଜିଲ୍ଲାରେ । ସ୍ୱାସ୍ଥ୍ୟ ସେବା ତରଫରୁ ସରକାରୀ ଶବ ବାହାନ ନମିଳିବାରୁ ଜଣେ ମହିଳାଙ୍କ ଶବକୁ ତାଙ୍କ ପୁଅ ବାଇକରେ ବାନ୍ଧି ପୋଷ୍ଟମର୍ଟମ ହାଉସରେ ପହଞ୍ଚାଇବାକୁ ପଡିଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, ମୋହନଗଡ଼ ଥାନା ଅନ୍ତର୍ଗତ ମସ୍ତାନପୁର ଗାଁରେ ବାସ କରୁଥିବା ଜଣେ ମହିଳାଙ୍କୁ ଗତ ସୋମବାର ଦିନ ସାପ କାମୁଡିବା କାରଣରୁ ତାଙ୍କର ମୃତ୍ୟୁ ହୋଇଥିଲା । ମହିଳାଙ୍କ ମୃତ୍ୟୁ ପରେ ପରିଜନ ଲୋକେ ପୋଲିସକୁ ଏ ସମ୍ପର୍କରେ ସୂଚନା ଦେଇଥିଲେ । ଯେହେତୁ ଏହି ଘଟଣାଟି ପୋଲିସର ହସ୍ତଗତ ହୋଇଥିଲା ସେନେଇ ପୋଲିସ ଶବ ବ୍ୟବଚ୍ଛେଦ କରିବା ପାଇଁ ପରିବାର ଲୋକଙ୍କୁ ନିର୍ଦ୍ଦଶ ଦେଇଥିଲା । ମୃତ ମହିଳାଙ୍କ ପୁଅ ଶବ ବ୍ୟବଚ୍ଛେଦ କରିବା ପାଇଁ ଶବ ବାହାନକୁ ଅନେକ ଥର ଫୋନ କରିଥିଲେ । କିନ୍ତୁ ସ୍ୱାସ୍ଥ୍ୟ ସେବା ତରଫରୁ କୌଣସି ବ୍ୟବସ୍ଥା କରାଯାଇ ପାରିନଥିଲା । ଶେଷରେ ନିରାଷ ହୋଇ ଯୁବକ ଜଣକ ମା’ର ଶବକୁ ବାଇକରେ ବନ୍ଧି ଶବ ବ୍ୟବଚ୍ଛେଦ ପାଇଁ ପୋଷ୍ଟମର୍ଟମ ହାଉସ ପହଞ୍ଚିଥିଲେ ।
ସ୍ୱାସ୍ଥ୍ୟ ବ୍ୟବସ୍ଥା ଅବହେଳାର ଏହା ପ୍ରଥମ ଘଟଣା ନୁହେଁ । ଏହିଭଳି ଅନେକ ଘଟଣା ପୂର୍ବରୁ ଘଟିଆସିଛି । ସ୍ୱାସ୍ଥ୍ୟ ବ୍ୟବସ୍ଥାକୁ ସୁଧାରିବା ପାଇଁ ଆଗରୁ ଅନେକ ପଦକ୍ଷେପ ଗ୍ରହଣ କରାଯାଇଛି କିନ୍ତୁ ଏଯାଏ ତାର କୌଣସି ସୁଫଳ ମିଳିପାରି ନାହିଁ । ତେଣୁ ଏହାକୁ ଦୃଷ୍ଟିରେ ରଖି ଯଦି ପ୍ରଶାସନ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରେ ତେବେ ଯାଇଁ ସ୍ୱାସ୍ଥ୍ୟ ବ୍ୟବସ୍ଥା ସୁଧୁରି ପାରିବ ବୋଲି ଆଶା କରାଯାଉଛି ।