ଦେବଗଡ କଲେଜରେ ଅଭାବନୀୟ ଘଟଣା । ପରୀକ୍ଷା କେନ୍ଦ୍ରରେ ସିସିଟିଭି କ୍ୟାମେରା ଲଗାଯିବାକୁ ନେଇ ଛାତ୍ରଙ୍କ ବିରୋଧ, ଖାତା ଧରି ଚାଲିଆସିଲେ ବାହାରକୁ, ପ୍ରଶାସନ କଲା ହସ୍ତକ୍ଷେପ

ପରୀକ୍ଷା କେନ୍ଦ୍ରରେ ଅଭାବନୀୟ କାଣ୍ଡ

127
କନକ ବ୍ୟୁରୋ : ପରୀକ୍ଷା କେନ୍ଦ୍ରରେ ସିସିଟିଭି କ୍ୟାମେରା ଲଗାଯିବା ଘଟଣାକୁ ନେଇ ଦେବଗଡ କଲେଜରେ ଅଭାବନୀୟ ପରିସ୍ଥିତି ସୃଷ୍ଟି ହୋଇଥିଲା। ସିସିଟିଭି ଲାଗିଲେ ପରୀକ୍ଷା ଦେବୁ ନାହିଁ ବୋଲି ଛାତ୍ରଛାତ୍ରୀମାନେ ପରୀକ୍ଷା କେନ୍ଦ୍ର ଛାଡି ବାହାରକୁ ଚାଲିଆସିଥିଲେ। ସ୍ଥିତି ଏମିତି ହୋଇଥିଲା ଯେ ଜିଲ୍ଲାପାଳ ଓ ଏସପି ଘଟଣାରେ ହସ୍ତକ୍ଷେପ କରିଥିଲେ। କିନ୍ତୁ ବିଶୃଙ୍ଖଳା ଅଭିଯୋଗରେ ପରୀକ୍ଷାର୍ଥୀଙ୍କ ଖାତା ଜବତ କରାଯାଇଛି। ଅଭିଯୋଗ ଉଠିଛି ଯେ ସମ୍ଭବତଃ କପି ପାଇଁ ସୁଯୋଗ ଆଉ ମିଳିବ ନାହିଁ ବୋଲି ଜାଣିବା ପରେ କିଛି ଛାତ୍ରଛାତ୍ରୀ ଏଭଳି ପ୍ରତିକ୍ରିୟା ପ୍ରକାଶ କରିଥିଲେ। କପି ଓ ପରୀକ୍ଷା ପରିଚାଳନାରେ ବିଭ୍ରାଟ ରୋକିବା ପାଇଁ ରାଜ୍ୟ ସରକାର ପରୀକ୍ଷା କେନ୍ଦ୍ରରେ ସିସିଟିଭି ଲଗାଯିବା ଉପରେ ଗୁରୁତ୍ୱାରୋପ କରିଛନ୍ତି। ଏହି କ୍ରମରେ ରାଜ୍ୟର ପ୍ରାୟ ସବୁ ପରୀକ୍ଷା କେନ୍ଦ୍ରରେ ସିସିଟିଭି ଲଗାଯାଇଛି। କିନ୍ତୁ ଛାତ୍ରଛାତ୍ରୀମାେନ ଏବେ ସିସିଟିଭିକୁ ବିରୋଧ କରିବା ଆରମ୍ଭ କଲେଣି।

ଆଜି ଦେବଗଡ କଲେଜରେ ଏହାକୁ ନେଇ ତୁମୁଳକାଣ୍ଡ ହୋଇଛି। ମଙ୍ଗଳବାର +୨ ବିଜ୍ଞାନର ପଦାର୍ଥ ବିଜ୍ଞାନ ପରୀକ୍ଷା ଥିଲା। ହେଲେ ପରୀକ୍ଷାର୍ଥୀ ସିସିଟିଭି କ୍ୟାମେରା ସମ୍ମୁଖରେ ବସି ପରୀକ୍ଷା ଦେବାକୁ ଅମଙ୍ଗ ହୋଇଥିଲେ। ହଠାତ୍ କେତେକ ଛାତ୍ରଛାତ୍ରୀ ପରୀକ୍ଷା କେନ୍ଦ୍ରରୁ ଉଠି ଆସିଥିଲେ। କ୍ୟାମେରା ସାମ୍ନାରେ ବସି ପରୀକ୍ଷା ଦେବେ ନାହିଁ ବୋଲି ଜିଦ୍ ଧରିଥିଲେ। କାହିଁକି ଦେବ ନାହିଁ ବୋଲି ଅଧ୍ୟାପକମାନେ ଯେତେ ବୁଝାସୁଝା କରିଥିଲେ ମଧ୍ୟ ତାହା ସେମାନଙ୍କୁ ପ୍ରଭାବିତ କରି ପାରିନଥିଲା। ଏକଥା ସୂଚାଇ ଦେଇଥିଲା ଯେ ସମ୍ଭବତଃ କପି କରିବାକୁ ସୁେଯାଗ ମିଳିବ ନାହିଁ ବୋଲି ଜାଣିବା ପରେ କିଛି ଛାତ୍ରଛାତ୍ରୀ ଏଭଳି ଉତକ୍ଷିପ୍ତ ହୋଇପଡିଥିଲେ।
ଏହାକୁ ନେଇ କିଛି ସମୟ ଧରି କଲେଜରେ ଉତ୍ତେଜନା ପରିସ୍ଥିତି ଦେଖାଦେଇଥିଲା। ପରିସ୍ଥିତି ଅଣାୟତ୍ତ ହେବାରୁ କଲେଜ ଅଧ୍ୟକ୍ଷା ସନ୍ତୋଷିନୀ ଶତପଥୀ ଏ ସଂପର୍କରେ ଜିଲ୍ଲାପାଳ ସୁଧାଂଶୁ ମୋହନ ସାମଲ ଏବଂ ଏସପି ରାହୁଲ ଜୈନଙ୍କୁ ସୂଚନା ଦେଇଥିଲେ। ଜିଲ୍ଲାପାଳ ଓ ଏସପି କଲେଜରେ ପହଞ୍ଚି ଛାତ୍ରଛାତ୍ରୀଙ୍କୁ ବୁଝାସୁଝା କରିଥିଲେ। ପରେ ପରିସ୍ଥିତ ଶାନ୍ତ ପଡ଼ିଥିଲା। ମୋଟ ୧୨୮ ଜଣ ଛାତ୍ରଛାତ୍ରୀ ପରୀକ୍ଷା ଦେଉଥିବା ବେଳେ ଜଣେ ଅନୁପସ୍ଥିତ ଥିଲେ। ବିଶୃଙ୍ଖଳା ପାଇଁ ୬୮ଜଣ ପରୀକ୍ଷାର୍ଥୀଙ୍କ ଖାତା ଜବତ କରି କଣ୍ଟ୍ରୋଲରଙ୍କ ପାଖକୁ ପଠାଯାଇଛି। ପରୀକ୍ଷା ଦେଇଥିବା ଅନ୍ୟ ୫୯ ପରୀକ୍ଷାର୍ଥୀଙ୍କ ଖାତା ମୂଲ୍ୟାଙ୍କନ ପାଇଁ ପଠାଇଯାଇଥିବା ଅଧ୍ୟକ୍ଷା ଶ୍ରୀମତୀ ଶତପଥୀ ସୂଚନା ଦେଇଛନ୍ତି। ଏଥି ସହ ଏ ବାବଦରେ ଶ୍ରୀମତୀ ଶତପଥୀ କଣ୍ଟ୍ରୋଲରଙ୍କୁ ମଧ୍ୟ ଜଣାଇଥିବା ପ୍ରକାଶ କରିଛନ୍ତି।

ମତାମତ

Your email address will not be published.