ସିଆରପିଏଏଫ ଯବାନଙ୍କ ଉପସ୍ଥିତି ନେଇ କିଛି ସ୍ଥାନୀୟ ଲୋକେ ମାଓବାଦୀଙ୍କୁ ଖବର ଦେଇଥିବା ସୂଚନା !
କନକ ବ୍ୟୁରୋ : ସୁକମାରେ ସିଆରପିଏଏଫର ସମସ୍ତ ସତର୍କତା ସତ୍ୱେ ସେମାନଙ୍କ ଉପସ୍ଥିତି ନେଇ କିଛି ସ୍ଥାନୀୟ ଲୋକେ ମାଓବାଦୀଙ୍କୁ ଖବର ଦେଇଥିଲେ । ଫଳରେ ପ୍ରାୟ ୩ଶହରୁ ଅଧିକ ପୁରୁଷ ଓ ମହିଳା ମାଓବାଦୀ ଯବାନଙ୍କୁ ଘେରି ଅତର୍କିତ ଆକ୍ରମଣ କରିଥିଲେ । ମାଓବାଦୀମାନେ ପ୍ରଥମେ ଆଇଡି ବିସ୍ଫୋରଣ କରିବା ପରେ ଚାରିପଡୁ ଯବାନମାନଙ୍କୁ ଘେରି ଗୁଳିବର୍ଷଣ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ପାଲଟା ଆକ୍ରମଣରେ ପ୍ରାୟ ୧୨ ଜଣ ମାଓବାଦୀ ଆହତ ହୋଇଥିଲେ ବି ସିଆରପିଏଫ ଯବାନଙ୍କ ମୃତ୍ୟୁସଂଖ୍ୟା ଅଧିକ ହୋଇଥିଲା । ଆକ୍ରମଣ ପରେ ଜଣେ କଂପାନୀ କମାଣ୍ଡର ଓ ୩ ଜଣ ଯବାନ ନିଖୋଜ ଅଛନ୍ତି । ଅନେକ ଯବାନ ଗୁରୁତର ଥିବାରୁ ମୃତ୍ୟୁସଂଖ୍ୟା ବଢିବା ଆଶଙ୍କା କରାଯାଉଛି । ଛତିଶଗଡର ମାଓ ପ୍ରବଣ ଅଂଚଳରେ ରାସ୍ତା କାମ ଚାଲିଥିବାରୁ ମାଓବାଦୀମାନେ ଏହାକୁ ବିରୋଧ କରିଥିଲେ ।
ତେଣୁ ରାସ୍ତା କାମ କରାଇନଦେବାକୁ ମାଓବାଦୀମାନେ ଏହି ଆକ୍ରମଣ କରିଥିବା ସନ୍ଦେହ କରାଯାଉଛି । ଓଡିଶା, ଆନ୍ଧ୍ର ଓ ମହାରାଷ୍ଟ୍ରରେ ମାଓବାଦୀ ସକ୍ରିୟ ଥିଲେ ବି ଛତିଶଗଡ ଏବେ ମାଓବାଦୀଙ୍କ ମୁଖ୍ୟ ଟାର୍ଗେଟ ପାଲଟିଛି । ୨୦୧୦ରୁ ଏବେ ସୁଦ୍ଧା ମାଓବାଦୀ ଆକ୍ରମଣରେ ୨୦୦ ଯବାନ ସହିଦ ହେଲେଣି ।