କନକ ବ୍ୟୁରୋ : ମନରେଗା ଯୋଜନାରେ ଅର୍ଥ ହରିଲୁଟ୍ । କାମ କରିନଥିବା ହିତାଧିକାରୀଙ୍କ ଆକାଉଂଟରେ ଜମା ହୋଇଛି ଟଙ୍କା । ଜବକାର୍ଡଧାରୀଙ୍କ ନାଁ ମାଷ୍ଟର ରୋଲରେ ଏଂଟ୍ରି କରି ପାରିଶ୍ରମିକ ବାବଦକୁ ଲକ୍ଷାଧିକ ଟଙ୍କା ଆତ୍ମସାତ୍ ହୋଇଛି । ପ୍ରାୟ ୬ଟି ମାଟି ରାସ୍ତାକାମ ବାବଦକୁ ୧୨୭ ଜଣ ଜବକାର୍ଡଧାରୀଙ୍କ ନାଁରେ ମିଛ ଏଂଟ୍ରି କରାଯାଇ ପ୍ରାୟ ୬ ଲକ୍ଷ ୪୪ ହଜାର ଟଙ୍କା ହଡପ କରାଯାଇଛି । ବାର୍ଦ୍ଧକ୍ୟ ଜନିତ ରୋଗରେ ପଡିଥିବା ବୃଦ୍ଧା, ବାହାର ରାଜ୍ୟରେ ଦାଦନ ଖଟୁଥିବା ଜବକାର୍ଡଧାରୀ ଯୁବକଙ୍କ ବ୍ୟାକ ପାସବୁକରେ ଟଙ୍କା ଜମା କରାଯାଇଛି । ଗୋଟିଏ ରାସ୍ତା ପାଇଁ ପ୍ରାୟ ୨୦ ଜଣଙ୍କ ନାଁରେ ମିଛ ଫର୍ଜି ଏଂଟ୍ରି କରି ଲକ୍ଷେ କୋଡିଏ ହଜାର ଚଳୁ କରାଯାଇଛି । ଗାଁ ସାଥୀ, ଜବକାର୍ଡଧାରୀଙ୍କ ଜବକାର୍ଡ ଓ ପାସବୁକ ନିଜ ପାଖରେ ରଖି ଏଭଳି କରୁଥିବା ଅଭିଯୋଗ ହୋଇଛି । ଏଭଳି ଅନିୟମିତତା ୨୦୧୨-୧୩ରୁ ଆଜି ଯାଏଁ ଚାଲିଛି ।
Kanak News is now on WhatsApp
Join and get latest news updates delivered to you via WhatsApp
ମନରେଗାରେ କାମ କରିନଥିବା ଜବକାର୍ଡଧାରୀଙ୍କ ଆକାଉଁଟରେ ଟଙ୍କା ଜମା କରାଯାଉଛି ହେଲେ କାମ କରିଥିବା ହିତାଧିକାରୀ ପାଉଣା ପାଇଁ ଅପେକ୍ଷା କରିଛନ୍ତି । ଜଣେ କି ଦୁଇ ଜଣ ନୁହେଁ ଶହେରୁ ଅଧିକ ଜବକାର୍ଡଧାରୀ ପାରିଶ୍ରମିକ ପାଇନଥିବା ବେଳେ ଟଙ୍କା ମାଗିଲେ ଗାଁ ସାଥୀ କାମ ଦେଉନଥିବା ଅଭିଯୋଗ ହୋଇଛି । ସେପଟେ ଏ ଅଭିଯୋଗ ପରେ ଘଟଣାର ତଦନ୍ତ ନିର୍ଦେଶ ଦିଆଯାଇଥିବା କହିଛନ୍ତି ସୁନ୍ଦରଗଡ ଜିଲ୍ଲାପାଳ ବିନୀତ ଭରଦ୍ୱାଜ ।
ମହାତ୍ମାଗାନ୍ଧୀ ନିଶ୍ଚିତ କର୍ମ ନିଯୁକ୍ତ ଯୋଜନାରେ କାମ କରି ହିତାଧୀକାରୀ ପାରିଶ୍ରମିକ ନପାଇ ଭୋକରେ ଥିବା ବେଳେ କାମ କରିନଥିବା ଜବକାର୍ଡଧାରୀଙ୍କ ଆକାଉଁଟରେ ଟଙ୍କା ଜମା କରି ମାଲାମାଲ ହେଉଛନ୍ତି କାମ ଯୋଗାଉଥିବା ଗାଁ ସାଥୀ ।