୪୦ ହଜାର ଟଙ୍କାରେ ବିକ୍ରିହେଲେ ସୁନ୍ଦରଗଡର ଆଦିବାସୀ ଯୁବତୀ ! ଦିଲ୍ଲୀରୁ ଆସିଲା ମୁକୁଳାଇବାକୁ ଆକୂଳ ନିବେଦନର ଏକ୍ସକ୍ଲୁସିଭ ଭିଡିଓ
କନକ ବ୍ୟୁରୋ : ୪୦ ହଜାର ଟଙ୍କାରେ ବିକ୍ରି ହେଲେ ଆଦିବାସୀ ଯୁବତୀ । ଆଉ ଦିଲ୍ଲୀରୁ ଆସିଲା ମୁକୁଳାଇବାକୁ ଅପିଲର ଏକ୍ସକ୍ଲୁସିଭ ଭିଡିଓ । ଦିଲ୍ଲୀ ସଙ୍ଗମ ବିହାରରେ ନିର୍ଯାତିତ ହେଉଥିବା ଯୁବତୀ କରିଛନ୍ତି ଆକୂଳ ନିବେଦନ । ୪ବର୍ଷ ହେଲା କାମ କରିବାକୁ ଯାଇ ଘରକୁ ଫେରି ପାରିନାହାନ୍ତି ସୁନ୍ଦରଗଡର ଜଣେ ଯୁବତୀ । ବିଳାସପୁରରେ କାମ କରାଇଦେବାକୁ କହି ସୁନ୍ଦରଗଡ ଜିଲ୍ଲା ଲେଫ୍ରିପଡା ଅଂଚଳର ଜଣେ ଯୁବତୀଙ୍କୁ ନେଇଯାଇଥିଲା ଜଣେ ଦଲାଲ । ହେଲେ ବିଳାସପୁର ନେବା ପରିବର୍ତ୍ତେ ଦିଲ୍ଲୀରେ ଏକ ଠିକା ସଂସ୍ଥାକୁ ୪୦ ହଜାର ଟଙ୍କାରେ ବିକ୍ରି କରିଦେଇଥିଲା ।
Kanak News is now on WhatsApp
Join and get latest news updates delivered to you via WhatsApp
ହୋଇଥିବା ଅଭିଯୋଗ ଅନୁସାରେ ସଂପୃକ୍ତ ଠିକାସଂସ୍ଥା ପୁଣି ବାସମତୀଙ୍କୁ ଆଉ ଜଣଙ୍କ ଘରେ କାମ କରିବାକୁ ବିକ୍ରି କରିଦେଇଥିଲା । ଯେଉଁଠି ଏବେ ଅକଥନୀୟ ନିର୍ଯାତନାର ଶିକାର ହେଉଛନ୍ତି ଯୁବତୀ ଜଣକ । ଗତ ୪ବର୍ଷ ହେଲା ନୂଆଦିଲ୍ଲୀର ସଙ୍ଗମ ବିହାରରେ ଜଣଙ୍କ ଘରେ କାମ କରୁଛନ୍ତି ସୁନ୍ଦରଗଡର ଆଦିବାସୀ ଝିଅ । ଯୁବତୀଙ୍କୁ ନିଜ ଘର ସହ କୌଣସି ଯୋଗାଯୋଗ କରିବାକୁ ଦିଆଯାଉନଥିବା ସହ ସେଠାରେ ତାଙ୍କୁ ବିଭିନ୍ନ ନିର୍ଯାତନା ଦିଆଯୋଉଥିବା ନେଇ ସେ କୌଣସିମତେ ଏକ ଭିଡିଓ ପଠାଇଛନ୍ତି ।
କୌଣସି ପାରିଶ୍ରମିକ ଦିଆଯାଉନଥିବାବେଳେ ତାଙ୍କ ମୋବାଇଲକୁ ମଧ୍ୟ ଛଡାଇ ନେଇଛନ୍ତି ମାଲିକ । ଏବେ ଘରକୁ ଫେରିଆସିବା ପାଇଁ ଭିଡିଓ କଲିଂରେ ନିବେଦନ କରିଛନ୍ତି । ଏପଟେ ୪ବର୍ଷ ହେଲା ଝିଅ ଅପେକ୍ଷାରେ ରହିଛନ୍ତି ବାପା, ମାଆ । କେବଳ ଏହି ଗୋଟିଏ ଘଟଣା ନୁହେଁ ସୁନ୍ଦରଗଡ ବିରବିରା ଅଂଚଳର ଦୁଇଟି ଝିଅ ମଧ୍ୟ ଦିଲ୍ଲୀ ସଙ୍ଗମ ବିହାରରେ ଫଶିରହିଥିବା ଜଣାପଡିଛି । ସେହିପରି ଦିଲ୍ଲୀର ଏକ ସ୍ୱେଚ୍ଛାସେବୀ ସଂସ୍ଥା ‘ନାଓ’ ଏବଂ ସୁନ୍ଦରଗଡରେ କାମ କରୁଥିବା ଏନଜିଓ ‘ପ୍ରଗତୀ’ର ସୂଚନା ଅନୁସାରେ ସୁନ୍ଦରଗଡରୁ ପ୍ରାୟ ୪୩ ହଜାର ଯୁବତୀ ଏଭଳି ବିଭିନ୍ନ ରାଜ୍ୟକୁ ଚାଲାଣ ହୋଇଛନ୍ତି ।