ବିଜେପୁରରେ ମୁଖ୍ୟମନ୍ତ୍ରୀଙ୍କୁ ଆକ୍ରମଣ ଉଦ୍ୟମ ଘଟଣା ! ପୋଲିସ କହିଲା, ଚପଲ ମାରିଥିବା ବ୍ୟକ୍ତି ବିଜେପିର । ନରସିଂହ କହିଲେ, ଟଙ୍କା ଓ ବାହୁବଳର ସଂଘର୍ଷରେ ପରିଣତ ହୋଇଛି ବିକାଶର ଲଢେଇ
କନକ ବ୍ୟୁରୋ: ମୁଖ୍ୟମନ୍ତ୍ରୀଙ୍କ ଉପରକୁ ଆକ୍ରମଣ ଉଦ୍ୟମ ଘଟଣା । ନବୀନ ପଟ୍ଟନାୟକଙ୍କ ଉପରକୁ ଚପଲ ଫିଙ୍ଗିଥିବା ବ୍ୟକ୍ତି ଜଣକ ବିଜେପି ସମର୍ଥକ ବୋଲି କହିଛି ବରଗଡ ପୋଲିସ । ବରଗଡ ଡିଏସପି କହିଛନ୍ତି, ତାଙ୍କ ନାଁ କାର୍ତ୍ତିକ ମେହେର ଓ ସେ ବୁଢାପାଲି, ପଦ୍ମପୁର ଅଂଚଳର । ଏପରିକି ତାଙ୍କ ପକେଟରୁ ବିଜେପି ପତାକା ମିଳିଥିବା ସେ ସୂଚନା ଦେଇଛନ୍ତି । ଏଥିସହ ପଚରା ଉଚରା ବେଳେ ସେ ବିଜେପି ପ୍ରାର୍ଥୀ ଅଶୋକ ପାଣିଗ୍ରାହୀଙ୍କ ସହ ବୁଢାପାଲି, ପଦ୍ମପୁରର ଦୁଇଜଣ କିଶୋର ବହିଦାର ଓ ଲୋକନାଥ ପଟେଲ ତାଙ୍କୁ ଶିଖାଇ ପଠାଇଥିଲେ ବୋଲି ପୋଲିସକୁ କହିଥିବା ଡିଏସପି ସୂଚନା ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ମୁଖ୍ୟମନ୍ତ୍ରୀଙ୍କ ଉପରକୁ ଯୋତା ଫିଙ୍ଗିଥିବାରୁ ତାଙ୍କ ବିରୋଧରେ ଭାରତୀୟ ଦଣ୍ଡବିଧି ଆଇନର ଧାରା ୧୨୦ ବି ଅର୍ଥାତ ଅପରାଧ ଷଡଯନ୍ତ୍ର ଓ ରିପ୍ରେଜେଂଟେସନ ଅଫ ପିପୁଲ୍ସ ଆକ୍ଟର ଧାରା ୧୨୭ ଲଗାଇଛି ପୋଲିସ । ଏଥିସହ ଧାରା ୪୪୮ ଅର୍ଥାତ ଯୋଜନାବଦ୍ଧ ଭାବେ ଆଘାତ ପହଂଚାଇବା, ୩୪୧ ଅର୍ଥାତ ବଳପୂର୍ବକ କାମରେ ବାଧାଦେବା, ୩୩୬- ଅନ୍ୟର ଜୀବନକୁ ବିପଦରେ ପକାଇବା ଓ ଧାରା ୩୫୫ ଅର୍ଥାତ ଅନ୍ୟକୁ ଅସମ୍ମାନ କରିବା ଆଦି ଦଫା ଅଭିଯୁକ୍ତଙ୍କ ବିରୋଧରେ ଲାଗିଛି ।
ଉଲ୍ଲେଖଥାଉ କି, ଗତକାଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉପରେ ଆକ୍ରମଣ ଉଦ୍ୟମ ହୋଇଥିଲା । ଉପନିର୍ବାଚନ ପ୍ରଚାର ପାଇଁ ବିଜେପୁରରେ ଥିବା ମୁଖ୍ୟମନ୍ତ୍ରୀଙ୍କୁ ଆକ୍ରମଣ ଉଦ୍ୟମ ହୋଇଛି । କୁମ୍ଭାରୀରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉଦବୋଧନ ଦେଉଥିବା ବେଳେ ସଭା ଭିତରୁ ଜଣେ ଯୁବକ ମୁଖ୍ୟମନ୍ତ୍ରୀଙ୍କ ଉପରକୁ ଜୋତା ଫୋପାଡିଥିଲେ । ଏପରିକି ଦୁଇ ଦୁଇଥର ଜୋତା ଫୋପାଡିଥିଲେ ଯୁବକ ଜଣକ । ତେବେ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସୁରକ୍ଷାକର୍ମୀ ତାକୁ ଅଟକାଇଥିଲେ । ଏଥିସହ ଆକ୍ରମଣକାରୀ ଯୁବକଙ୍କୁ କାବୁ କରିନେଇଥିଲେ ସୁରକ୍ଷାକର୍ମୀ । ତେବେ ଏହି ଘଟଣା ସୁରକ୍ଷା ବ୍ୟବସ୍ଥା ପ୍ରତି ବଡ ପ୍ରଶ୍ନ ସୃଷ୍ଟି କରିଛି ।
ଏଠାରେ ଆମେ କହି ରଖୁଛୁ କି, ପୂର୍ବରୁ ବି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ଉପରକୁ ହୋଇଥିଲା ଜୋତାମାଡ । ୨୦୧୬ ଏପ୍ରିଲରେ ଯେତେବେଳେ ମୁଖ୍ୟମନ୍ତ୍ରୀ ଦିଲ୍ଲୀରେ ଦ୍ୱିତୀୟଥର ଲାଗି ଅଡ-ଇଭିନ ଫର୍ମୁଲା ଲାଗୁ କରିବାକୁ ସାମ୍ବାଦିକ ସମ୍ମିଳନୀ କରୁଥିଲେ ଠିକ ସେତିକିବେଳେ ସାମ୍ନାରେ ବସିଥିବା ଲୋକଙ୍କ ମଧ୍ୟରୁ ଜଣେ ଯୁବକ ହଠାତ ତାଙ୍କ ଉପରକୁ ଜୋତା ଫିଙ୍ଗିବାକୁ ଉଦ୍ୟମ କରିଥିଲେ । ହେଲେ ମୁଖ୍ୟମନ୍ତ୍ରୀଙ୍କ ଦେହରେ ଜୋତା ବାଜିନଥିଲା, କାରଣ ଜୋତାଟିକୁ ଧରି ଦେଇଥିଲେ କେଜ୍ରିୱାଲଙ୍କ ଜଣେ ସମର୍ଥକ । ଜୋତା ଫିଙ୍ଗିଥିବା ଯୁବକଙ୍କୁ ସଙ୍ଗେସଙ୍ଗେ କାବୁ କରିନେଇ ଥିଲେ ସେଠାରେ ଉପସ୍ତିତ ସୁରକ୍ଷା କର୍ମୀ । ପରେ ଜଣା ପଡିଥିଲା ସେହି ବ୍ୟକ୍ତି ଜଣକ ବେଦ ପ୍ରକାଶ ଏବଂ ସେ ଆମ ଆଦମୀ ସେନାର ଜଣେ ସଦସ୍ୟ । ସିଏନଜି ଷ୍ଟିକର ଆବଂଟନରେ ବ୍ୟାପକ ଦୁର୍ନୀତି ହୋଇଥିବା ଦର୍ଶାଇ ନିଜର ପ୍ରତିବାଦ ପ୍ରଦର୍ଶନ କରିବାକୁ ସେ ଏଭଳି ଜୋତା ଫିଙ୍ଗିଥିବା କହିଥିଲେ । ବିଭିନ୍ନ ଫୋରମରେ ଦୁର୍ନୀତି ନେଇ ସେ ଅଭିଯୋଗ କରିଥିଲେ ସୁଦ୍ଧା କୌଣସି କାର୍ଯ୍ୟାନୁଷ୍ଠାନ ନିଆଯାଇ ନଥିବାରୁ ସେ ତାଙ୍କ ଅସନ୍ତୋଷ ବ୍ୟକ୍ତ କରିଥିଲେ ।
ଏହା ପୂର୍ବରୁ ଦିଲ୍ଲୀ ମୁଖ୍ୟମନ୍ତ୍ରୀଙ୍କ ଉପରକୁ ମଧ୍ୟ ସାଧାରଣ ସଭାରେ କାଳି ମାଡ କରିବା ଭଳି ଖବର ଚର୍ଚ୍ଚାରେ ରହିଥିଲା । ୨୦୧୬ ଜାନୁଆରୀରେ ପ୍ରଥମ ପର୍ଯ୍ୟାୟ ଅଡ-ଇଭିନ ଫର୍ମୁଲା ସଫଳ ହେବା ପରେ ଦିଲ୍ଲୀ ଛତ୍ରଶାଲ ଷ୍ଟାଡିଅମରେ ଏକ ସାଧାରଣ ସଭାକୁ ସମ୍ବୋଧିତ କରୁଥିଲେ କେଜ୍ରିୱାଲ । ଏତିକିବେଳେ ଡାଏସ ନିକଟକୁ ଆସି ହଠାତ ଜଣେ ଯୁବତୀ ତାଙ୍କ ଉପରକୁ କାଳି ଫିଙ୍ଗିଥିଲେ । କେବଳ କାଳି ନୁହେଁ କିଛି କାଗଜପତ୍ର ଓ ସିଡି ମଧ୍ୟ ଫୋପାଡିଥିଲେ । ଆଉ ତାଙ୍କୁ ତିରନ୍ତ କାବୁ କରିନେଇଥିଲା ପୋଲିସ ।
ସେହିପରି ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଅଶୋକ ଚୌହାଣଙ୍କ ଉପରେ ହୋଇଥିଲା କାଳିମାଡ । ଗତବର୍ଷ ଫେବ୍ରୁଆରୀରେ ନାଗପୁର ହସନବାଗ ଅଂଚଳରେ ନିର୍ବାଚନୀ ରାଲି ସମୟରେ କଂଗ୍ରେସ ପ୍ରାର୍ଥୀଙ୍କ ପାଇଁ ପ୍ରଚାର କଲାବେଳେ ହଠାତ ତାଙ୍କ ମୁହଁକୁ କାଳି ଫିଙ୍ଗିଥିଲେ ଜଣେ କର୍ମୀ । ଟିକେଟ ଆବଂଟନକୁ ନେଇ ଅସନ୍ତୁଷ୍ଟ ଥିବା ଗୋଷ୍ଠୀ ପକ୍ଷରୁ ଚୌହାଣଙ୍କୁ ଏଭଳି ପ୍ରତିବାଦ କରାଯାଇଥିବା ଜଣାପଡିଥିଲା । କାଳିମାଡ କରିଥିବା ଅସନ୍ତୁଷ୍ଟ କଂଗ୍ରେସ କର୍ମୀ ଲଳିତ ବାଘେଲଙ୍କୁ ପୋଲିସ ହେପାଜତକୁ ନେବା ପୂର୍ବରୁ କାବୁ କରିନେଇଥିଲେ ଚୌହାଣଙ୍କ ସମର୍ଥକ ଆଉ ନିସ୍ତୁକ ପିଟିଥିଲେ । ପରେ ପୁରା ଘଟଣା ପାଇଁ ଆରଏସଏସ ଷଡଯନ୍ତ୍ର କରିଥିବା ଅଭିଯୋଗ କରିଥିଲେ ମହାରାଷ୍ଟ୍ର ପୂର୍ବତନ ମୁଖ୍ୟମନ୍ତ୍ରୀ ଅଶୋକ ଚୌହାଣ ।
ତେବେ ଆକ୍ରମଣକୁ ଖାତିର ନକରି ରାତିରେ କୁମ୍ଭାରୀ ଅଂଚଳର ଗାଁ ଭିତରେ ବୁଲିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଲୋକଙ୍କୁ ଭେଟିଛନ୍ତି ଏବଂ ବିଜେଡି ପ୍ରାର୍ଥୀ ରୀତା ସାହୁଙ୍କ ପାଇଁ ଭୋଟ ମାଗିଛନ୍ତି । ଅନ୍ୟପଟେ ନବୀନ ପଟ୍ଟନାୟକଙ୍କ ଉପରେ ପ୍ରଚାରସଭାରେ ହୋଇଥିବା ଆକ୍ରମଣକୁ ନିନ୍ଦା କରିଛନ୍ତି ସ୍ଥାନୀୟ ଲୋକେ । ଏହି ଆକ୍ରମଣ ଘଟଣା ନେଇ ଏକ ସାମ୍ବାଦିକ ସମ୍ମିଳନୀ କରିଛି ବିଜେଡି । ସାଂସଦ ପ୍ରସନ୍ନ ଆଚାର୍ଯ୍ୟ, ପୂର୍ବତନ ମନ୍ତ୍ରୀ ସଂଜୟ ଦାସବର୍ମା ଓ ପ୍ରାର୍ଥୀ ରୀତା ସାହୁ ଉପସ୍ଥିତ ରହି ଘଟଣାକୁ ନିନ୍ଦା କରିଛନ୍ତି । ବିରୋଧୀ ହତାଶ ହୋଇ ଏଭଳି କାଣ୍ଡ ଭିଆଇଥିବା ସେମାନେ ଅଭିଯୋଗ କରିଛନ୍ତି । ତେବେ ହିଂସାର ଜବାବ ଅହିଂସା ବାଟରେ ବିଜେପୁରବାସୀ ଦେବେ ବୋଲି ବିଜେଡି ଉପସଭାପତି ପ୍ରସନ୍ନ ଆଚାର୍ଯ୍ୟ କହିଛନ୍ତି ।
ଅନ୍ୟପକ୍ଷରେ ବିଜେପି କହିଛି ଗଣତନ୍ତ୍ରରେ ହିଂସାର କୌଣସି ସ୍ଥାନ ନାହିଁ । ବିଜେପି ଉପସଭାପତି ସମୀର ମହାନ୍ତି କହିଛନ୍ତି ଯେ, ଅଣ୍ଡା କିମ୍ବା ଚପଲ ମାଡକୁ ବିଡେପି ନିନ୍ଦା କରୁଛି । ତେବେ ଚପଲ ମାଡ କରିଥିବା ଯୁବକ ବିଡେପିର ବୋଲି ହେଉଥିବା ଅଭିଯୋଗ ନେଇ ସେ କହିଛନ୍ତି ତଦନ୍ତ ପରେ ସବୁ କଥା ସାମ୍ନାକୁ ଆସିବ । କଂଗ୍ରେସ ମଧ୍ୟ ଏ ନେଇ ପ୍ରତିକ୍ରିୟା ରଖିଛି ।
From a contest on development to a fight of money power and now a battle of brawn . What has the #BijepurBypoll become and what’s in store for 2019? Let’s hope people reject the violent political agenda .
— Narasingha Mishra (@NarasinghMishra) February 20, 2018
ମୁଖ୍ୟମନ୍ତ୍ରୀଙ୍କ ଉପରେ ଯୋତାମାଡ ଘଟଣାକୁ ନିନ୍ଦା କରି ଟ୍ୱିଟ କରିଛନ୍ତି ବିରୋଧୀ ଦଳ ନେତା ନରସିଂହ ମିଶ୍ର । ବିକାଶର ଲଢେଇ ପ୍ରଥମେ ଅର୍ଥବଳ ଓ ପରେ ବାହୁବଳର ସଂଘର୍ଷରେ ପରିଣତ ହୋଇଥିବା ସେ ଲେଖିଛନ୍ତି । ଏବଂ ୨୦୧୯ ବେଳକୁ ଏହା କିଭଳି ରୂପ ନେବ ବୋଲି ଆଶଙ୍କା ପ୍ରକାଶ କରିଛନ୍ତି ନରସିଂହ ମିଶ୍ର ।
ସେପଟେ ଆଜି ବି ବିଜେପୁରରେ ଜମିବ ପ୍ରଚାର । ପ୍ରଚାର ଶେଷ ପାଇଁ ୩୬ ଘଂଟାରୁ କମ ସମୟ ରହିଛି । ଆଜି ଲଗାତାର ଦ୍ୱିତୀୟ ଦିନ ପାଇଁ ବିଜେଡି ପାଇଁ ପ୍ରଚାର କରିବେ ନବୀନ ପଟ୍ଟନାୟକ । ଗାଇସିଲଟ ଓ ବିଜେପୁରରେ ସେ ପ୍ରଚାର କରିବେ । ସେହିଭଳି କେନ୍ଦ୍ରମନ୍ତ୍ରୀ ରାମକୃପାଲ ଯାଦବ ଓ ଧର୍ମେନ୍ଦ୍ର ପ୍ରଧାନ ବି ସାମିଲ ହେବେ ପ୍ରଚାରରେ । ରାମକ୍ରିପାଲ ଯାଦବ ରୋଡ ଶୋ କରିବା ସହ ୯ଟି ସାଧାରଣ ସଭାରେ ଯୋଗଦେବେ ।