ସୁର ସାମ୍ରାଜ୍ୟର ପତନକୁ ଦୁଇ ବର୍ଷ ପୂରିଲା ! ଝିଣ୍ଟି ଆଶ୍ରମରୁ ଝାରପଡ଼ା ଜେଲ୍
କନକ ବ୍ୟୁରୋ: ୨୦୧୫ ମସିହା ଅଗଷ୍ଟ ୩୦ ତାରିଖ ସଂଧ୍ୟା। ରାଜଧାନୀ ଉପକଣ୍ଠ ଝିଣ୍ଟି ଶାସନଠାରେ ଥିବା ତ୍ରାହି ଅଚ୍ୟୁତ ଆଶ୍ରମ ମୁଖ୍ୟ ସୁରବାବାଙ୍କ କାଣ୍ଡ କାରଖାନାକୁ ନେଇ ଦୀର୍ଘ ଦିନ ଧରି ଚାପି ହୋଇ ରହିଥିବା ପୁଞ୍ଜୀଭୂତ ଅସନ୍ତୋଷ ବିସ୍ଫୋରକ ରୂପ ନେଇଥିଲା । ହଜାର ହଜାର ସଂଖ୍ୟାରେ ଉତ୍ତ୍ୟକ୍ତ ଲୋକ ଆଶ୍ରମ ପରିସରରେ ଏକାଠି ହୋଇ ବ୍ୟାପକ ଭଙ୍ଗାରୁଜା କରିବା ସହିତ ନିଆଁ ଲଗାଇ ଦେଇଥିଲେ । ଫଳରେ ଆଶ୍ରମ ପରିସରରେ ଥୁଆ ହୋଇଥିବା କାର, ଅଟୋ, ଟାଟା ମ୍ୟାଜିକ, ବାଇକ ଆଦି ୨୦ଟି ଗାଡ଼ି ସଂପୂର୍ଣ ଜଳି ଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଲୋକ ସୁରବାବାବାଙ୍କ ଗିରଫ ଦାବିରେ ଏମିତି ଅଡ଼ି ବସିଥିଲେ ଯେ, ଶେଷରେ ପୁଲିସ ରାତି ପାଖାପାଖି ଅଢ଼େଇଟାବେଳେ ସୁର ବାବା ଓ ତାଙ୍କ ଦୁଇ ପୁଅ ତ୍ରିଲୋଚନ, ବିରଞ୍ଚିଙ୍କୁ ଗିରଫ କରିଥିଲା । ଆଶ୍ରମ ପରିସରରୁ ଅନେକ ମାରଣାସ୍ତ୍ର ସହିତ ବସ୍ତାବସ୍ତା ଟଙ୍କା ଜବତ କରିଥିଲା ପୁଲିସ । ମହାପୁରୁଷ ଅଚ୍ୟୁତାନନ୍ଦ ଦାସଙ୍କ ରଚିତ ‘ଶୂନ୍ୟପୋଥି’ର ଦ୍ୱାହି ଦେଇ ଲୋକଙ୍କୁ ଠକିବା ସହ ବିପୁଳ ସମ୍ପତ୍ତିର ଅଧିକାରୀ ହୋଇଥିବା ସୁରବାବାଙ୍କ ବିରୋଧରେ ବହୁ ମହିଳା ଯୌନ ଶୋଷଣ ଅଭିଯୋଗ ମଧ୍ୟ ଆଣିଥିଲେ । ତେବେ ଏହି ବହୁଚର୍ଚ୍ଚିତ ଘଟଣାକୁ ଆଜି ଦୁଇ ବର୍ଷ ପୁରିଛି ।
ଚର୍ଚ୍ଚାରେ ଥିଲା ନାଇଟ୍ କଲେଜ୍ ଓ ରାହାସ ଲୀଳା
୨୦୧୫ ଅଗଷ୍ଟ ୩୦ ତାରିଖ ଅପରାହ୍ନରେ ଏକଦା ସୁରବାବାଙ୍କ ଆଶ୍ରିତ ଥିବା ଜଣେ ମହିଳା ଗଣମାଧ୍ୟମ ଆଗରେ ନାଇଟ୍ କଲେଜ ଓ ରାହାସଲୀଳା କଥା ପ୍ରଘଟ କରିଦେଲେ । ଏନେଇ ସେ ୩୧ ତାରିଖରେ ବାଲିପାଟଣା ଥାନାରେ ଏତଲା ଦାୟର କରିଥିଲେ । ସେ ସଙ୍ଗିନ ଅଭିଯୋଗ ଆଣି ଦର୍ଶାଇଥିଲେ ଯେ ସୁର ଅଶ୍ରିତ ମହିଳାମାନଙ୍କୁ ରାତିରେ ଲକ୍ଷ୍ମୀ ମନ୍ଦିରକୁ ଡାକି ଏକ ସ୍ୱତନ୍ତ୍ର ପଲଙ୍କରେ ବସି ରାହାସଲୀଳା କରୁଥିଲେ । କୋଠରି ବାହାରେ ବାବାଙ୍କ ଦ୍ୱାରା ପୋଷ୍ୟ ଲାଲବାହୀନର କେତେକ ବଛା ବଛା ଯୁବକ ଜଗି ରହୁଥିଲେ । ସୁର ନିରୀହ ମହିଳାଙ୍କୁ ଉଲଗ୍ନ ହେବାକୁ ନିର୍ଦ୍ଦେଶ ଦେଉଥିଲେ । ଆଉ ପୂଜା କରିବେ ବୋଲି କହି ଯୌନ ପିପାସା ଚରିତାର୍ଥ କରୁଥିଲେ ।
କେମିତି ପଦାକୁ ଆସିଲା ସୁରଙ୍କ କାଣ୍ଡ କାରଖାନା
ବିହାରରେ ହତ୍ୟା ଭଳି ସଙ୍ଗିନ୍ ମାମଲାରୁ ରକ୍ଷା ପାଇବାକୁ ଲୁଚି ପଳାଇ ଆସି ତ୍ରାହି ଅଚ୍ୟୁତ ଆଶ୍ରମ ଭିତରେ ଆଶ୍ରୟ ନେଇଥିଲେ ଦୁଇ କୁଖ୍ୟାତ ଅପରାଧୀ । ସମୁଦ୍ର ମନ୍ଥନରୁ ବିଷ ବାହାରିଲା ପରି ଦୁଇ ଅପରାଧୀଙ୍କୁ ବିହାର ପୁଲିସ ଏଠାକୁ ଆସି ଗିରଫ କରିନେବା ପରେ ତ୍ରାହି ଅଚ୍ୟୁତ ଆଶ୍ରମର ଗୋଟିଏ ପରେ ଗୋଟିଏ ଗୁମର ଖୋଲିବାକୁ ଲାଗିଲା । ବର୍ଷ ବର୍ଷ ଧରି ସୁରବାବା ଓ ତାଙ୍କ ଗୁଣ୍ଡା ବାହିନୀର ନିର୍ୟାତନା ଓ ଗୁଣ୍ଡାରାଜ ବିରୋଧରେ ସ୍ଥାନୀୟ ଲୋକେ ମେଳି ବାନ୍ଧିଲେ । ସେପଟେ ଜଣେ ଆଶ୍ରିତ ଭକ୍ତ ବାବାଙ୍କ ବିଲ୍ଡର ପୁତ୍ରଙ୍କଠାରୁ ତ୍ରାହି ଅଚ୍ୟୁତ ନଗରରେ ଜମି ଓ ଘର କିଣି ସେଠାରୁ ଜୋର ଜବରଦସ୍ତ ବିତାଡ଼ିତ ହୋଇଥିବା ନେଇ ଉଚ୍ଚ ନ୍ୟାୟାଳୟରେ ମାମଲା ଦାୟର କଲେ ।
ଏହାଛଡ଼ା ସରକାରୀ ଜମିରେ ବେଆଇନ୍ ନିର୍ମାଣ କରି ଭଡ଼ା ଦେବା ଅଭିଯୋଗରେ ବାଲିଅନ୍ତା ତହସିଲଦାର ସୁରବାବାଙ୍କ ନାମରେ ମଧ୍ୟ ମାମଲା ରୁଜୁ କଲେ । ସବୁ ଘଟଣାର ଟିଖିନିଖି ବିବରଣୀ ‘ସମ୍ବାଦ’ରେ ପ୍ରକାଶ ପାଇଲା ପରେ ତେଜିଥିଲା ଜନ ଅସନ୍ତୋଷ । ପରେ ପରେ ଗଣମାଧ୍ୟମରେ କେତେକ ମହିଳା ସୁରଙ୍କ ରାହାସଲୀଳା ଓ ବ୍ୟଭିଚାରର କରୁଣ କାହାଣୀ ବର୍ଣ୍ଣନା କଲେ । ଏହା ଲୋକଙ୍କ ଅସନ୍ତୋଷ ନିଆଁରେ ଘିଅ ଢାଳିଦେଲା । ହଜାର ହଜାର ଲୋକ ଅଗଷ୍ଟ ୩୦ ତାରିଖ ରାତିରେ ଆଶ୍ରମ ଭିତରକୁ ବଳପୂର୍ବକ ପ୍ରବେଶ କରି ବାବା ଓ ତାଙ୍କ ହାଇ ପ୍ରୋଫଇଲ୍ କେତେକ ଭକ୍ତଙ୍କ ଗାଡ଼ି ପୋଡ଼ାଜଳା କଲେ । ଚେୟାର, ଟେବୁଲ, ଲାଇଟ୍ ଯାହା ପଡ଼ିଲା ତାହା ଭାଙ୍ଗିଲେ । ବାବା ସୁର ତାଙ୍କ ଦୁଇ ପୁଅ ତ୍ରିଲୋଚନ ଏବଂ ବିରଞ୍ଚି ଲୁହା କବାଟ କିଳି ଘରେ ଲୁଚିଥିଲେ ହେଁ ସେମାନଙ୍କୁ ପିଟିବାକୁ ଲୋକେ ଛକି ବସିଲେ । ରାତି ବଢ଼ିଲା । ୪ପ୍ଲାଟୁନ୍ ପୁଲିସ ଧରି ପହଞ୍ଚିଲେ କମିସନର, ଡିସିପି ଏବଂ ଅନ୍ୟାନ୍ୟ ପଦସ୍ଥ ଅଧିକାରୀ। ଶେଷରେ ଅଗଷ୍ଟ ୩୦ ତାରିଖ ରାତି ଅଢ଼େଇଟା ବେଳକୁ ବାବା ସୁର ଓ ତାଙ୍କର ଦୁଇ ପୁଅଙ୍କୁ ପୁଲିସ ହେପାଜତକୁ ନେଲା ।
କୁଆଡ଼େ ଗଲେ ସାନ ମା’?
ସୁର ବିବାହିତ ଥିଲେ । ମାତ୍ର ଦକ୍ଷିଣ ଓଡ଼ିଶାର ଜଣେ ଯୁବତୀ ପୋଥିରୁ ନିଜ ଭବିଷ୍ୟ ଜାଣିବାକୁ ଆସିଥିବାବେଳେ ସୁର ଭବିଷ୍ୟତରେ ତାଙ୍କ ସ୍ୱାମୀଙ୍କର ମୃତ୍ୟୁ ହୋଇଯିବ ବୋଲି କହି ତାଙ୍କୁ ଏମିତି ବଶୀଭୂତ କରିଥିଲେ ଯେ ସମ୍ପୃକ୍ତ ଯୁବତୀ ଜଣଙ୍କ ସେହି ଦିନଠାରୁ ଆଶ୍ରମରେ ରହିଯାଇଥିଲେ । ଆଉ ମୁଣ୍ଡରେ ସିନ୍ଦୂର ହାତରେ କାଚ ପିନ୍ଧି ନିଜକୁ ସାନ ମା’ର ପରିଚୟ ପ୍ରଦାନ କରିଆସୁଥିଲେ । ସାନ ମା’ ରାହାସଲୀଳା କମିଟିର କାର୍ପଟଦାର ହେବା ସହ ଆଶ୍ରମର ଅନ୍ୟତମ ଉତ୍ତରାଧିକାରୀ ବୋଲାଉଥିଲେ । ସାନ ମା’ଙ୍କୁ ଅନେକ ବିଶ୍ୱାସ ଓ ଭୟ କରୁଥିଲେ । ବାବାଙ୍କ ସ୍ୱତନ୍ତ୍ର ସେବାରେ ସେ ନିୟୋଜିତ ଥିବାରୁ ତାଙ୍କ ନିର୍ଦ୍ଦେଶ ବିନା ଆଶ୍ରମରେ ପତ୍ର ବି ହଲୁ ନଥିଲା । ସୁର, ଦୁଇ ପୁତ୍ର ତ୍ରିଲୋଚନ ଏବଂ ବରିଞ୍ଚି ଗିରଫ ହେବା ପରେ ହଠାତ ସାନ ମା’ କେଉଁ ଆଡ଼େ ଚାଲିଗଲେ । ପୁଲିସ ସାନ ମା’ଙ୍କୁ ଖୋଜି ଜେରା କଲେ ରାହାସଲୀଳା ଏବଂ ନାଇଟ୍ କଲେଜ୍ ଭଳି ଅନେକ ରହସ୍ୟ ଉନ୍ମୋଚିତ ହେବ ବୋଲି ସ୍ଥାନୀୟ ଲୋକେ କହନ୍ତି ।
କାରାଗାରରେ ବାପ-ପୁଅ, ଆଶ୍ରମ ଖାଁ ଖାଁ
ଧର୍ମ ନାମରେ ବିରାଟ ବ୍ୟବସାୟିକ ପେଣ୍ଠସ୍ଥଳ ପାଲଟିଥିବା ତତକାଳୀନ ଝିଣ୍ଟି ଶାସନ, ପୋଟଣା ଗାଁର ତ୍ରାହି ଅତ୍ୟୁତ ନଗର ଏବେ ଖାଁ ଖାଁ । ଆଉ ଚାଲୁନାହିଁ ସୁରବାବାଙ୍କ ଦରବାର ବା ରହସ୍ୟମୟ ପୋଥିର ହୁକୁମ୍ । ରହସ୍ୟ ହୋଇ ରହିଯାଇଛି ରାହାସଲୀଳା ଓ ନାଇଟ୍ କଲେଜ ପ୍ରସଙ୍ଗ । ମାତ୍ର ଚାଷ ଜମିର ସବୁଜ ବଳୟ ଭିତରେ ଏବେବି ଠିଆ ହୋଇ ରହିଛି ବେଆଇନ ଭାବେ ନିର୍ମିତ ୭୦ରୁ ଊର୍ଦ୍ଧ୍ୱ ଅଟ୍ଟାଳିକା, ଶିବ ମନ୍ଦିର, ଲକ୍ଷ୍ମୀ ମନ୍ଦିର, ଭଣ୍ଡାର ଗୃହ ସର୍ବୋପରି ବିବାଦୀୟ ପୋଥି ଗୃହ । ସୁରବାବା ଓ ତାଙ୍କ ବଡ଼ ପୁଅ ତ୍ରିଲୋଚନ ଏବେ ବି ଝାରପଡ଼ା ଜେଲରେ ବିଚାର ଅପେକ୍ଷାରେ କାଳ କାଟୁଛନ୍ତି । ଦୁହିଁଙ୍କ ବିରୋଧରେ ଠକେଇ, ଲୁଣ୍ଠନ, ଦଳିତଙ୍କ ବିରୋଧରେ ନିର୍ୟାତନା, ହତ୍ୟା, ହତ୍ୟା ଉଦ୍ୟମ ଭଳି ସଂଗିନ ମାମଲା ବିଚାରାଧୀନ ଥିବାରୁ ଦୁହିଁଙ୍କୁ ଜାମିନ୍ ମିଳିନାହିଁ । କିନ୍ତୁ ବାବାଙ୍କ ସାନ ପୁଅ ବିରଞ୍ଚି ଜାମିନରେ ମୁକୁଳିଛି ।
ଏବେବି ରହସ୍ୟ ଘେରରେ ବାବାଙ୍କ ଶୂନ୍ୟପୋଥି
ଯେଉଁ ଶୂନ୍ୟପୋଥିକୁ ନେଇ କର୍ମକାଣ୍ଡ ପୁରୋହିତରୁ ସୁରେନ୍ଦ୍ର ବନି ଯାଇଥିଲେ ମହାପଣ୍ଡିତ ଏବେ ସେହି ପୋଥିକୁ ନେଇ ସମସ୍ତଙ୍କ ମନରେ ପ୍ରଶ୍ନ । ଏହି ପୋଥିରୁ ସୁରବାବା ଲୋକଙ୍କ ଆଗତ ଭବିଷ୍ୟତ କହୁଥିବାବେଳେଏହାକୁ ଲୋକେ ସରଳରେ ବିଶ୍ୱାସ କରି ଯାଉଥିଲେ । ଆଉ ସୁର ସ୍ୱାମୀ-ସ୍ତ୍ରୀ ଝଗଡ଼ା, ପିତାମାତାଙ୍କ ମନରେ ସନ୍ତାନ ସନ୍ତତିଙ୍କ ରିଷ୍ଟ ଭୟ ସୃଷ୍ଟି କରିବା ସହିତ ରାଜନୈତିକ ବ୍ୟକ୍ତିଙ୍କୁ ମନ୍ତ୍ରୀ ପଦ ପ୍ରଦାନ, ବାବୁଙ୍କ ପଦୋନ୍ନତି ଇତ୍ୟାଦି କରିଦେଇ ପାରିବେ ବୋଲି ଦୃଢ଼ୋକ୍ତି କରୁଥିବା ଅଭିଯୋଗ ହୋଇଥିଲା । ଯେତେ ରିଷ୍ଟ ଅଛି ବାବାଙ୍କ ଆଶ୍ରମରେ ଆଶ୍ରିତ ରହିଲେ କଟିଯିବ ବୋଲି ସୁରବାବା ଲୋକଙ୍କୁ ଅଭୟବାଣୀ ଶୁଣାଉଥିଲେ । ତେବେ ସୁର ଗିରଫ ହେବା ସମୟରେ ପ୍ରକୃତରେ ସେହି ପୋଥି ଜବତ ହୋଇଛି କି ନାହିଁ ଏବଂ ଯଦି ଜବତ ହୋଇଥିଲା ତାହା ଏବେ କେଉଁଠି ତାହା କାହାକୁ ଜଣା ନାହିଁ ।