କନକ ବ୍ୟୁରୋ: ଶେଷରେ ଧରାପଡିଲେ ମହିମା ମିଶ୍ର । ବିଶିଷ୍ଟ ଶିଳ୍ପପତି ମହିମାନନ୍ଦ ମିଶ୍ରଙ୍କୁ ଥାଇଲାଣ୍ଡରେ ଅଟକ ରଖାଯାଇଛି । ମହିମାଙ୍କ ସହଯୋଗୀ ବସନ୍ତ କୁମାର ବଳଙ୍କୁ ମଧ୍ୟ ଅଟକ ରଖାଯାଇଛି । ଏନେଇ ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ପୋଲିସ ମହାନିର୍ଦ୍ଦେଶକ କେବି ସିଂ । ଥାଇଲାଣ୍ଡର ଇମିଗ୍ରେସନ ସେଂଟରରେ ତାଙ୍କୁ ଅଟକ ରଖିଛିି ଇମିଗ୍ରେସନ ପୋଲିସ । ତାଂକୁ ଭାରତ ଆଣିବାକୁ ପାରାଦୀପର ୬ ଜଣିଆ ପୋଲିସ ଟିମ୍ ଥାଇଲାଣ୍ଡ ଯାଇଛି । ଆସନ୍ତାକାଲି ତାଂକୁ ପ୍ରଥମେ ଭାରତ ଅଣାଯିବ । ସେଠାରୁ ଭୁବନେଶ୍ୱର ଆଣିବାକୁ ଯୋଜନା କରିଛି ଓଡିଶା ପୋଲିସ । ଇଂଟରପୋଲର ସୂଚନା ଆଧାରରେ ଥାଇଲାଣ୍ଡ ପୋଲିସ ତାଙ୍କୁ ଅଟକ ରଖିଛି ।
Kanak News is now on WhatsApp
Join and get latest news updates delivered to you via WhatsApp
୧୫ ଦିନିଆ ଟୁରିଷ୍ଟ ଭିସାରେ ମହିମା ଏବଂ ବସନ୍ତ ବଳ ପ୍ରଥମେ ଦିଲ୍ଲୀରୁ ନେପାଳ ଏବଂ ପରେ ଥାଇଲାଣ୍ଡ ଯାଇଥିଲେ । ତାଙ୍କ ସହ ତାଙ୍କ ପରିବାରର କିଛି ସଦସ୍ୟ ଓ ୬ ରୁ ୭ ଜଣ ଅଙ୍ଗରକ୍ଷୀ ଥିବା ସୂଚନା ମିଳିଛି । ଥାଇଲାଣ୍ଡ ପୋଲିସର ଲେଫ୍ଟନାଂଟ୍ ଜେନେରାଲ୍ ଏକ ସାମ୍ବାଦିକ ସମ୍ମିଳନୀରେ ମହିମାଙ୍କୁ ଅଟକ ରଖିବା ନେଇ ସୂଚନା ଦେଇଛନ୍ତି । ଥାଇଲାଣ୍ଡରେ ମହିମା ମିଶ୍ର ଏକ ଫାଇଭ୍ ଷ୍ଟାର ହୋଟେଲରେ ବିଳାସ ବ୍ୟସନରେ ରହୁଥିଲେ, ଯାହାର ଦିନକୁ ଭଡା ୧ଲକ୍ଷ ଟଂକା ।
ପୋଲିସ ଡିଜି କହିଛନ୍ତି, ଓଡିଶା ଅଣାଯିବା ପରେ ତାଂକୁ ରିମାଣ୍ଡରେ ଅଣାଯିବ । ପାରାଦୀପ ସିୱେଜ୍ ସିପିଂ କଂପାନୀର ମ୍ୟାନେଜର ମହେନ୍ଦ୍ର ସ୍ୱାଇଁଙ୍କ ହତ୍ୟା ଘଟଣାରେ ମହିମା ମିଶ୍ରଙ୍କ ସଂପୃକ୍ତି ଥିବା ନେଇ ଅଭିଯୋଗ ହୋଇଥିଲା । ଏହାପରେ ମହିମାଙ୍କୁ ଗିରଫ କରିବାକୁ ପ୍ରଥମେ ଲୁକ୍ ଆଉଟ୍ ସର୍କୁଲାର୍ ଏବଂ ପରେ ଏନବିଡବ୍ଲୁ ଜାରି ହୋଇଥିିଲା । ମହିମାଙ୍କ ପାରାଦୀପ ସ୍ଥିତ କାର୍ଯ୍ୟାଳୟ ଓ ଭୁବନେଶ୍ୱର ସ୍ଥିତ ବାସଭବନରେ ଏକାଧିକ ଥର ଚଢାଉ କରିଥିଲା ପୋଲିସ ।
ସୁପାରି କିଲର ରାକେଶ ଚୌବେଙ୍କୁ ଗିରଫ ପରେ ଜେରା ବେଳେ ମହିମାଙ୍କ ନାଁ ପଦାକୁ ଆସିଥିଲା । ଏହା ପରେ ମହିମାଙ୍କୁ ଖୋଜୁଥିଲା ପୋଲିସ । ତେବେ ସେ ଫେରାର ହୋଇଯାଇଥିଲେ । ମହେନ୍ଦ୍ର ସ୍ୱାଇଁ ହତ୍ୟାରେ ସଂପୃକ୍ତି ଅଭିଯୋଗରେ ପୋଲିସ ଦିଲ୍ଲୀରୁ ସୁଶାନ୍ତ ସେଠୀଙ୍କୁ ଗିରଫ କରି ପାରାଦୀପ ଆଣିଛି । ଆଜି ତାଙ୍କୁ କୋର୍ଟରେ ହାଜର କରାଯିବ । ଘଟଣାରେ ପୂର୍ବରୁ ପାରାଦୀପର କଂଗ୍ରେସ ନେତା ବାପି ସର୍ଖେଲଙ୍କୁ ଗିରଫ କରିସାରିଛି ପୋଲିସ । ମାମଲାରେ ଏଯାଏଁ ୯ ଜଣଙ୍କୁ ଗିରଫ କରିସାରିଛି ପାରାଦୀପ ପୋଲିସ ।