କନକ ବ୍ୟୁରୋ : ବିଜେଡିର ସୋସିଆଲ ମିଡିଆ କ୍ୟାମ୍ପେନକୁ କାଉଣ୍ଟର କରିବାକୁ ବିଜେପିର ନୂଆ ଯୋଜନା । ଖାସକରି ବିଜେଡିର ସେଲଫି ୱିଥ୍ ନବୀନ କାର୍ଯ୍ୟକ୍ରମକୁ କାଉଣ୍ଟର କରି ବିଜେପି ଯୁବମୋର୍ଚ୍ଚା ଆରମ୍ଭ କରିଛି ସେଲଫି ୱିଥ୍ ଓଡିଆ । ଏହି କାର୍ଯ୍ୟକ୍ରମ ମାଧ୍ୟମରେ ରାଜ୍ୟର ସବୁ ଓଡିଆ ଲୋକଙ୍କ ସମସ୍ୟାକୁ ସାମ୍ନାକୁ ଆଣିବାକୁ ଯୋଜନା କରିଛି ବିଜେପିର ଯୁବମୋର୍ଚ୍ଚା ।
Kanak News is now on WhatsApp
Join and get latest news updates delivered to you via WhatsApp
ସେଲଫି ୱିଥ ଓଡିଆ କାର୍ଯ୍ୟକ୍ରମ ମାଧ୍ୟମରେ ବିଜେପି ଯୁବମୋର୍ଚ୍ଚାର କାର୍ଯ୍ୟକର୍ତ୍ତା ବିଭିନ୍ନ ଅଞ୍ଚଳକୁ ଯାଇ ଲୋକଙ୍କ ସହ ସେଲଫି ଉଠାଇବେ । ଏହାସହ ସେମାନଙ୍କର ସମସ୍ୟା ସର୍ମ୍ପକରେ ବୁଝି ଫଟୋ ସହ ଏହାକୁ ସୋସିଆଲ ମିଡିଆରେ ପୋଷ୍ଟ କରିବେ । ଏହିଭଳି ଭାବେ ସୋସିଆଲ ମିଡିଆ ସାହାର୍ଯ୍ୟରେ ଲୋକଙ୍କ ସମସ୍ୟା ସାମ୍ନାକୁ ଆଣିବାକୁ ଲକ୍ଷ୍ୟ ରଖିଛି ବିଜେପି ଯୁବମୋର୍ଚ୍ଚା ।
ବିଜେପି ଯୁବମୋର୍ଚ୍ଚାର ସେଲଫି ୱିଥ୍ ଓଡିଆ କାର୍ଯ୍ୟକ୍ରମ ପୂର୍ବରୁ ଗତକାଲି ସୋସିଆଲ ମିଡିଆ କ୍ୟାମ୍ପେନକୁ ଜୋରଦାର କରିବା ବିଜେଡି ଆରମ୍ଭ କରିଛି ନବୀନଙ୍କ ସହ ସେଲଫି କାର୍ଯ୍ୟକ୍ରମ । ଏହା ସହ ଆରମ୍ଭ ହୋଇଛି ମୋ ନବୀନ ମୋ ଘରେ କ୍ୟାମ୍ପେନ୍ । ଦଳୀୟ କାର୍ଯ୍ୟାଳୟରେ ବିଜେଡି ଆଇଟି ସେଲର ଲୋଗୋ ଉନ୍ମୋଚନ କରିବା ସହ ବିଜୁ ଛାତ୍ର ଜନତା ଦଳ କର୍ମକର୍ତାଙ୍କ ସହ ସେଲଫି ନେଇଛନ୍ତି ନବୀନ ।
ଲୋକଙ୍କ ସହ ନିକଟତର ହେବାକୁ ବିଜେଡି ଆରମ୍ଭ କରିଛି ଅଭିନବ ଯୋଜନା । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହ ଯେଉଁମାନେ ସେଲଫି ଉଠାବାକୁ ଚାହୁଁଥିବେ ସେମାନଙ୍କ ପାଇଁ ସ୍ୱତନ୍ତ୍ର ଆଣ୍ଡ୍ରଏଡ୍ ଭର୍ସନ ବ୍ୟବସ୍ଥା କରିଛି ବିଜେଡି ଆଇଟି ସେଲ୍ । ଏହି କାର୍ଯ୍ୟକ୍ରମରେ ଘରେ ଘରେ ବୁଲିବେ ବିଜେଡି ଆଇଟି ସେଲ୍ କର୍ମକର୍ତା । ନବୀନଙ୍କ ସହ ଫଟୋ ଉଠାଇବାକୁ ଚାହିଁବେ, ସେମାନେ ଫଟୋ ଉଠାଇପାରିବେ । ଆଉ ସାଂଗେ ସାଂଗେ ତା’ର ଫଟୋ କପି ମଧ୍ୟ ସଂପୃକ୍ତ ବ୍ୟକ୍ତିଙ୍କୁ ଦିଆଯିବ । ସେହିପରି ସମସ୍ତ ଜିଲ୍ଲା ଦଳୀୟ କାର୍ଯ୍ୟାଳୟକୁ ଯାଇ ମଧ୍ୟ ଛାତ୍ରଛାତ୍ରୀ, ବିଜେଡି କର୍ମୀ ଓ ଯେକୌଣସି ବ୍ୟକ୍ତି ଯାଇ ନବୀନଙ୍କ ସହ ସେଲଫି ନେଇପାରିବେ । ସେଠାରୁ ଫଟୋ କପି ନେଇ ସୋସିଆଲ ମିଡିଆରେ ପୋଷ୍ଟ କରିପାରିବେ ।
ଏସବୁ ଭିତରେ ୨୦୧୯ ନିର୍ବାଚନ ଯେତିକି ପାଖେଇ ଆସିଛି, ପ୍ରତିଯୋଗିତା ସେତିକି ତୀବ୍ର ହେବାରେ ଲାଗିଛି । ଉଭୟ ବିଜେଡି ଓ ବିଜେପି ଏବେ ସୋସିଆଲ ମିଡିଆକୁ ନିର୍ବାଚନୀ ପ୍ରଚାରର ମୁଖ୍ୟ ଅସ୍ତ୍ର କରିଛନ୍ତି । ଖାସକରି ନୂଆ ଭୋଟର ତାଲିକାରେ ୫ ଲକ୍ଷରୁ ଉଦ୍ଧ୍ୱର୍ ଯୁବ ଭୋଟର ଯୋଡି ହୋଇଥିବାରୁ ସେମାନଙ୍କର ଭୋଟବ୍ୟାଙ୍କ ହାତେଇବାକୁ ଏବେ ଦୁଇ ଦଳ କସରତ ଆରମ୍ଭ କରିଛନ୍ତି । ଯୁବବର୍ଗଙ୍କ ସହ ଯୋଡି ହେବା ପାଇଁ ସୋସିଆଲ ମିଡିଆ ଏକ ବଡ ପ୍ଲାଟଫର୍ମ ବୋଲି ଅଙ୍କ କଷିଛନ୍ତି ଉଭୟ ଦଳ ।