ଏବେ ବି ବଞ୍ଚିଛି ମାନବିକତା ! ବାପା ମା’ ଛେଉଣ୍ଡ ଝିଅଙ୍କ ସୁରକ୍ଷା ଦାୟିତ୍ୱ ନେଲା ସୁରକ୍ଷା ଯୋଗାଉଥିବା କେ-ୱାନ ସିକ୍ୟୁରିଟି ସଂସ୍ଥା
କନକ ବ୍ୟୁରୋ : କିଏ କହିଲା ଦୁନିଆରୁ ହଜିଗଲାଣି ମାନବିକତା? କିଏ କହିଲା ସମବେଦନାର ଆହା ପଦେ କହିବାକୁ କାହା ପାଖରେ ସମୟ ନାହିଁ । ଏବେ ମଧ୍ୟ ବଞ୍ଚି ରହିଛି ମାନବିକତା । ଏମିତି ଘଟଣା ସାମ୍ନାକୁ ଆସିଛି ଯାହା ଶୁଣିବା ପରେ, ମାନବିକ ମୂଲ୍ୟବୋଧ ପ୍ରତି ଆପଣଙ୍କର ଆସ୍ଥା ବଢିଯିବ । ବିଭିନ୍ନ ସଂସ୍ଥାକୁ ସୁରକ୍ଷା ଯୋଗାଇ ଦେଉଥିବା ଏକ ଘରୋଇ ସଂସ୍ଥା ନେଇଛି ତିନି ଅନାଥ ଝିଅଙ୍କ ସୁରକ୍ଷାର ଦାୟିତ୍ୱ ।
Kanak News is now on WhatsApp
Join and get latest news updates delivered to you via WhatsApp
ହାତରେ ବାପା, ମାଆଙ୍କ ଫଟୋ ଧରି ଅତୀତର ସ୍ମୃତି ସାଉଁଟୁଥିବା ଭୁବନେଶ୍ୱରର ତିନି ଭଉଣୀଙ୍କ କାହାଣୀ ଶୁଣିଲେ ଆପଣଙ୍କ ଆଖିରୁ ଲୁହ ଝରିଆସିବ । ପାଂଚ ବର୍ଷତଳେ ବାପା ହୃଦଘାତରେ ଚାଲି ଯାଇଥିଲେ । ହେଲେ ତିନି ଝିଅଙ୍କୁ ବାପାଙ୍କ ଅଭାବ ଅନୁଭବ ହେବାକୁ ଦେଇନଥିଲେ ମାଆ । ପରଘରେ ପାଇଟି କରି ପିଲାଙ୍କ ସବୁ ଆବଶ୍ୟକତା ପୂରଣ କରୁଥିଲେ ରେଣୁବାଳା । କିନ୍ତୁ ଏତିକି ସହି ପାରିଲେଣି ଭଗବାନ । ଭାଗ୍ୟର ବିଡମ୍ବନା, ଗତ ମାସରେ ମା’ ମଧ୍ୟ କିଡନୀ ରୋଗରେ ଆରପାରିକୁ ଚାଲିଗଲେ । ବାପା ମାଆ ଛେଉଣ୍ଡ ଏହି ତିନି ଝିଅଙ୍କ ଉପରେ ଛିଡିପଡିଲା ଦୁଃଖର ପାହାଡ । କଣ କରିବେ କଣ ନ କରିବେ କିଛି ଭାବି ପାରିଲେ ନାହିଁ । ଅତି ଛୋଟ ବୟସରୁ ବାପା ମା’ ଛେଉଣ୍ଡ ହୋଇଗଲେ ତିନି ଭଉଣୀ ।
ଗତ ୧୦ ତାରିଖରେ ଓଡିଶାର ସର୍ବାଧିକ ପ୍ରସାରିତ ଦୈନିକ ଖବରକାଗଜ ସମ୍ବାଦରେ ପ୍ରକାଶ ପାଇଥିଲା ଏହି ତିନି ଭଉଣୀଙ୍କ ଦୁଃଖଦ କାହାଣୀ ।ସମ୍ବାଦ ଖବରକାଗଜ ମାଧ୍ୟମରେ ସହାୟତା ପାଇଁ ଅପିଲ କରିଥିଲେ ତିନି ଭଉଣୀ । ଏହି ଖବର ପଢିବା ପରେ ସହଯୋଗର ହାତ ବଢାଇଛି କେ-ୱାନ ସିକ୍ୟୁରିଟି ସଂସ୍ଥା । ବିଭିନ୍ନ ପ୍ରତିଷ୍ଠାନକୁ ସୁରକ୍ଷା ଯୋଗାଇ ଦେଉଥିବା ଏହି ସଂସ୍ଥା ତିନି ଭଉଣୀଙ୍କ ସୁରକ୍ଷାର ଦାୟିତ୍ୱ ନେଇଛି । ବଡ ଭଉଣୀ ସସ୍ମିତାଙ୍କୁ ଚାକିରି ଦେବାସହ ଅନ୍ୟ ଦୁଇ ଭଉଣୀଙ୍କ ପାଠପଢା ଖର୍ଚ୍ଚ ବହନ କରିବ ବୋଲି କହିଛି ।
ସମ୍ବାଦର ଲକ୍ଷ୍ୟ ସଂପର୍କ ଯୋଡିବା । ଆଉ ସମ୍ବାଦରେ ଖବର ପ୍ରକାଶ ପରେ ସହାୟତା ପାଇଁ କେ-ୱାନ ସିକ୍ୟୁରିଟି ସଂସ୍ଥା ଆଗେଇ ଆସୁଥିବାରୁ କୃତଜ୍ଞତା ଜଣାଇଛନ୍ତି ସମ୍ବାଦର ସଂପାଦକ ସୌମ୍ୟରଞ୍ଜନ ପଟ୍ଟନାୟକ । ଏଭଳି ଏକ ଘଟଣା ସାମ୍ନାକୁ ଆସିବା ପରେ ଲୋକଙ୍କ ଭିତରେ ଯେ, ମାନବିକତା ବଂଚି ରହିଛି ପୁଣିଥରେ ତାର ପ୍ରମାଣ ମିଳିଛି ।