ଆବାସିକ ବିଦ୍ୟାଳୟରେ ଲଜ୍ଜା: ବଢୁଛି ନାବାଳିକାଙ୍କ ପ୍ରତି ନିର୍ଯାତନା
କନ୍ଧମାଳ, ଢେଙ୍କାନାଳ ପରେ ଧର୍ମଗଡ଼ ଆବାସିକ ବିଦ୍ୟାଳୟରୁ ଆସିଲା ଲଜ୍ଜାଜନକ ଖବର
କନକ ବ୍ୟୁରୋ: ମାଆ ବନୁଛନ୍ତି ସ୍କୁଲ ପିଲା । କନ୍ଧମାଳ ପରେ ଗତ ଦୁଇ ଦିନ ଭିତରେ ଢେଙ୍କାନାଳ ଓ ଧର୍ମଗଡରୁ ଆସୁଛି ନାବାଳିକା ଛାତ୍ରୀ ଗର୍ଭବତୀ ହେବା ଖବର । ଆଉ ବଡ କଥା ହେଉଛି, ସବୁ ସ୍ଥାନରେ ଆଶ୍ରମ ସ୍କୁଲ କିମ୍ବା ଆବାସିକ ବିଦ୍ୟାଳୟରେ ଏଭଳି ଲଜ୍ଜାଜନକ ଘଟଣା ସାମ୍ନାକୁ ଆସିଛି । ଏହାରି ଭିତରେ କନ୍ଧମାଳ ନାବାଳିକା ପ୍ରସବ ଘଟଣାକୁ ନେଇ ପ୍ରତିବାଦ ଜୋରଦାର କରିଛନ୍ତି ବିରୋଧୀ ।
Kanak News is now on WhatsApp
Join and get latest news updates delivered to you via WhatsApp
ଢେଙ୍କାନାଳର ସପ୍ତଶଯ୍ୟା ଅନୁସୁଚିତ ଜନଜାତି ଆବାସିକ ବିଦ୍ୟାଳୟର ଅଷ୍ଟମ ଶ୍ରେଣୀରେ ପଢୁଥିବା ଜଣେ ଛାତ୍ରୀ ଅନ୍ତସତ୍ୱା ଥିବା ସାମ୍ନାକୁ ଆସିଛି । ଏନେଇ ପ୍ରଧାନଶିକ୍ଷକ ଥାନାରେ ଅଭିଯୋଗ କରିଛନ୍ତି । ସମାନ ଘଟଣା ଘଟିଛି ଧର୍ମଗଡରେ । ସପ୍ତମ ଶ୍ରେଣୀରେ ପଢୁଥିବା ଜଣେ ଛାତ୍ରୀ ଏବେ ଗର୍ଭବତୀ । ଅଭିଯୋଗ ପରେ ପୋଲିସ ଜଣେ ଯୁବକଙ୍କୁ ଗିରଫ କରିଛି । ତେବେ ଢେଙ୍କାନାଳ ଓ ଧର୍ମଗଡର ଘଟଣା ରାଜ୍ୟ ପାଇଁ ଲଜ୍ଜା ଆଣିଛି ।
କିଛି ଦିନ ତଳେ କନ୍ଧମାଳର ଏକ ଆଶ୍ରମ ସ୍କୁଲରେ ଜଣେ ଅଷ୍ଟମ ଶ୍ରେଣୀର ଛାତ୍ରୀ ଗର୍ଭବତୀ ହୋଇଥିଲେ । ଏପରିକି ପରେ ଏକ ଶିଶୁ କନ୍ୟାକୁ ଜନ୍ମ ବି ଦେଇଥିଲେ । ହେଲେ ପରେ ଶିଶୁଟିର ମୃତ୍ୟୁ ହୋଇଥିଲା । ଘଟଣାକୁ ନେଇ ଚାରିଆଡେ ପ୍ରତିବାଦ ଜୋରଦାର ହେଉଛି । ଶନିବାର ଫୁଲବାଣୀ, ଦେବଗଡ ଓ ନବରଙ୍ଗପୁରରେ ବିକ୍ଷୋଭ କରିଛି କଂଗ୍ରେସ । ଏହାରି ଭିତରେ ରାଜ୍ୟର ହଜାରେରୁ ଅଧିକ ଆଶ୍ରମ ସ୍କୁଲ ଓ ଆବାସିକ ବିଦ୍ୟାଳୟରେ ସିସିଟିଭି ଲଗାଇବାକୁ ନିଷ୍ପତି ନେଇଛନ୍ତି ସରକାର ।