ହକ୍ ପାଇଁ ଲଢେଇ ! ରାତି ଅଧରେ ବ୍ଲକ ଅଫିସ ଆଗରେ ସ୍କୁଲ ପିଲା, ଶୁଣିଲେନି ବିଇଓ
କନକ ବ୍ୟୁରୋ : ରାତି ଅଧରେ ବ୍ଲକ ଅଫିସ ଆଗରେ କୁନି କୁନି ସ୍କୁଲ ପିଲାଙ୍କ ଧାରଣା । ନିଜର ସ୍କୁଲର ଶୈକ୍ଷିକ ବାତାବରଣ ରକ୍ଷା କରିବାକୁ ଗୁହାରି କରିବାକୁ ଆସିଛନ୍ତି ବ୍ଲକ ଶିକ୍ଷା ଅଧିକାରୀଙ୍କୁ । ଏଭଳି ଘଟଣା ଘଟିଛି ରାଜନଗର ଅଞ୍ଚଳରେ । ସ୍କୁଲ ପରିସରରେ ଆସନ୍ତା ୨୫ ରୁ ୨୮ ତାରଖ ପର୍ୟ୍ୟନ୍ତ ସ୍ଥାନୀୟ ଯୁବକ ସଂଘର ପିଲାମାନେ ଏକ ମେଲୋଡି କାର୍ୟ୍ୟକ୍ରମର ଆୟୋଜନ କରିଛନ୍ତି । ମେଲୋଡି ସାଙ୍ଗକୁ ମଦ, ମାଂସର ଆସର ମଧ୍ୟ ଜମିବ । ଏହାକୁ ବିରୋଧ କରିବାରୁ ଛାତ୍ରଛାତ୍ରୀ ଓ ତାଙ୍କ ଅଭିଭାବକଙ୍କୁ ଯୁବକ ସଂଘର ସଦସ୍ୟମାନେ ଗାଳିଗୁଲଜ କରୁଥିବା ଅଭିଯୋଗ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଏହି ଘଟଣାରେ ପିଲାମାନେ ବ୍ଲକ ଶିକ୍ଷା ଅଧିକାରୀଙ୍କ ନିକଟରେ ପହଞ୍ଚି ସମସ୍ୟାର ସମାଧାନ ପାଇଁ ଦାବି କରିଥିବା ବେଳେ ବିଇଓ ରବିନ୍ଦ୍ର କୁମାର ପଣ୍ଡା ଏହାକୁ ଗୁରୁତ୍ୱ ଦେଇନଥିଲେ । ପିଲାଙ୍କ ଦାବିକୁ ପିଲାଳିଆମି ଭାବି ଏଡାଇ ଯାଇଥିଲେ ବିଇଓ । କେବଳ ଏତିକି ନୁହେଁ ଅଫିସ ବାରଣ୍ଡାରେ ଧାରଣାରେ ବସିଥିବା ପିଲାଙ୍କୁ ଅଣଦେଖା କରି ସେ ଏବଂ ତାଙ୍କ କର୍ମଚାରୀ ଅଫିସ ବନ୍ଦ କରି ସେଠାରୁ ପଲାଇଛନ୍ତି । ପିଲାମାନେ ବର୍ଷା ରାତିରେ ବ୍ଲକ ଅଫିସ ବାରଣ୍ଡାରେ ବସି ଧାରଣା ଦେଉଥିବା ବେଳେ ବିଇଓ ଏଥିପ୍ରତି ଦୃଷ୍ଟି ନ ଦେବା ଅଭିଭାବକ ମହଲରେ ଅସନ୍ତୋଷ ସୃଷ୍ଟି କରିଛି ।