ଗଞ୍ଜାମ ନରେନ୍ଦ୍ରବାଲି ସ୍କୁଲର ସୁନ୍ଦର କାହାଣୀ: ପାଠପଢା ସାଙ୍ଗକୁ ପରିବା ଚାଷ କରୁଛନ୍ତି ଛାତ୍ରଛାତ୍ରୀ, ଗଛରେ ଲେଖାଯାଇଛି ଲଗାଇଥିବା ପିଲାର ନାଁ

240

କନକ ବ୍ୟୁରୋ: ଗଞ୍ଜାମ ଜିଲ୍ଲା ଦିଗପହଣ୍ଡି ଖମାରି ଗାଁ ପଞ୍ଚାୟତର ନରେନ୍ଦ୍ରବାଲି । ଏହି କୁନି ଗାଁରେ ଥିବା ପ୍ରକଳ୍ପ ପ୍ରାଥମିକ ବିଦ୍ୟାଳୟର ଛାତ୍ରଛାତ୍ରୀ ଏଭଳି କିଛି କରିଛନ୍ତି ଯାହାକି ସତରେ ନିଆରା । ନିଜ ହାତରେ ବିଦ୍ୟାଳୟ ପଛରେ ରୋଷେଇ ବଗିଚା ବା କିଚେନ ଗାର୍ଡେନଟିଏ ପ୍ରସ୍ତୁତ କରିଛନ୍ତି । ଯେଉଁ ବୟସରେ ଖେଳକୁଦ କରି ସମୟ କାଟିବା କଥା ସେହି ବୟସରେ ବିଦ୍ୟାଳୟ ହତାରେ ଗଛ ଲଗାଇ ସେ ସବୁର ଯତ୍ନ ନେଉଛନ୍ତି । ଯିଏ ଯେଉଁ ଗଛ ଲଗାଇଛନ୍ତି ସେହି ଗଛରେ ସେମାନଙ୍କ ନାମ ବି ଲେଖାଯାଇଛି । ସ୍କୁଲ କର୍ତ୍ତୃପକ୍ଷ ବି ଛାତ୍ରଛାତ୍ରୀଙ୍କ ଏହି ପ୍ରୟାସକୁ ବୃଥା ହେବାକୁ ଦେଇନାହାଁନ୍ତି ।

କୁନି ସ୍କୁଲର ସୁନ୍ଦର କାହାଣୀ

ପିଲାମାନଙ୍କ ପାଇଁ ପ୍ରସ୍ତୁତ ହେଉଥିବା ମଧ୍ୟାହ୍ନ ଭୋଜନରେ ଏସବୁ ଗଛରୁ ଉତ୍ପାଦିତ ପରିବା ବ୍ୟବହାର କରାଯାଉଛି । ଆଜିକାଲି ପରିବାରେ କୀଟନାଶକର ବହୁଳ ବ୍ୟବହାର ହେଉଥିବା ବେଳେ ଏଠାରେ କିନ୍ତୁ ଛାତ୍ରଛାତ୍ରୀ ଗୋବର ଖତ, ଜୈବିକ ସାରର ବ୍ୟବହାର କରୁଛନ୍ତି । ଅମୃତଭଣ୍ଡା, କାଗେଜୀ ଲେମ୍ବୁ, ମୂଳା, କଦଳୀ ଭଳି ବାଡ଼ି ପନିପରିବା ଲଗାଇବା ସହ ସୁଷମ ଖାଦ୍ୟ ଖାଉଛନ୍ତି ଛାତ୍ରଛାତ୍ରୀ।

ବଡ କଥା ଏହି ସ୍କୁଲରେ ପ୍ରଥମରୁ ପଞ୍ଚମ ଯାଏଁ ଶିକ୍ଷାଦାନର ବ୍ୟବସ୍ଥା ଥିବାବେଳେ ୧୩ ଜଣ ଛାତ୍ରଛାତ୍ରୀ ପାଠ ପଢୁଛନ୍ତି ।ଏହି ପିଲାମାନେ ପାଠ ପଢିବା ସହ ନିଜ ବଗିଚାକୁ ଦେଖାଶୁଣା କରୁଛନ୍ତି । ବିଶେଷ କରି ଜିଲ୍ଲାପାଳ ବିଦ୍ୟାଳୟ ପରିସରରେ ଏଭଳି କାର୍ଯ୍ୟକ୍ରମକୁ ପ୍ରୋତ୍ସାହିତ କରୁଥିବେଳେ ଆଦିବାସୀ ଅଧ୍ୟୁଷିତ ଏହି ଛୋଟ ସ୍କୁଲରେ ଏକ ସୁନ୍ଦର ପରିକଳ୍ପନା ବାସ୍ତବିକ କାର୍ଯ୍ୟକାରୀ ହୋଇପାରିଛି ।

Comments are closed.