କନକ ବ୍ୟୁରୋ : ପଂଜାବ ନାସନାଲ ବ୍ୟାଙ୍କରେ ସବୁଠାରୁ ବଡ ଘୋଟାଲା କରି ଫେରାର ହୋଇଯାଇଥିବା ନିରଭ ମୋଦିଙ୍କୁ ନେଇ ସାରା ଦେଶରେ ଚହଳ ପଡିଛି । ୧୧ ହଜାର ୪ଶହ କୋଟି ଲୁଟ୍ କରି କିପରି ନିରଭ ମୋଦି ଖସିଗଲେ , ତାକୁ ନେଇ ସରକାରଙ୍କୁ ଘେରିଛି କଂଗ୍ରେସ । ଆମେରିକାର ନ୍ୟୁୟର୍କ ସହରରେ ଏହି ସ୍ମାମଷ୍ଟାର ଲୁଚିଥିବା ନେଇ ପ୍ରାଥମିକ ରିପୋର୍ଟ ଆସୁଥିବା ବେଳେ ତାଙ୍କର ପାସପୋର୍ଟ ରଦ୍ଦ କରିଦେଇଛନ୍ତି ଭାରତ ସରକାର ।
Kanak News is now on WhatsApp
Join and get latest news updates delivered to you via WhatsApp
୧୧ ହଜାର ୪୦୦ କୋଟି ଲୁଟ୍ କରିଥିବା ହୀରା ବ୍ୟବସାୟୀ ନିରଭ ମୋଦିଙ୍କୁ ଦେଶର ତଦନ୍ତକାରୀ ସଂସ୍ଥା ଖୋଜୁଥିବା ବେଳେ ବିଦେଶରେ ବେଶ୍ ଅୟସଆରମରେ ବୁଲୁଛନ୍ତି ଏହି ଫ୍ରଡ୍ ମାଷ୍ଟର । କିଛି ଦିନ ତଳେ ବିଶ୍ୱ ଦରବାରରେ ଭାରତୀୟ କର୍ପୋରେଟ୍ ଜଗତର ସଫଳ ଯୁବ ଉଦ୍ୟୋଗୀ ଭାବେ ଗଣା ଯାଉଥିଲେ ନିରଭ ମୋଦି । ହଲିଉଡର ବଛା ବଛା ମଡେଲଙ୍କ ସହ ରେଡ୍ କାର୍ପେଟରେ ଚାଲୁଥିଲେ ଏହି ଭାରତୀୟ ବ୍ୟବସାୟୀ । ହେଲେ ସବୁଠୁ ବଡ଼ ବ୍ୟାଙ୍କିଙ୍ଗ୍ ସ୍କାମର ପର୍ଦ୍ଦାଫାସ ପରେ ନିରଭଙ୍କ ପାସପୋର୍ଟକୁ ଆଜି ସସପେଣ୍ଡ କରିଛି ବିଦେଶ ମନ୍ତ୍ରାଳୟ । ତାଙ୍କ ସହ ଅନ୍ୟତମ ଅଭିଯୁକ୍ତ ଗୀତାଂଜଳି ଜୁଏଲର୍ସର ମାଲିକ ମେହଲ ଚୋକସୀଙ୍କ ପାସପୋର୍ଟ ମଧ୍ୟ ସସପେଣ୍ଡ କରାଯାଇଛି ।
ସିବିଆଇର ଆବେଦନ ପରେ ଏପରି ପଦକ୍ଷେପ ନେଇଛି ବୈଦେଶିକ ବ୍ୟାପାର ମନ୍ତ୍ରାଳୟ । ସେମାନଙ୍କ ପାସପୋର୍ଟ ୪ ସପ୍ତାହ ପାଇଁ ରଦ୍ଦ କରାଯାଇଛି । ଯଦି ଏହି ସମୟରେ ବ୍ୟକ୍ତିଗତ ଭାବେ ହାଜର ନହେବେ, ତେବେ କଡ଼ା ପଦକ୍ଷେପ ନେବା ପାଇଁ ଚେତାବନୀ ଦେଇଛନ୍ତି ସରକାର । ଫୋର୍ବସ ମ୍ୟାଗାଜିନ୍ ଧନୀ ତାଲିକାରେ ଥିବା ୧୨ ହଜାର କୋଟି ଟଙ୍କାର ମାଲିକ ଏହି ହୀରା ବ୍ୟବସାୟୀଙ୍କୁ ଫେବ୍ରୁୟାରୀ ୪ ତାରିଖରୁ ଲୁକ୍ ଆଉଟ୍ ନୋଟିସ୍ ଜାରି କରି ଖୋଜୁଛି ସିବିଆଇ ।
ପଂଜାବ ନ୍ୟାସନାଲ ବ୍ୟାଙ୍କର ଜାଲ୍ ଗ୍ୟାରେଂଟି ପତ୍ର ଜରିଆରେ ପ୍ରାୟ ୧୧ ହଜାର ୪୦୦ କୋଟି ଟଙ୍କା ଚଳୁ କରିଥିବା ଅଭିଯୋଗ ରହିଛି ନିରଭ ଓ ତାଙ୍କ ସହଯୋଗୀଙ୍କ ବିରୋଧରେ । ବ୍ୟାଙ୍କ୍ ଆଖିରେ ଆଙ୍ଗୁଠି ଗେଂଜି ୭ ବର୍ଷ ଧରି ଚଳାଇଥିଲେ ଏହି ଧୋକାଦାରୀ କାରବାର । ଏହି ଘଟଣା ସମାନାକୁ ଆସିବା ପରେ ପିଏନବି ୧୧ ଜଣ କର୍ମଚାରୀଙ୍କୁ ନିଲମ୍ବିତ କରାଯାଇଛି । ଅନ୍ୟପଟେ ନିରବ ମୋଦି, ତାଙ୍କ ପତ୍ନୀ ଆମି, ଭାଇ ନିଶାଲ୍ ଓ ପ୍ରମୁଖ ସହଯୋଗୀ ମେହୁଲ ଚୋକସୀ ଜାନୁଆରି ପ୍ରଥମ ସପ୍ତାହରେ ଦେଶ ଛାଡିଥିବା ସୂଚନା ମିଳିଛି । ଅଧିକାଂଶ ସମୟ ଆମେରିକାରେ ରହୁଥିବା ନିରଭ ମୋଦିଙ୍କ ପାଖରେ ବେଲଜିଅମର ପାସପୋର୍ଟ ଥିବା ଅନୁମାନ କରୁଛି ସିବିଆଇ । ସେପଟେ ନରେନ୍ଦ୍ର ମୋଦିଙ୍କ ଡାଭୋସ ଗସ୍ତ ବେଳେ ନିରଭ ମୋଦି ଉପସ୍ଥିତ ଥିବା ନେଇ କଂଗ୍ରେସର ଅଭିଯୋଗ ପରେ ଏହାକୁ ନେଇ ଜୋର ଧରିଛି ରାଜନୀତି ।
ଏହି ବ୍ୟାଙ୍କ୍ ଘୋଟାଲା ନେଇ ରିଜର୍ଭ ବ୍ୟାଙ୍କ୍ ପକ୍ଷରୁ ଆରମ୍ଭ ହୋଇଛି ତନାଘନା । ବ୍ୟାଙ୍କର ଇଂଟରନାଲ ଓ ଏକ୍ସଟରନାଲ୍ ଅଡିଟ୍ ବେଳେ କିପରି ଏହା ଜଣାପଡିନଥିଲା, ଖୋଳତାଡ କରୁଛି ଆରବିଆଇ । ସେହିପରି ପିଏନବି ଲେଟର ଅଫ୍ ଅଣ୍ଡରଟେକିଂ ଜରିଆରେ ଯେଉଁ ଭାରତୀୟ ବ୍ୟାଙ୍କ୍, ବିଦେଶରେ କୋଟି କୋଟି ନିରଭଙ୍କ କଂପାନୀଙ୍କୁ ଦେଉଥିଲେ, ସେମାନେ କିପରି ଏତେ ଦିନ ଧରି ସ୍କାମ୍ ବିଷୟରେ ଜାଣି ପାରିଲେ ନାହିଁ, ତାହା ମଧ୍ୟ ତଦନ୍ତ ପରିସରକୁ ଆସିଛି ।