ନୂଆ ବର୍ଷରେ ଆସିବ ନୂଆ ନିୟମ! ଗଲ୍ଫ ଦେଶରେ ଭାଟ ଲାଗିବ, ଭାରତୀୟଙ୍କ ଦୁଃଖ ବଢିବ । ଆଉ ଟ୍ୟାକ୍ସ ଫ୍ରି ହୋଇ ରହିବ ନାହିଁ ଗଲ୍ଫ ଦେଶ
ନୂଆ ବର୍ଷରେ ନୂଆ ନିୟମ । ଟ୍ୟାକ୍ସ ଫ୍ରି ଦେଶ ଭାବେ ସାଉଦି ଆରବ, ୟୁନାଇଟେଡ ଆରବ ଏମିରେଟ୍ସ, ବାହାରିନ,କୁଏତ, କତର ଓ ଓମାନ ପୂରା ବିଶ୍ୱରେ ପରିଚିତ । ଅଥାର୍ତ ଏହି ଦେଶରେ ଚାକିରି କରୁଥିବା ବ୍ୟକ୍ତିଙ୍କ ଦରମା ଉପରେ କୌଣସି ଟ୍ୟାକ୍ସ ନିଆଯାଇ ନଥାଏ । ନା କୌଣସି ଦ୍ରବ୍ୟ ଉପରେ ଟ୍ୟାକ୍ସ ଦେବାକୁ ପଡିଥାଏ ନା ଇନକମ ଟ୍ୟାକ୍ସର ଭୟ ରହିଥାଏ । ଏହି ସବୁ ଦେଶ ସମୂର୍ଣ୍ଣ ଭାବେ ଟ୍ୟାକ୍ସ ଫ୍ରି ଦେଶ ଭାବେ ପରିଗଣିତ ହେଉଥିଲା । କିନ୍ତୁ ଏବେ ଏହି ନିୟମରେ ପରିବର୍ତ୍ତନ ହେବାକୁ ଯାଉଛି । ୨୦୧୮ ଜାନୁଆରୀ ୧ ତାରିଖରୁ ସାଉଦି ଆରବ ଓ ୟୁଏଇ ପ୍ରଥମ ଥର ପାଇଁ ଦେଶରେ ଭାଟ ଲଗାଇବାକୁ ନିଷ୍ପତି ନିଆଯାଇଛି । ଦେଶରେ ଆର୍ଥିକ ଅବସ୍ଥା ଦିନକୁ ଦିନ ମାନ୍ଦା ହେବାରୁ ଏଭଳି ନିଷ୍ପତି ନିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଗଲ୍ଫ କୋଅପରେସନ କାଉନସିଲର ସଦସ୍ୟ ଥିବା ଏହି ଦୁଇ ଦେଶ ପ୍ରଥମ ଥର ପାଇଁ ଦେଶରେ ଭାଟ ବ୍ୟବସ୍ଥା ଲାଗୁ କରିବାକୁ ଯାଉଛନ୍ତି । କାରଣ ଲଗାତାର ଏହି ଦୁଇ ଦେଶର ଅର୍ଥନୈତିକ ଅବସ୍ଥାରେ ଅବନତି ଦେଖାଯାଉଛି । ଅଶୋଧିତ ତେଲ ପାଇଁ ସମୃଦ୍ଧ ହୋଇଛି ଏହି ଦେଶ । କିନ୍ତୁ ଲଗାତାର କିଛି ବର୍ଷ ଧରି ଅର୍ନ୍ତଜାତୀୟ ବଜାରରେ ଅଶୋଧିତ ତୈଳର ମୂଲ୍ୟ ହ୍ରାସ ଯୋଗୁଁ ସାଉଦି ଆରବ ଓ ୟୁଏଇ ଭଳି ଦେଶର ରାଜସ୍ୱ ଧୀରେ ଧୀରେ କମିବାରେ ଲାଗିଛି । କାରଣ ଏହି ଦୁଇ ଦେଶର ସିଂହଭାଗ ରାଜସ୍ୱ ଅଶୋଧିତ ତୈଳରୁ ହିଁ ମିଳିଥାଏ । ତେଣୁ ଅଶୋଧିତ ତୈଳର ମୂଲ୍ୟହ୍ରାସ ଯୋଗୁଁ ଏହାର ପ୍ରଭାବ ସିଧାସଳଖ ଦେଶର ରାଜସ୍ୱ ଉପରେ ପଡୁଛି ।
ତେଣୁ ଏହି ରାଜସ୍ୱକୁ ଭରଣା କରିବା ପାଇଁ ସରକାର ଭାଟ ବ୍ୟବସ୍ଥା ଲାଗୁ କରିବାକୁ ନିଷ୍ପତି ନେଇଛନ୍ତି । ନୂଆବର୍ଷରୁ ଖାଦ୍ୟ ସାମଗ୍ରୀ, କପଡା, ଇଲୋକଟ୍ରନିକ,ଫୋନ, ବିଜୁଳି ଓ ପାଣି ସହିତ ହୋଟେଲ ସେବା ଉପରେ ୫ ପ୍ରତିଶତ ଟ୍ୟାକ୍ସ ଲଗାଇବାକୁ ନିଷ୍ପତି ନେଇଛନ୍ତି ଏହି ଦୁଇ ଗଲ୍ଫ ଦେଶ । ତେବେ କିଛି ଅତ୍ୟାବଶକ ସାମଗ୍ରୀ ଓ ସେବା ଉପରେ ଭାଟ ଲାଗୁ କରାଯିବ ନାହିଁ ବୋଲି ଜଣା ପଡିଛି । ରିୟଲ ଇଷ୍ଟେଟ, ମେଡିକାଲ ସେବା, ବିମାନ ଯାତ୍ରା ଓ ଶିକ୍ଷା ଉପରେ ଭାଟ ଲାଗୁ କରାଯିବନି ବୋଲି ଜଣାପଡିଛି । ଦେଶର ରାଜସ୍ୱକୁ ଭରଣା କରିବା ପାଇଁ ୨୦୧୫ରେ ଗଲ୍ଫ କୋ-ଅପରେସନ କାଉନସିଲର ସମସ୍ତ ସଦସ୍ୟ ରାଷ୍ଟ୍ରଙ୍କ ମଧ୍ୟରେ ଆଲୋଚନା ହୋଇଥିଲା ଓ ବିଭିନ୍ନ ସେବା ଉପରେ ଟ୍ୟାକ୍ସ ଲାଗୁ କରିବାକୁ ନିଷ୍ପତି ନିଆଯାଇଥିଲା । ତେବେ ଏହି ନିଷ୍ପତି ସାଉଦି ଆରବ ଓ ୟୁଏଇ ଲାଗୁ କରିବାକୁ ଯାଉଛନ୍ତି । ଏହାଦ୍ୱାରା ବାକି ରାଷ୍ଟ୍ରଙ୍କ ପାଇଁ ବିଭିନ୍ନ ଦ୍ରବ୍ୟ ଉପରେ ଭାଟ ଲାଗୁ କରିବାକୁ ରାସ୍ତା ଫିଟିଯିବ ।
ତେବେ ଗଲ୍ଫ ଦେଶରେ ଭାଟ ଲାଗିବା ପରେ ଏହାର ଅଧିକ ପ୍ରଭାବ ଭାରତ ଉପରେ ପଡିବ । ୨୦୧୫ରେ ବିଶ୍ୱବ୍ୟାଙ୍କ ଦେଇଥିବା ରିପୋର୍ଟ ଅନୁଯାୟୀ, ୨୦୧୪ ମସିହାରେ ଭାରତ ବିଦେଶରୁ ପାଖାପାଖି ୭୦ ବିଲିୟନ ଡଲାର ଟଙ୍କା ପ୍ରାପ୍ତ କରିଥିଲା । ତେବେ ଏହି ଧନରାଶିର ସିଂହଭାଗ ଅଥାର୍ତ ୩୭ ବିଲିୟନ ଡଲାର ଟଙ୍କା ଗଲ୍ଫ ଦେଶରୁ ଆସିଥିଲା । କେବଳ ସାଉଦି ଆରବରୁ ପାଖାପାଖି ୧୧ ବିଲିୟନ ଡଲାର ଟଙ୍କା ଭାରତୀୟ ନାଗରିକଙ୍କ ନିକଟରୁ ଆସିଥିଲା । ତେଣୁ ସାଉଦି ଆରବ ଓ ୟୁଏଇ ଭଳି ଦେଶରେ ଭାଟ ଲାଗୁ ହେବା ଦ୍ୱାରା ଏହାର ପ୍ରଭାବ ଭାରତ ଉପରେ ପଡିବ । ଗଲ୍ଫ ଦେଶର ମୋଟ ଜନସଂଖ୍ୟାର ୩୧ ପ୍ରତିଶତ ହେଉଛନ୍ତି ଭାରତୀୟ ନାଗରିକ । କୁଏତର ମୋଟ ଜନସଂଖ୍ୟାର ୨୧.୫ ପ୍ରତିଶତ ଜନତା ଭାରତୀୟ ହୋଇଥିବା ବେଳେ ଓମାନର ମୋଟ ଜନସଂଖ୍ୟାର ୫୪ ପ୍ରତିଶତ ଲୋକ ହେଉଛନ୍ତି ଭାରତୀୟ ନାଗରିକ । ସେହିଭଳି ସାଉଦି ଆରବରେ ୨୫.୫ ପ୍ରତିଶତ ଓ ୟୁଏଇର ୪୧ ପ୍ରତିଶତ ଭାରତୀୟ ନାଗରିକ ବାସ କରୁଛନ୍ତି । ତେଣୁ ଗଲ୍ଫ ଦେଶର ଏହି ନିୟମ ଭାରତୀୟ ଅର୍ଥ ବ୍ୟବସ୍ଥା ଉପରେ ନିଶ୍ଚୟ ପ୍ରଭାବ ପକାଇବ ।