ଦାୟିତ୍ୱ ନେଲେ ଦୈତନଗରରୀର ନୂଆ ପୁଲିସ କମିଶନର : ସତ୍ୟଜିତ୍ ମହାନ୍ତିଙ୍କ ହାତରେ କଟକ-ଭୁବନେଶ୍ୱର ସୁରକ୍ଷା ଦାୟିତ୍ୱ

4

କନକ ବ୍ୟୁରୋ : ଦୈତନଗରରୀର ନୂଆ ପୁଲିସ କମିଶନର ଭାବେ ଦାୟିତ୍ୱ ଗ୍ରହଣ କଲେ ସତ୍ୟଜିତ୍ ମହାନ୍ତି । ଏବେ କଟକ ଓ ଭୁବନେଶ୍ୱରର ସୁରକ୍ଷା ଦାୟିତ୍ୱ ତାଙ୍କ ହାତରେ । ଆଇନଶୃଙ୍ଖଳା ଦୃଷ୍ଟିରୁ ସତ୍ୟଜିତ ମହାନ୍ତିଙ୍କ ପାଇଁ ଆଗକୁ ରହିଛି ନୂଆ ଚ୍ୟାଲେଞ୍ଜ । ଷଷ୍ଠ କମିଶନର ଭାବେ ସେ ଦାୟିତ୍ୱ ଗ୍ରହଣ କରିଛନ୍ତି । ଆଜି ଭୁବନେଶ୍ୱରସ୍ଥିତ କମିଶନରେଟ୍ ପୁଲିସ୍ ମୁଖ୍ୟାଳୟଠାରେ ଦିନ ସାଢ଼େ ୧୧ଟା ବେଳେ ଶ୍ରୀ ମହାନ୍ତିଙ୍କୁ ପୁଲିସ କମିସନର ଓ୍ଵାଇ ବି ଖୁରାନିଆ ଦାୟିତ୍ୱ ହସ୍ତାନ୍ତର କରିଛନ୍ତି ।

ସତ୍ୟଜିତ ମହାନ୍ତିଙ୍କୁ କମିଶନରେଟ୍ ପୁଲିସର ନୂଆ କମିଶନର୍ ଭାବେ ଦାୟିତ୍ୱ ଗ୍ରହଣ କରିଛନ୍ତି। ୧୯୮୮ ବ୍ୟାଚର ଆଇପିଏସ୍ ଅଫିସର୍ ହେଉଛନ୍ତି ସତ୍ୟଜିତ ମହାନ୍ତି । ୧୯୯୦ ମସିହାରେ ସେ ଜୟପୁର ଏଏସ୍ପି ଭାବେ ସେବା ଆରମ୍ଭ କରିଥିଲେ । ଏହାପରେ ପୁରୀ ଅତିରିକ୍ତ ଏସପି, କୋରାପୁଟ, ରାଉରକେଲା, କଟକ ଓ ବାଲେଶ୍ୱର ଏସପି ଭାବେ ତାଙ୍କର ପୋଷ୍ଟିଂ ହୋଇଥିଲା । ଏହାପରେ ଭିଜିଲାନ୍ସ ଏସପି, ଅତିରିକ୍ତ ପରିବହନ କମିଶନର୍ ଭାବେ ସତ୍ୟଜିତ ମହାନ୍ତି କାମ କରିଥିଲେ । ଉତରାଂଚଳ, କେନ୍ଦ୍ରାଂଚଳ ଓ ପଶ୍ଚିମାଂଚଳ ଡିଆଇଜି ଭାବେ ଏହାପରେ ତାଙ୍କର ପଦୋନ୍ନତି ହୋଇଥିଲା । ପଶ୍ଚିମାଂଚଳ ଓ ଅଗ୍ନିଶମ ତଥା ଗୃହରକ୍ଷୀ ବିଭାଗୀୟ ଆଇଜି ଭାବେ ମଧ୍ୟ ସେ କାମ କରିଛନ୍ତି । ୨୦୦୪ ମସିହାରେ ଉତ୍କୃଷ୍ଟ ସେବା ପାଇଁ ତାଙ୍କୁ ସମ୍ମାନଜନକ ପୁଲିସ ମେଡାଲ ପ୍ରଦାନ କରାଯାଇଥିଲା ।

ସ୍ନାତକୋତ୍ତର ଶିକ୍ଷା ବ୍ୟତୀତ ସେ ଉତ୍କଳ ବିଶ୍ୱବିଦ୍ୟାଳୟରୁ ଆଇନରେ ସ୍ନାତକ ଓ ପୁଡୁଚେରୀ ବିଶ୍ୱବିଦ୍ୟାଳୟରୁ ମାନବାଧିକାର ଶିକ୍ଷାରେ ସ୍ନାତକୋତର ଡିଗ୍ରୀ ହାସଲ୍ କରିଛନ୍ତି । ପୁଲିସ ବିଭାଗରେ ସୁଧାରୀକରଣକୁ ଗୁରୁତ୍ୱ ଦେଉଥିବା ସତ୍ୟଜିତ ତିନୋଟି ପୁସ୍ତକ ମଧ୍ୟ ଲେଖିଛନ୍ତି । ସତ୍ୟଜିତ ଲିଖିତ ପୁସ୍ତକ ମଧ୍ୟରେ ରହିଛି ହ୍ୟୁମାନ୍ ରାଇଟ୍ସ, ପୋଲିସ୍ ଇନ୍ ଇଣ୍ଡିଆ ରୋଲ୍ ରେସପୋନ୍ସିବିଲିଟି ଆଣ୍ଡ ଆକାଉଁଟେବିଲିଟି ଓ ହ୍ୟୁମାନ୍ ବିହାଭିୟର୍ ଆଣ୍ଡ ପୋଲିସ୍ ଏଥିକ୍ସ । ନିକଟରେ ଜାତୀୟ ପୋଲିସ୍ ମିଶନର ଏଗଜିକ୍ୟୁଟିଭ୍ କମିଟିକୁ ସତ୍ୟଜିତ ମହାନ୍ତି ମନୋନୀତ ହୋଇଛନ୍ତି । ଟେନିସ୍ ଖେଳରେ ବିଶେଷ ରୁଚି ରଖନ୍ତି ସତ୍ୟଜିତ୍ ।

Comments are closed.