ସାହିତ୍ୟ ଘର ସମାବେଶରେ ଶିଶୁ ସାହିତ୍ୟର ସୁରକ୍ଷା ଚିନ୍ତା! ନୂଆ ପୀଢ଼ିକୁ ଯୋଡ଼ିବାକୁ ଡିଜିଟାଲ ଓ ଅନଲାଇନ୍ ମାଧ୍ୟମକୁ ବାଛିବାକୁ ଦେଲେ ଆହ୍ୱାନ
କନକ ବ୍ୟୁରୋ : କୁନି କୁନି ପିଲାଙ୍କ ହାତରେ ମୋବାଇଲ, ଲାପଟପ୍ ଭଳି ମାଧ୍ୟମ । ଆଉ ପିଲାମାନେ ଅଧିକ ପସନ୍ଦ କରୁଥିବା ମାଧ୍ୟମରେ ଯଦି ଆମେ ସେମାନଙ୍କ ପାଖରେ ପହଂଚିପାରିବା, ଆମ ଭାଷା ଓ ସାହିତ୍ୟକୁ ପହଂଚାଇ ପାରିବା, ତାହେଲେ ଅତି ସହଜରେ ଆମ ଭାଷାକୁ ପରବର୍ତୀ ପୀଢି଼ ସହ ପରିଚିତ କରାଇପାରିବା । କାଗଜରେ ମୁଦ୍ରିତ ବହି ଓ ପତ୍ରିକା ଅପେକ୍ଷା ଅନଲାଇନ୍ ଏବଂ ଡିଜିଟାଲ ମାଧ୍ୟମକୁ ଆମ ପିଲାମାନେ ଅଧିକ ଗ୍ରହଣ କରୁଥିବାରୁ, ନୂଆ ମାଧ୍ୟମ ଆପଣାଇବାକୁ ସାହିତ୍ୟ ଘର ଉତ୍ସବରେ ଆହ୍ୱାନ ଦିଆଯାଇଛି । ‘ସାହିତ୍ୟ ଘର’ର ପଂଚମ ରାଜ୍ୟସ୍ତରୀୟ ସମାବେଶରେ ଚଳିତବର୍ଷର ପ୍ରସଙ୍ଗ ଥିଲା-ଶିଶୁ ସାହିତ୍ୟ ।
Kanak News is now on WhatsApp
Join and get latest news updates delivered to you via WhatsApp
ଭାଷାକୁ ସୁରକ୍ଷା ଦୃଷ୍ଟିରୁ ଉତର ପୀଢ଼ିକୁ ଆମ ଭାଷାର ଅନୁଗାମୀ କରିବା ପାଇଁ ଏହି ସମାବେଶରେ ଆହ୍ୱାନ ଦିଆଯାଇଛି । ତେଣୁ ପିଲାଙ୍କ ସାହିତ୍ୟକୁ ଅଧିକରୁ ଅଧିକ ଡିଜିଟାଲ ମାଧ୍ୟମକୁ ରୁପାନ୍ତରିତ କରିପାରିଲେ, ଏହା ସହଜ ଓ ସୁଲଭ ମୁଲ୍ୟରେ ପିଲାଙ୍କ ପାଖରେ ପହଂଚିପାରିବ । ହାତ ପାପୁଲିରେ ଥିବା ମୋବାଇଲ ଫୋନରେ ଯଦି ବର୍ଣ୍ଣବୋଧରୁ ଆରମ୍ଭ କରି ରାମାୟଣ, ମହାଭାରତ ଓ ମହାପୁରୁଷଙ୍କ ଜୀବନୀ ଭଳି ଲେଖା ଉପଲବ୍ଧ ହେବ, ତାହା ସହଜରେ ପରବର୍ତୀ ପୀଢ଼ି ପାଖରେ ଅଦୃତ ହେବ ବୋଲି ମତ ପ୍ରକାଶ ପାଇଥିଲା ।
ଓଡ଼ିଆ ଭାଷାର ସୁରକ୍ଷା ଓ ସମୃଦ୍ଧି ପାଇଁ ଅନବରତ ଉଦ୍ୟମ କରୁଥିବା ସାହିତ୍ୟ ଘରର ୩୧୬ଟି ଶାଖା କାର୍ଯ୍ୟ କରୁଥିବା ବେଳେ ୧୧ ହଜାରରୁ ଅଧିକ ସଭ୍ୟ ଏଥିରେ ପଂଜିକୃତ ହୋଇଛନ୍ତି । ଆଉ ସମସ୍ତଙ୍କର ସେଇ ଗୋଟିଏ ଲକ୍ଷ୍ୟ । ପଂଚମ ରାଜ୍ୟସ୍ତରୀୟ ସମାବେଶରେ ସମ୍ବାଦର ସଂପାଦକ ତଥା ସାଂସଦ ସୌମ୍ୟରଂଜନ ପଟ୍ଟନାୟକ, କନକ ନ୍ୟୁଜର କାର୍ଯ୍ୟନିର୍ବାହୀ ନିର୍ଦ୍ଦେଶିକା ତନୟା ପଟ୍ଟନାୟକ କାର୍ଯ୍ୟକ୍ରମରେ ଉପସ୍ଥିତ ରହି ସାରା ରାଜ୍ୟରୁ କ୍ରମାଗତ ଭାବେ ଏତେ ସଂଖ୍ୟାରେ ସାହିତ୍ୟପ୍ରେମୀ ଲୋକ ଯୋଡ଼ିହେଉଥିବାରୁ ଖୁସି ପ୍ରକାଶ କରିଥିଲେ । ଏହାସହ ଜ୍ଞାନପୀଠ ପୁରସ୍କାର ବିଜେତା ସୀତାକାନ୍ତ ମହପାତ୍ର, ଜ୍ଞାନପୀଠ ପୁରସ୍କାର ବିଜୟୀନୀ ପ୍ରତିଭା ରାୟଙ୍କ ଭଳି ମହାନ କଥାକାରମାନେ ଯୋଗ ଦେଇ ଚଳିତବର୍ଷର ପ୍ରସଙ୍ଗ-ଶିଶୁ ସାହିତ୍ୟ ଉପରେ ମାର୍ଗ ଦର୍ଶନ କରିଥିଲେ ।