ଭିମସାର ନିର୍ଦ୍ଦେଶକଙ୍କ ଲୁଣ ଚିକିତ୍ସା । କ୍ୟାନସର ରୋଗୀଙ୍କ ପେଟରେ ପୁଳାପୁଳା ଲୁଣ ଦେବାରୁ ବଢିଗଲା ସୋଡିୟମ ମାତ୍ରା, ଚାଲିଗଲା ଜୀବନ
କନକ ବ୍ୟୁରୋ : ଲୁଣ ଚିକିତ୍ସା ନେଇଗଲା ରୋଗୀର ଜୀବନ । ଭିମସାର ନିର୍ଦ୍ଦେଶକ ଡାକ୍ତର ଅଶ୍ୱିନୀ ପୂଜାହାରୀଙ୍କ ପରୀକ୍ଷାନିରୀକ୍ଷା ଏବଂ ଅସ୍ତ୍ରୋପୋଚାର ବେଳେ ଲୁଣ ପ୍ରଯୋଗ ଯୋଗୁଁ ରୋଗୀଙ୍କ ଜୀବନ ଯାଇଥିବା ପୁଣିି ଅଭିଯୋଗ ଆଣିଛନ୍ତି ଜୁନିୟର ଡାକ୍ତର ସଂଘ । କିନ୍ତୁ ଏଥର ତଥ୍ୟପ୍ରମାଣ ଏବଂ ମୃତ ରୋଗୀଙ୍କ ସଂପୂର୍ଣ୍ଣ ସ୍ୱାସ୍ଥ୍ୟ ରିପୋର୍ଟ ସହ ଅଭିଯୋଗ ଆଣିଛି । ଜଣେ କ୍ୟାନସର ରୋଗୀଙ୍କ ଅପରେସନ୍ ବେଳେ ଲୁଣ ଢ଼ଳା ଯାଉଥିବାର ଚିତ୍ର ବି ସାମ୍ନାକୁ ଆସିିଛି ।
Kanak News is now on WhatsApp
Join and get latest news updates delivered to you via WhatsApp
ଚିକିତ୍ସା ନାଁରେ ରୋଗୀର ଜୀବନ ସହ କେମିତି ଖେଳ ଖେଳା ଯାଇପାରେ ତା’ର ବଡ ପ୍ରମାଣ ସାମ୍ନାକୁ ଆସିଛି । ଜଣେ କ୍ୟାନସର ରୋଗୀଙ୍କ ଅପରେସନ୍ ସମୟରେ ପେଟ ଭିତରେ କେମିତି ଭିମସାର ନିର୍ଦ୍ଦେଶକ ଡାକ୍ତର ଅଶ୍ୱିନୀ ପୂଜାହାରୀ ଏବଂ ତାଙ୍କ ଟିମ୍ ଲୁଣ ଭର୍ତି କରୁଛନ୍ତି ତାହାର ଚିତ୍ର ଏବେ ସାମ୍ନାକୁ ଆସିଛି । ତେବେ ଏଭଳି ଲୁଣ ଚିକିତ୍ସା ପାଇଁ ଜଣେ କ୍ୟାନସର ରୋଗୀଙ୍କ ମୃତ୍ୟୁ ହୋଇଥିବା ନେଇ ଅଭିଯୋଗ କରିଛି ଜୁନିୟର ଡାକ୍ତର ସଂଘ । କେବଳ ଅଭିଯୋଗ କରିନି, ବରଂ ଚିକିତ୍ସାର ସଂପୂର୍ଣ୍ଣ ବିବରଣୀ ରଖିଛି ।
ଅଗଷ୍ଟ ୨୭ । ସ୍ଥାନ: ବୁର୍ଲା ମେଡିକାଲ । କ୍ୟାନସର ରୋଗରେ ପୀଡିତ ଜଣେ ରୋଗୀଙ୍କ ଚିକିତ୍ସା କରୁଥିଲେ ଡାକ୍ତର ଅଶ୍ୱିନୀ ପୂଜାହାରୀ । ରୋଗୀଙ୍କ ସ୍ୱାସ୍ଥ୍ୟ ରିପୋର୍ଟ କହୁଛି-ଅପରେସନ୍ ପୂର୍ବରୁ ରୋଗୀଙ୍କ ସୋଡିୟମର ପରିମାଣ ଥିଲା ୧୩୮ ଏମଇକ୍ୟୁ । ଜଣେ ସାଧାରଣ ମଣିଷର ଶରୀରରେ ସୋଡିୟମ ରହିବା କଥା ୧୩୫ରୁ ୧୪୫ ଏମ୍ଇକ୍ୟୁ । ଆର୍ଥତ୍ ରୋଗୀଙ୍କ ଶରୀରରେ ସୋଡିୟମ୍ ମାତ୍ରା ନର୍ମାଲ ଥିଲା ।
୨୭ ଅଗଷ୍ଟରୁ ନଭେମ୍ବର ୧ ତାରିଖ ଭିତରେ ଅପରେସନ୍ ପରେ ବଦଳି ଗଲା ରୋଗୀଙ୍କ ସ୍ୱାସ୍ଥ୍ୟ ଅବସ୍ଥା । ସେତେବେଳକୁ ରୋଗୀଙ୍କ ଶରୀରରେ ସୋଡ଼ିୟମର ପରିମାଣ ପହଂଚିଗଲା ୧୬୭ ଏମଇକ୍ୟୁ । ତେବେ ମାତ୍ର ୫ ଦିନ ମଧ୍ୟରେ ଶରୀରରେ ସୋଡିୟମର ମାତ୍ରା ଏତେ କିଭଳି ବୃଦ୍ଧି ପାଇଲା ତାହାର ରିପୋର୍ଟ ଦେଖିଲେ ଆପଣ ତାଜୁବ ହେବେ । ଜୁନିୟର ଡାକ୍ତର ଯେଉଁ ରିପୋର୍ଟ ସାମ୍ନାକୁ ଆଣିଛନ୍ତି ସେଥିରେ ରୋଗୀଙ୍କ ପେଟରେ ଲୁଣ ଢ଼ାଲି ଚିକିତ୍ସା କରିବା ପରେ ଅତି ଗୁରୁତର ହୋଇଗଲା ସ୍ୱାସ୍ଥ୍ୟବସ୍ଥା । ସ୍ଥିତି ଏମିତି ହେଲା ଯେ, ରୋଗୀ ନିଶ୍ୱାସ ନେଇ ପାରୁନଥିଲେ । ଆଉ ଶେଷରେ ନଭେମ୍ବର ୧ ତାରିଖ ୫ଟା ୩୦ରେ ଉଡିଗଲା ପ୍ରାଣ ବାୟୁ ।
ରୋଗୀଙ୍କ ଚିକିତ୍ସାକୁ ନେଇ ପରୀକ୍ଷାନିରୀକ୍ଷା କରୁଥିବା ଡାକ୍ତର ଅଶ୍ୱିନୀ ପୂଜାହାରୀ କିନ୍ତୁ ଯୁକ୍ତି ଦର୍ଶାଇ ଆସୁଛନ୍ତି- କ୍ୟାନସର ଚିକିତ୍ସା କିମ୍ବା କୌଣସି ସଂକ୍ରମଣ ବେଳେ ହାଇପରଟନିକ୍ ସାଲାଇନରେ ସଂକ୍ରମିତ ସ୍ଥାନକୁ ଧୋଇବାର ବ୍ୟବସ୍ଥା ରହିଛି । ଏମିତି କି ସେ, ଛାତ୍ର ଥିବା ସମୟରେ ଶିକ୍ଷକଙ୍କଠାରୁ ଲୁଣ ଚିକିତ୍ସା ଶିଖିଥିବା କହିବାକୁ ପଛାଇନଥିଲେ ଅଶ୍ୱିନୀ ପୂଜାହାରୀ ।
ଅନ୍ୟପଟେ ଅଶ୍ୱିନୀ ପୂଜାହାରୀ କରୁଥିବା ଲୁଣ ଚିକିତ୍ସା, ମେଡିକାଲ ପାଠ୍ୟକ୍ରମର ପରିସର ଭୁକ୍ତ ନୁହେଁ ବୋଲି କହିଛନ୍ତି ବିଶେଷଜ୍ଞ ଡାକ୍ତର । ସେରିବ୍ରାଲ ଏଡିମା, ଇଂଟର କ୍ରୋନିଆଲ୍ ରେଜଟ ପ୍ରେସର୍, ହାଇପୋ ଭୋଲିଓମିକ୍ ସକ୍ ଭଳି ଚିକିତ୍ସା କ୍ଷେତ୍ରରେ ହାଇପର ଟନିକ୍ ସାଲାଇନର ବ୍ୟବହାର କରାଯାଇଥାଏ । କାରଣ ଏହା ଅତ୍ୟଧିକ ଲୁଣ ଯୁକ୍ତ ତରଳ ପଦାର୍ଥ । କିନ୍ତୁ ଲୁଣ ନୁହେଁ ବୋଲି କିଛି ଡାକ୍ତର କହିଛନ୍ତି ।ଭିମସାର ଭଳି ରାଜ୍ୟର ଏକ ପ୍ରତିଷ୍ଠିତ ଶିକ୍ଷାନୁଷ୍ଠାନରେ ଲୁଣ ଚିକିତ୍ସା ଯେତିକି ବଡ ବିବାଦ ସୃଷ୍ଟି କରିଛି ତାଠୁ ଅଧିକ ଆଶ୍ଚର୍ଯ୍ୟ କରୁଛି ଭିମସାର ନିର୍ଦ୍ଦେଶକଙ୍କ ଯୁକ୍ତି । ଆଉ ଏହି ଆରୋପ-ପ୍ରତ୍ୟାରୋପ ଭିତରେ ଜୁନିୟର ଡାକ୍ତର ସଂଘ ଏନେଇ ମୁଖ୍ୟମନ୍ତ୍ରୀଙ୍କୁ ଜଣାଇଛନ୍ତି ।