କନକ ବ୍ୟୁରୋ : ଜିଆରଏସଙ୍କୁ ମାଡ ପରେ ଦରମା ବଢାଇଲେ ରାଜ୍ୟ ସରକାର । ଜିଆରଏସଙ୍କ ମୂଳ ଦରମାଠାରୁ ୨ ହଜାର ଟଙ୍କା ଅଧିକ ବଢାଇଲେ ରାଜ୍ୟ ସରକାର । ତାହା ସହ ବିଭିନ୍ନ ସ୍କିମ ଆଧାରରେ ସହାୟତା ରାଶି ୧୮ଶହ ଟଙ୍କା ବଢାଯାଇଛି । ଗ୍ରାମ ରୋଜଗାର ସେବକ ମୋଟ ୮ ହଜାର ୮ଶହ ଟଙ୍କା ପାଇବେ । ପୂର୍ବରୁ ଜିଆରଏସ ବହୁ ଦିନ ଧରି ଆନ୍ଦୋଳନ କରିଆସୁଥିଲେ । ପୂର୍ବରୁ ଅନକେ ଥର ରାଜ୍ୟ ସରକାର ସେମାନଙ୍କ ସଂଘ ସହ ଆଲୋଚନା କରିଥିଲେ । ଶେଷରେ ମୁଖ୍ୟମନ୍ତ୍ରୀଙ୍କ ହସ୍ତକ୍ଷେପ ପରେ ଜିଆରଏସଙ୍କ ଦରମା ବୃଦ୍ଧି ହୋଇଛି । ଅନ୍ୟପଟେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଟାର୍ଗେଟ କରିଛନ୍ତି ପଂଚାୟତିରାଜ ମନ୍ତ୍ରୀ ପ୍ରଦୀପ ମହାରଥୀ । ଧର୍ମେନ୍ଦ୍ର ଏମାନଙ୍କୁ ଆନ୍ଦୋଳନ ପାଇଁ ଉସୁକାଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ ଦୀର୍ଘ ଦିନ ଧରି ଅସ୍ଥାୟୀ ଭାବେ କାର୍ଯ୍ୟରତ ଥିବା ନିଖିଳ ଓଡ଼ିଶା ଗ୍ରାମ୍ୟ ରୋଜଗାର ସେବକ ସଂଘର କର୍ମୀମାନେ ଶୁକ୍ରବାର ୫ଦଫା ଦାବିରେ ମାଷ୍ଟରକ୍ୟାଣ୍ଟିନ ଠାରୁ ଏକ ବିଶାଳ ଶୋଭାଯାତ୍ରାରେ ଯାଉଥିବା ସମୟରେ ପୁଲିସ ସହ ମୁହାଁମୁହିଁ ହୋଇଥିଲେ । ପୁଲିସ ଅଚାନକ ବିକ୍ଷୋଭକାରୀଙ୍କ ଉପରେ ଲାଠିଚାର୍ଜ କରିବାରୁ କିଛି ସମୟ ପାଇଁ ମାଷ୍ଟରକ୍ୟାଣ୍ଟିନ୍ରୁ ଲୋୟର ପିଏମ୍ଜି ଅଞ୍ଚଳ ରଣକ୍ଷେତ୍ର ପାଲଟି ଯାଇଥିଲା । ଲାଠି ମାଡ଼ରେ ପ୍ରାୟ ୨୦ଜଣ କର୍ମୀ ଆହତ ହୋଇଥିବା ବେଳେ ପୁଲିସ ୫୦ରୁ ଅଧିକ କର୍ମୀଙ୍କୁ ଗିରଫ କରିଥିଲା ।
ଗ୍ରାମ୍ୟ ରୋଜଗାର ସେବକମାନଙ୍କୁ ସ୍ଥାୟୀ ନିଯୁକ୍ତି, ମାସିକ ଦରମାକୁ ପେ ଓ ଗ୍ରେଡ୍ ପେ ଥାଇ ୯ହଜାର ଟଙ୍କାକୁ ବୃଦ୍ଧି କରିବା, ଖାଲି ପଡ଼ିଥିବା ନିର୍ବାହୀ ଅଧିକାରୀ ପଦବିରେ ଶତପ୍ରତିଶତ ନିଯୁକ୍ତି, ସାମାଜିକ ସୁରକ୍ଷା ପ୍ରଦାନ କରିବା ଏବଂ ଆକସ୍ମିକ ବିୟୋଗ ଓ ଅକର୍ମଣ୍ୟ ପାଇଁ ସରକାରୀ ଅନୁକମ୍ପା ରାଶି ପ୍ରଦାନ କରିବା ଆଦି ଦାବିରେ ସଂଘର ହଜାର ହଜାର କର୍ମୀ ଆନ୍ଦୋଳନରେ ସାମିଲ ଥିଲେ ।
ତେବେ ଏନେଇ ଅନେକ ରାଜନୀତି ମଧ୍ୟ ହୋଇଥିଲା । ଆନ୍ଦୋଳନ ପଛରେ ଧର୍ମେନ୍ଦ୍ର ପ୍ରଧାନଙ୍କ ହାତ ରହିଛି ବୋଲି ବିଜେଡି ମନ୍ତ୍ରୀ ପ୍ରଦୀପ ମହାରଥୀ କହିଛନ୍ତି। ଆଜି ଧର୍ମେନ୍ଦ୍ରଙ୍କୁ ଟାର୍ଗେଟ କରି ମହାରଥୀ କହିଛନ୍ତି, ଜିଆରଏସଙ୍କ ଆନ୍ଦୋଳନ ପଛରେ ଧର୍ମେନ୍ଦ୍ର ଅଛନ୍ତି । ଧର୍ମେନ୍ଦ୍ର ଆନ୍ଦୋଳନ ପାଇଁ ଉସୁକାଉଛନ୍ତି । ସେ କେନ୍ଦ୍ର ସରକାରଙ୍କୁ କୁହନ୍ତୁ ଚାକିରି ସ୍ଥାୟୀ କରିବେ । ଦିଲ୍ଲୀ ଚାଲ ସାଙ୍ଗ ହୋଇ ଲଢ଼ିବା ବୋଲି ମହାରଥୀ କହିଛନ୍ତି ।