ରାତ୍ରିଭୋଜନରେ ରୁଷ୍ ରାଷ୍ଟ୍ରପତିଙ୍କ ସହ ଦ୍ୱିପାକ୍ଷିକ ଆଲୋଚନା କଲେ ମୋଦି : ଆଜି ସ୍ୱାକ୍ଷରିତ ହୋଇପାରେ ଏସ-୪୦୦ ପ୍ରତିରକ୍ଷା ବାୟୁ କ୍ଷେପଣାସ୍ତ୍ର ଚୁକ୍ତି
କନକ ବ୍ୟୁରୋ : ଭାରତଗସ୍ତରେ ରୁଷ୍ ରାଷ୍ଟ୍ରପତି ଭ୍ଲାଦିମିର୍ ପୁତିନ୍ । ଆଉ ଏହି ଗସ୍ତ ଉପରେ ଆମେରିକା ସମେତ ସାରା ବିଶ୍ୱର ନଜର ରହିଛି । କାରଣ ଗସ୍ତ ସମୟରେ ହିଁ ଭାରତକୁ ଏସ୍ ୪୦୦ ଆଂଟି ମିସାଇଲ୍ ସିଷ୍ଟମ୍ ବିକ୍ରି ନେଇ ଚୂଡ଼ାନ୍ତ ହେବ । ଏହି ମିସାଇଲ୍ ସିଷ୍ଟମ୍ ଭାରତ ହାସଲ୍ କରି ବିଶ୍ୱର ଅନ୍ୟତମ ଶକ୍ତି ସମ୍ପନ୍ନ ରାଷ୍ଟ୍ର ଭାବେ ପରିଗଣିତ ହେବାକୁ ଥିବା ବେଳେ ଭାରତ-ରୁଷ୍ ମଜବୁତ ସମ୍ପର୍କର ଆଉ ଏକ ଉଦାହରଣ ଦେଖିବ ବିଶ୍ୱ ।
Kanak News is now on WhatsApp
Join and get latest news updates delivered to you via WhatsApp
ବିଭିନ୍ନ ପ୍ରସଙ୍ଗରେ ଆଲୋଚନା ହେବାକୁ ଥିବା ବେଳେ ସବୁଠୁ ଗୁରୁତ୍ୱପୂର୍ଣ୍ଣ ଏସ୍ ୪୦୦ ଆଂଟି ମିସାଇଲ୍ ସିଷ୍ଟମ୍ ପ୍ରସ୍ତାବ ଉପରେ ଚୂଡ଼ାନ୍ତ ମୋହର ବାଜିବ ଆଉ ବିଶ୍ୱର ଅନ୍ୟତମ ଶକ୍ତିସମ୍ପନ୍ନ ରାଷ୍ଟ୍ରର ମାନ୍ୟତା ପାଇବ ଭାରତ । ପାଖାପାଖି ୫ ବିଲିଅନ୍ ଡଲାର୍ ବିନିମୟରେ ଭାରତ ଏହି ରୁଷୀୟ ମିସାଇଲ ନିରୋଧୀ ବ୍ୟବସ୍ଥା କିଣୁଥିବା ବେଳେ ପୂର୍ବରୁ ଆମେରିକା ମଧ୍ୟ ଏନେଇ ଅସନ୍ତୋଷ ଜାହିର କରିସାରିଛି । ତେବେ ଏସ୍ ୪୦୦ ମିସାଇଲ୍ ଭାରତର ଶକ୍ତିବୃଦ୍ଧି କରିବ ଏହା ସୁନିଶ୍ଚିତ ବୋଲି କହିଛନ୍ତି ବାୟୁସେନା ମୁଖ୍ୟ ।
ଏସ୍ ୪୦୦ ଆଂଟି ମିସାଇଲ୍ ସିଷ୍ଟମ୍ ପ୍ରସ୍ତାବ ଉପରେ ଚୂଡ଼ାନ୍ତ ମୋହର ବାଜିବା ପରେ ଭାରତ ୨୪ ମାସ ମଧ୍ୟରେ ଏହି ବ୍ୟବସ୍ଥା ହାସଲ୍ କରିବ । ପୂର୍ବରୁ ୨୦୧୪ ମସିହାରେ ଚୀନ ରୁଷ୍ ପାଖରୁ ଏସ୍ ୪୦୦ ମିସାଇଲ୍ ସିଷ୍ଟମ୍ କ୍ରୟ କରିସାରିଛି । ଏସ୍ ୩୦୦ ସିଷ୍ଟମ୍ର ଉନ୍ନତ ସଂସ୍କରଣ ଭାବେ ରୁଷ୍ ଏସ୍ ୪୦୦ ଆଂଟି ମିସାଇଲ୍ ସିଷ୍ଟମ୍ ନିର୍ମାଣ କରିଥିବା ବେଳେ ଆଗକୁ ଏହି ବ୍ୟବସ୍ଥା ହାସଲ୍ କରି ଦକ୍ଷିଣ ଏସିଆର ପ୍ରମୁଖ ଶକ୍ତିଭାବେ ନିଜ ଉପସ୍ଥିତି ଜାହିର୍ କରିବ । ପୁତିନଙ୍କ ଭାରତଗସ୍ତ ବେଳେ ଚୂଡ଼ାନ୍ତ ହେବ ଏହି ଡିଲ୍ । ପାକିସ୍ତାନ ଓ ଚୀନ ଭାରତପାଇଁ ଆହ୍ୱାନ ସୃଷ୍ଟି କରୁଥିବାରୁ ଏଥିସହ ଭାରତ ହେବ ଶକ୍ତିଶାଳୀ ।
ଏସ୍ ୪୦୦କୁ ରୁଷ୍ର ସବୁଠୁ ଶକ୍ତିଶାଳୀ ଓ ଦୁରଗାମୀ ଭୂପୃଷ୍ଠରୁ ଆକାଶକୁ ନିକ୍ଷେପକାରୀ ମିସାଇଲ୍ ବ୍ୟବସ୍ଥା କୁହାଯାଏ । ରୁଷ୍ ରାଷ୍ଟ୍ରପତି ପୁତିନ୍ ଓ ପ୍ରଧାନମନ୍ତ୍ରୀ ମୋଦିଙ୍କ ମଧ୍ୟରେ ଚୂଡ଼ାନ୍ତ ଆଲୋଚନା ପରେ ସେନାକୁ ଏହା ମିଳିବାର ପଥ ପରିଷ୍କାର ହେବ ଓ ଭାରତ ହେବ ଏସିଆର ସୁପର ପାୱାର୍ ।