କନକ ବ୍ୟୁରୋ : ପୁରୀ ବଡଦାଣ୍ଡରେ ବିଦେଶୀ ଭିକାରୀ । ଦିଲ୍ଲୀରୁ ଫେରିଆସି ପୁଣିଥରେ ପୁରୀରେ ଡେରା ପକାଇଛନ୍ତି ଆନ୍ଦ୍ରେ ଗ୍ଲାଗୋଲେଓ । ଦିଲ୍ଲୀରୁ ଫେରିବା ପରେ ସିଂହଦ୍ୱାର ସମ୍ମୁଖରେ ପୁଣିଥରେ ଭିକ୍ଷାବୃତ୍ତି ଆରମ୍ଭ କରିଛନ୍ତି ଆନ୍ଦ୍ରେ । ଏକ ଫ୍ଲେକ୍ସ ପକାଇ ସିଂହଦ୍ୱାରରେ ଅନ୍ୟ ଭିକାରୀଙ୍କ ଗହଣରେ ବସିବା ସହ ଜଗନ୍ନାଥ ମହାପ୍ରଭୁଙ୍କ ନାଁରେ ପୁଣିଥରେ ଭିକ ମାଗିବା ଆରମ୍ଭ କରିଛନ୍ତି ରଷୀୟ ଯୁବକ ଆନ୍ଦ୍ରେ ।
Kanak News is now on WhatsApp
Join and get latest news updates delivered to you via WhatsApp
ପୂର୍ବରୁ ଗତ ଡିସେମ୍ବର ୧୦ ତାରିଖରେ ଏହି ରଷୀୟ ନାଗରିକ ଆନ୍ଦ୍ରେ ସିଂହଦ୍ୱାର ସମ୍ମୁଖରେ ଭିକ ମାଗୁଥିବା ଦେଖାଯାଇଥିଲା । ନିଜକୁ ଶିବଭକ୍ତ ବୋଲି ଦର୍ଶାଇବା ସହ ଲୋକଙ୍କୁ ପଇସା ମାଗୁଥିବା ଦେଖାଯାଇଥିଲା । ସେତେବେଳେ ଏଭଳି ଦୃଶ୍ୟ ଦେଖି ତାଙ୍କୁ ଜଣେ ପଚାରିଥିଲେ, “ଆପଣ କାହିଁକି ଭିକ ମାଗୁଛନ୍ତି?” ଏ ପ୍ରଶ୍ନରେ ସେ ଯେଉଁ ଉତ୍ତର ଦେଇଥିଲେ ଆପଣ ଜାଣିଲେ ଆଶ୍ଚର୍ୟ୍ୟ ହେବେ । ମୁଁ ଭାରତକୁ ଭଲ ପାଏ ସେଥିପାଇଁ ଏଠାକୁ ଆସିଛି । ସେ ରାଧେ ଗୋବିନ୍ଦ ଓ ଋଷିଆରୁ ଆସିଥିବା କହିଛନ୍ତି । ତା ସହ ସେ ଭିକ ମାଗୁନଥିବା ସ୍ପଷ୍ଟ ଭାବରେ କହିଛନ୍ତି । ପ୍ରତିଦିନ ଚଳିବା ପାଇଁ ମୋର ଟଙ୍କା ଦରକାର । ମୁଁ ଭଜନ ଗାଉଛି ଓ ଲୋକମାନେ ମତେ ଟଙ୍କା ଦେଉଛନ୍ତି । ଏବଂ ବାକ୍ସକୁ ଦେଖାଇ ଏହା ତାଙ୍କ ଦାନ ବାକ୍ସ ବୋଲି କହିଥିଲେ । ମୋର କୌଣସି ଅସୁବିଧା ହେଉନାହିଁ । ମୁଁ ରେଲୱେ ଷ୍ଟେସନ ନିକଟରେ ରହୁଛି ଓ ରାତିରେ ସେଠାରେ ଶୋଇପଡୁଥିବା ଅତି ଆନନ୍ଦର ସହ କହିଥିଲେ ।
ତେବେ ଏହାପରେ ତାଙ୍କୁ ପର୍ଯ୍ୟଟନ ବିଭାଗ ପକ୍ଷରୁ ଉଦ୍ଧାର କରାଯାଇଥିଲା । କିନ୍ତୁ ସେ ଭାରତୀୟ ଶରଣାର୍ଥୀ ଭାବେ ରହିବା ପାଇଁ ଆବେଦନ କରିଥିଲେ । ଏପରିକି ଏହା ଭିତରେ ତାଙ୍କର ଭିସା ଜାନୁଆରୀ ୮ ତାରିଖରେ ଶେଷ ହେଉଥିଲା । ତେଣୁ ଏହା ପୁର୍ବରୁ ଜାନୁଆରୀ ୪ ତାରିଖରେ ଦିଲ୍ଲୀସ୍ଥିତି ରଷୀୟ ଦୂତବାସକୁ ପଠାଯାଇଥିଲା । କିନ୍ତୁ ଦିଲ୍ଲୀରେ କିଛି ଦିନ ରହିବା ପରେ ପୁଣିଥରେ ପୁରୀ ଫେରିବା ସହ ଭିକ୍ଷାବୃତ୍ତି ଆରମ୍ଭ କରିଛନ୍ତି ଆନ୍ଦ୍ରେ । ଏପରିକି ଶରଣାର୍ଥୀ ଭାବେ ରହିବା ପାଇଁ ହେବାକୁ ଥିବା ଶୁଣାଣିରେ ଭାଗ ନ ନେଇ ପୁରୀ ଫେରି ଆସିଛନ୍ତି ସେ । ଏଣୁ ଆନ୍ଦ୍ରେ ଏବେ ଶରଣାର୍ଥୀ କି ନୁହେଁ ତାହା ସ୍ପଷ୍ଟ ହୋଇନାହିଁ । ଏବେ ସେ ବେଆଇନ ଭାବେ ପୁରୀରେ ରହୁଛନ୍ତି ।
ଆନ୍ଦ୍ରେ ଦିନ ୧୧ଟା ପର୍ଯ୍ୟନ୍ତ ଭିକ୍ଷାବୃତ୍ତି କରିବା ପରେ ମେଡିକାଲ ଆହାର କେନ୍ଦ୍ରରୁ ୫ଟଙ୍କାରେ ଖାଦ୍ୟ ଖାଇ ଏକ ବସ୍ତିକୁ ଚାଲି ଯାଉଛନ୍ତି । ସେଠାରେ କିଛି ସମୟ ବିଶ୍ରାମ କରିବା ପରେ ପୁଣି ଅପରାହ୍ନରେ ଆସି ଭିକ୍ଷା ମାଗୁଛନ୍ତି । ରାତିରେ ଯାଇ ପୌରସଂସ୍ଥାର ରାତ୍ରିକାଳୀନ ଆଶ୍ରୟ ଶିବିରରେ ଶୋଉଛନ୍ତି । ଏହା ଏବେ ଆନ୍ଦ୍ରେଙ୍କ ଦୈନନ୍ଦିନ ରୁଟିନ୍ । ତେବେ ଭିସା ଅବଧି ସରି ଯାଇଥିବାରୁ ବେଆଇନ ଭାବେ ରହିଲେ ଫାଇନ ଦେବାକୁ ହୋଇଥାଏ ବୋଲି ଜଣେ ବରିଷ୍ଠ ଅଧିକାରୀ କହିଛନ୍ତି ।